Read Lashi EZRA 6 Bible Online

EZRA 6 - Lashi bible

EZRA 6

¹Hougsu" nghoid yoomo khokham Dari amyeing" khyo" wigi Babelon moo to" to" da" lhid" xoem" pug ri thoid sho: yu" abye: go" da:.

²Nghoid loug we' Medi mung" du mo Akbatana voogung moo mougsoug" deing: dadeing: ri shau" myang ago". Hau: lhid" xoem" pug mo bo zigi

³Kuru nyang: vhoebkhang" da" xang: shi" zain ri nya: da" amyeing" dang: gi xoin" ngei" wa ziyo' myi: nghe' xoin" to' wa joyoo shid re" Yerusalem mo Noku Yhoem: Moo" ri koid wa zi nghoid. Noku Yhoem: Moo" ri myhang: khyoo: 90 pi:- Pyi: khyoo: 90 pi: koid wa zi nghoid.

⁴Vooyam vangkhyam ri seig dapyam: lug soem" pyam: kaid wigi koid wa zi nghoid. Yhung: ca" zi dangain" khokham ngei jhi: mo byid: wa zi nghoid.

⁵Khokham Nebukhadneza Yerusalem Noku Yhoem: Moo" mo zi Babelon khyoo: yu lo" da" ngei sheing: yo' koid to" da" oug" khu lang: bain jonu" joem ri nyangnu" joyoo nghoid da" Yerusalem Noku Yhoem: Moo" khyoo: doem ci: tau" loo" wa zi nghoid» ga: lhid" to".

⁶Hau: thang: khokham Dari doem tau" foin: kaid zigi Uphrad gyid lang bidvang shoid mo mung" gyi Tateni yo' Shetha Bozenai Uphrad gyid lang bidvang shoid mo nanu" moo" voin byencang" yi jhang khyoo: pyeing: dang: foin: kaid.

⁷Noku Yhoem: Moo" koid da" moo" zoo" ri atoem' nhang: nyid loo: za: vi: khyoo: phang: loo" we'. Yuda mung" gyi yo' Yuda vhujhung: yigi Noku Yhoem: Moo" ri shid ri koid jang" moo nyang: doem koid goo" baja".

⁸Hougsu" wigi nyangnu" gi Noku Yhoem: Moo" koid nyid jang" moo bo pang" ge' ein: ngoo nanu" ri amyeing" byid: nau zi nghoid. Nyangnu" moo" agyo wa shid re" ci: yhung: ca" zi dangain" ri Uphrad gyid lang bidvang shoid mo yo" koid: yu da" khokham gam" boem" mo myab myab byid: wa zi nghoid.

⁹Nyid" khang" nyid" ashoid loo: sho' Yerusalem mo khainjung yi nyangnu" nyang: ci: vho: ga: ziri nanu" ri tid lo da" nu: zoo:- yang anghoid lang" yang zoo: ri mougkhung: mo Mangsoo ri myi: nghi' xoin" yo' to' byid: wa shid re" yo' sungsoo:- xoo"- zabyid yhid: zhainloin: xu: joem ri nanu" byid: wa zi nghoid.

¹⁰Nyangnu" xoin" yo" ngei" wigi hau: ziri mougkhung: mungdain: mo Mangsoo yo" khab' yu wigi ngoo yo' nga" zoo: yiri mainkaid byid: wa shid re" akyu" mho' byid: baja" hau: ziri koid nyid we'.

¹¹Gootu: ngoo amyeing" byid: nau shi" zigi He: amyeing" dang: ri acang nghoid rigi nyangnu" yhoem: mo zeing lang: noid yu wigi coin: lho: hau: jang" moo nya: gung ri thau" zab lhang" too" wa zi nghoid. Nyangnu" da" yhoem: we' mhoid soid boem bue" nhang: wa zi nghoid.

