Read Lashi 2 KHOKHAM MHOOMYID: 29 Bible Online

2 KHOKHAM MHOOMYID: 29 - Lashi bible

2 KHOKHAM MHOOMYID: 29

¹Hezekia gi apyaid eig xe: wim: zain ri Yuda khokham bue" lo lho: nyang: gi Yerusalem moo eig xe: gau: zain vhoeb da:. Nya: myhi' gi Zekharia da" myiyi: zoo: Abiya nghoid da:.

²Nya: da" phoug" phyid" khokham David da" avoid ri cang wigi ASEING vho: ngei da" moo" ri koid da:.

³Hezekia gi khokham bue" thang: hau: zain xang: shi" lhammoo" khyab moo nyang: gi Noku Yhoem: Moo" khoem" duang: joem ri doem phang wigi hau: joem ri doem nyheing koid da:.

⁴Nyang: gi Noku Yhoem: Moo" bidthu shoid vang" moo khainjung yi yo' Levi yi daphung: ri khe: zheing" to" wigi nyangnu" ri houg moo dang: tid da:.

⁵Nyang: tid zigi «Nanu" Levi byu yigi nanu" nya: gung ri kyeing sain' yu wigi nanu" phoug" phyid" yi ASEING Mangso da" Noku Yhoem: Moo" ri kyeing sain' pyam we'. Noku Yhoem: Moo" ri asain' asen" bue" nhang: da" ja: dangain" ri houg: mo yu pyam we'.

⁶Ngoonu" phoug" phyid" yigi ngoonu" da" ASEING Mangsoo ri jhug azug goo" nghoid da:. Houg: lho: ASEING ri avho: ngei nhang: da" moo" ri koid lo da:. Nyangnu" gi nyang: ri she: pyam pyam wigi nyang: nyid da" joyoo ri nyangnu" nungthang phug lo" byoug ago".

⁷Nyangnu" gi Noku Yhoem: Moo" ri khoem" myhid" pyam wigi myikug joem ri shid: loo nhang: ago". Israela Mangso da" Noku Yhoem: Moo" moo shoem: nam pyo: ja: xu: nghe' ngei" wa yo' nghe' ngei" xoin" ri shugbyid: wa shid re" ngeug pyam boem.

⁸Hau: gang mo ASEING gi Yuda yo' Yerusalem ri nheig yo: lho: nyang: wigi nyangnu" ri koid da" moo" gi yu" gyoug sho' zi nghoid lho: yugkhang" moo" gi gyoug boem bye:. Nanu" hau: khyoo: ri nyeing" za: se' da:.

⁹Ngoonu" da" nya: phoo yigi gyi koid jang: moo said pyam shoug" ago". Ngoonu" da" yhoem: seing: myhi' yi yo' zooshang: yigi thung: byu khyo" myheig lo" zi shau" boem bye:.

¹⁰«Akhid" ngoo gi Israela da" ASEING Mangsoo ngoonu" ri nheig joem: ayoo: loo wa shid re" nyang: yo' dang: theing koid wa ein: myid phyed too" bye:.

¹¹Nga" zoo yi we"- ayo, aze" thang nyid goo". Nanu" gi nyang: ri shoem: nam pyo: ja: xu: nghe' ngei" byid: wa shid re" yo' byumyu" yi nyang: ri noku coung" byid: ziri vhu" she: wa shid re" ASEING wigi khyen: sain' too" shoug" bye: bang: nghoid ago"» ga: tid da:.

¹²vhoo: mo Levi byu yigi houg: moo nyid bang: nghoid. Kohad kung: mo Amasai da" yuggi zoo: Mahad yo' Azaria da" yuggi zoo: Yoela- Merari kung: mo Abdi da" yuggi zoo: Kisha yo' Yehollelela da" nya: yuggi zoo: Azaria- Gershon kung: mo Zimna da" yuggi zoo: Yoasha yo' Yoaha da" yuggi zoo: Eden. Elizaphan kung: mo Shimri yo' Yeuela Asab kung: mo Zekharia yo' Matania Heman kung: mo Yehuela yo' Shime Yeduthun kung: mo Shemaia yo' Uziela bang: nghoid ago".