¹²He: amyeing" dang: ri atam" gyoo: wigi Noku Yhoem: Moo" khyo" khyen: to" da' Yerusalem ri phyo' shoin' wa shid re" koid nyid da" khokham nghoid nghoid mung" byu yi nghoid nghoid Mangso wigi she: pyam zi shoug" wa zi nghoid. Ngoo Dari khokham gi he: amyeing" dang: ri byid: too" bye:. Nga" amyeing" dang: dangain" ri tam" gyoo: ge» ga: lhid" to" da:.

¹³Hau: thang: mung" gyi Tateni thang: Shetha Bozenai yo' nyangnu" da" moo" voin byencang" yigi khosen: amyeing" byid: to" ziyo' dakhyoo" ti" koid bye:.

¹⁴Yuda vhujhung: yi we' lapi: Hagi yo' Zekharia yoem: byid: yoomo Noku Yhoem: Moo" moo" ri khyang: khyang: yo" koid abye: go". Nyangnu" gi Israela byumyu" yi Mangso da" amyeing" dang: khyo" we' Persi khosen- Kuru- Dari- Artaxaxe bang: da" amyeing" dang: khyo" we' wigi Noku Yhoem: Moo" ri bain koid boem abye: go" da:.

¹⁵Nyangnu" gi Noku Yhoem: Moo" ri Dari khokham bue" thang: khyug zain ein: da" Ada lhammoo" khyab lho' xain" soem" nyid" nyid" ri bain koid bye: zi nghoid.

¹⁶Hougsu" yoomo Israela byumyu" yi khainjung yi Levi yi yo' gootu: pyoung" she: loo" shoug" jang" mo doem tau" loo bang: dangain" ngei ngei pyo: pyo: Noku Yhoem: Moo" ri shug byid: abye: go".

¹⁷Yhoem: vang pui: shid re" xoin" ngei" khyo" wigi nu: 100 du: yang 200 du: yang zoo: 400 du: yo' yooboo khyoid wa shid re" Israela byumyu" dakung: moo dadu: khyo" wigi coidbaid 12 du: ri shugbyid: ago".

¹⁸Moshe mougsoug" moo bo ziyo' dayhang: ti" Yerusalem mo Noku Yhoem: Moo" moo moo" zei: wa shid re" khainjung yi yo' Levi yiri nyangnu" khyen: to" ago".

¹⁹Pyoung" she: loo" shoug" jang" mo doem tau" lo da" byumyu" yigi zain khang" moo" zain seig lhammoo" khyab daxe: myid: nyid" nyid" ri lhid: kaid pui" koid boem ago".

²⁰Khainjung yi yo' Levi yi dangain" mo, gi nyang: tu: nyang: gung ri thung" yo' dayhang: ti" cid" yung" cid" lho' lho: younglho' nyid boem. Levi yigi doem tau" lo da" byumyu" yi dangain" mo, shid re" we' khainjung yi shid re" we' nyangnu" nyang: shid re" we' lhid: kaid pui: gougnyhoug xoin" ri said byid: ago".

²¹Xoin" ngei" byid: da" shoo" ri pyoung" she: loo" shoug" jang" mo doem tau" lo da" Israela byumyu" dangain" yo' tungbau noku thung" ri she: pyam wigi Israela byumyu" yi da" ASEING Mangsoo ri loem jeing" noku lo da" hau: mung" mo gootu: byumyu" dangain" bang: we' yo" zoo: wa zi nghoid.

²²Nyangnu" nyhed nyid" nyang: gau gau yi yi doocid" abo da" zooyho' zoo: pui" koid ago". Nyangnu" gi ngei pyo: zi shoug" bye:. Ciwim gari Israela byumyu" yi da" Noku Yhoem: Moo" ri koid da" nyangnu" moo" zoo" moo Asuri khosen bo pang" wa shid re" ASEING gi nya: nheigloem: moo nyangnu" ri pang" thoug nau wa da" myid kaid byid: yoomo nghoid.