¹⁵He: bang: nyangnu" mang: nhung" Levi byu yi yo' zeing: foem: wigi nyangnu" dangain" mo, nyangnu" nya: gung ri thung" khyo' gyeung" shang: sho' koid ago". Hau: thang: khokham phoo nyangnu" ri koid wa amyeing" byid: ziyo' dayhang: ti" ASEING da" tarha" ri cang wigi Noku Yhoem: Moo" ri thung" khyo" gyeung" shang: sho' koid ago".

¹⁶Khainjung yigi Noku Yhoem: Moo" ri kyeing sain' pyam wa shid re" akhoug: khyoo: vang yhe: wigi nyangnu" gi thung" khyo" ayung" alho' bui" nhang: da" ja: dangain" ri Noku Yhoem: Moo" vang" khyoo: de" thu pyam ago". Hau: joyoo mo zi Levi byu yigi dangain" ri voomoo" tunggung shoid Kidron lang: khung" khyoo: de" pyam boem.

¹⁷Hau: moo" ri lhammoo" xang: shi" khyab xang: shi" nyid" mo zei: shid" wigi shed nyid" ein: nyid" moo nyangnu" gi yhoem: pain' yab mo zi Noku Yhoem: Moo" ju" sho' dangain" ziri koid pain' bye:. Hau: thang: nyangnu" gi hau: lhammoo" khyab daxe: khyug nyid" ju" sho' gootu: shed nyid" moo" xo' zei: lho: noku wa shid re" Noku Yhoem: Moo" ri soin' nyheing nyid da:.

¹⁸Levi byu yigi khokham Hezekia ri «Ngoonu" gi nghe' ngei" byid: wa phoin:- gyeung" shang: da" zooyho' shid re" zoobui" yo' hau: joem mo jonu" dangain" bo bo wigi Noku Yhoem: Moo" goin" ziri thung" khyo" kyeing sain' da" moo" ri bain koid bye:.

¹⁹Ngoonu" gi khokham Ahaza nya: Mangsoo ri jhug azug da" hau: zain nyid gu: agyoo: moo nyang: yu pyam da" jonu" joem dangain" ri we' doem yu too" bye:. Houg: lho: hau: ziri doem shug byid: too" bye:. Hau: gu dangain" gi ASEING da" phoin: shidkhoin" moo nghoid da» ga: lo kyo" ago".

²⁰Khokham Hezekia gi ayoem" nyid loo za: voomoo" mo vhujhung: yiri khe: zheung" lho: nyangnu" dangain" dage" za: Noku Yhoem: Moo" khyoo: yhe: boem bye:.

²¹Khokham yhoemkhung: byu yi yo' mung" byu yi da" yooboo joem ri voin pyam byid: wa yo' Noku Yhoem: Moo" ri kyeing sain' pyam wa shid re" xoin" khyo" nyangnu" gi nuloo: nyhed du:- yang nyhed du:- yang nu" nyhed du:- coidbaid nyhed du: ri yu yu ago". Khokham Phoo gi Arun da" amyed ashen yi nghoid boem da" khainjung yiri gougnyhoug joem ri xoin" khyo" phoin: dang moo ngei" byid: wa shid re" tid da:.

²²Khainjung yigi xang: shi" nuloo: joem ri said wigi hau: thang: yang joem yang nu" joem ri said ago". Houg: lho: xoin" du: khang" moo" da" suid" ri phoin: dang moo pyi: shoin" boem.

²³Lo" thang moo nyangnu" gi coidbaid joem ri khokham yo' noku ku" mo, gootu: yi jhang she: lo" wigi nyangnu" lo, joem gi hau: joem dang moo ki" byid: ago".

²⁴Hau: thang: khainjung yigi coidbaid joem ri said wigi hau joem da" suid" ri phoin: dang moo foid shoin" wigi mung" byu yi dangain" da" yooboo ri voin pyam wa shid re" xoin" khyo" nghe' ngei" byid: ago". Ciwim gari khokham phoo gi Israela byu yi dangain" bang: shid re" nghe' ngei" byid: da" xoin" yo' yooboo khyoid xoin" joem ri ngei" byid: wa amyeing" byid: to" da:.

²⁵Khokham gi ASEING wigi khokham David ri khokham da" Lapi: Gad khyo" byid: da" jhau" shid khyoo: yo' Lapi: Nathan khyo" byid: da" jhau" shid khyoo: joem ri cang da:. Nyang: gi Levi byu yiri teing yo' jhabceing yo' dage" Noku Yhoem: Moo" moo joyoo byid: to" da:.

²⁶Hau: music jonu" gi khokham David ci: loo bye: da" jonu" yo' du da:. Khainjung yi we' laboo" joem ri ci: lho: yab jo, boem.

²⁷Hezekia gi nghe' ngei" xoin" ri shugbyid: wa shid re" amyeing" byid: kaid bye:. Houg: lho: xoin" ngei" byid: shid" lo" uri shava byu yigi ASEING ri coung" nghei ji khoin" khoin" wigi music phung: bang: gi laboo" joem ri yo' gootu: music jonu" joem ri myheing shid" lo boem ago".

²⁸Hougmoo nyid da" bang: gi noku ku" jang" moo bo bo wigi xoin" dangain" ri bain nghe' ngei" sho' jikhoin" khoin" ziyo' deing da" music thui: joem ri xo' wigi coung" nghei nyid boem.

²⁹Hau: thang: khokham Hezekia yo' byumyu" yi dangain" gi poid thug thoug wigi Mangsoo ri noku ku" ago".

³⁰Khokham phoo yo' byumyu" vhujhung: yigi Levi byu yiri David yo' Lapi: Asab wigi lhid" to" da" coung" nghei jikhoin" joem yo' ASEING ri coung" nghei boem wa shid re" tid ago". Hougsu" yugkhang" moo" gi nyangnu" poid thug thoug lho: Mangsoo ri noku ku" nyid zoo" ri gye" gau ziyo' jikhoin" khoin" ago".

³¹Hezekia gi byumyu" yiri «Akhid" nanu" gi thung" khyo" younglho' mo, nghoid ago". ASEING ri jeju" boin: so" da" alu: jhungshug khyo" xoin" joem ri ci: loo ge» ga: tid da:. Nyangnu" gi hau: ziri tam" gyo: wigi nyangnu" mo dayham" gi nghe' ngei" byid: da" xoin" khyo" ngei" byid: wa gougnyhoug joem ri nyang: nya: myid bau" da" khyo" ci: re" ago".

³²Nyangnu" gi nuloo: 70 du:- yang 100 du: yang nu" 200 du: ASEING shid re" nghe' ngei" xoin" khyo" ci: re" ago".

³³Nyangnu" gi nu: loo 600 du: yo' yang 3000 du: ri we' byumyu" yi zoo: wa xoin" joem khyo" ci: re" boem.

³⁴Hau: gougnyhoug joem ri khainjung yi wigi za: atho' oung: said yoomo moo" oung: sho' nyangnu" ri Levi byu yi pang" byid: ago". Hau: ayo, moo khainjung yi myoo" sho' nyang: nya: gung ri thung" khyo" younglho' sho' koid boem bye:. (Levi byu yigi khainjung yi tho' thung" khyo" younglho' sho' zoem: ci: jang" moo je wigi jhug zug ago".)

³⁵Hau: tho' agoo"- gung goin" nghe' ngei" xoin"- mung" byu yi zo: da" xoin" mo shugbyid: da" khainjung yi nghe' ngei" ca" da" xu:- nghe' ngei" byid: da" xoin" yo' dage" foid shoin" da" zabyid yhid: joem bo bo da:. Houg: lho: Noku Yhoem: Moo" moo noku coung" khyoo: ri doem koid shid" ago".

³⁶Khokham Hezekia yo' mung" byu yigi ngei pyo: boem. Ciwim gari Mangsoo gi nyangnu" ri he: gu: dangain" ri gye" myab sho' koid wa shid re" pang" thoug byid: su: nghoid da:.