Read Lashi EZRA 8 Bible Online

EZRA 8 - Lashi bible

EZRA 8

¹He: zigi khosen Artaxaxe pyaid ri Ezra yo' dage" Babelon mung" moo pyoung" she: lo" jang" mo Yerusalem voomoo" khyoo: doem tau" lo da" byumyu" yi akung: ako' mo vhujhung: yi da" zhayhen" nghoid da:.

²Phineha akung: ako' mo Gershom Ithama akung: ako' mo Daniela David akung: ako' mo Shekheni da" nya: zoo: Hatu. Parosha akung: ako' mo Zakharia yo' nya: akung: ako' mo yuggi 150 yug (He: zigi nyangnu" yhoemkhung: mo zhayhen" nghoid) Pahad Moba akung: ako' mo Zerahia nya: zoo: Elihonai yo' yuggi 200 yug. Zatu akung: ako' mo Yahaziela da" nya: zoo: Shekhania yo' yuggi 300 yug. Adin akung: ako' mo Yonathan da" nya: zoo: Ebed yo' yuggi 50 yug. Elam akung: ako' mo Athalia da" nya: zoo: Yeshaia yo' yuggi 70 yug. Shephatia akung: ako' mo Mikhaela da" nya: zoo: Zebadi yo' yuggi 80 yug. Yoab akung: ako' mo Yehiela da" nya: zoo: Obadia yo' yuggi 218 yug. Bani akung: ako' Yosiphi da" nya: zoo: Shelomid yo' yuggi 160 yug. Bebai akung: ako'' moo Bebai da" nya: zoo: Zekharia yo' yuggi 28 yug. Azgad akung: ako' mo Hakatan da" nya: zoo: Yohanan yo' yuggi 110 yug. Adonikam akung: ako' mo Elipheled. Yeuela. Shemaia yo' yuggi 60 yug. (nyangnu" gi lo" thang mo (...)

¹⁵Ahava voomoo" khyoo: yau lo" da" gyid khyoo" yam moo ngoo gi byuphung: dangain" bang: yo' soem" nyid" ju" sho' theung: nyid boem zi nghoid. Hau: jang" moo ngoo sho: kaid yu" ri khainjung yiri myang nghoid loug we' Levi yigi aboo nghoid da:.

¹⁶Ngoo gi Elieza- Ariela- Shemaia- Elnathan- Yarib- Elhathain- Nathan- Zakharia yo' Meshulam ga: da" vhujhung: goug: yug yo' sara: eig yug nghoid da" Joiarib yo' Elnathan bang: ri khe: yu wigi

¹⁷Ngoo gi nyangnu" ri Khasiphi' mo byuphung: vhujhung: Ido jang" khyoo: nhang: kaid wigi nyang: yo' nya: byencang" yiri Noku Yhoem: Moo" moo Mangso moo" zoo" zei: wa shid re" ngoonu" jang" khyoo: noku yhoem: moo moo" zei: mo, ri nhang: byid: we' ga: pyeung: kaid.

¹⁸Mangso da" jeju" khyo" wigi nyangnu" gi ngoonu" jang khyoo: Mali akung: ako' mo Levi Sherebia gi nya: zoo: yi yo' nya: mang: nhung" yi daxi: shid yug yo' re" ago".

¹⁹Nyangnu" gi Merari akung: ako' mo Hashabia tang: Yeshaia yo' bidnoem yi eig xi: yug ri we' nhang: kaid.

²⁰Pug lho: Noku Yhoem: Moo" moo moo" zei: wa byu 220 yug ri nhang: kaid bye:. Houg bang: da" phoug" phyid" yigi Levi yiri bo pang" wa shid re" David yo' nya: moo" voin bang: gi moo" foin: lid loo bye:. Nyangnu" dangain" gi zhayhen" pug moo myeing boo bye: mo, nghoid ago".

²¹Nyha" da" Mangso shidkhoin" moo nyhang" nya: nheigloem: ri khyo' nyhoem: ci: wigi nyha" gyung: khyoo: shid re" we' nyhang" ri lhoug zung" wa shid re" we' nyha" zooshang: yi shid re" we' nyha" jonu" ziyoo dangain" we' nya: jhang akyu" mho' wa shid re" Ahava toeb khyoo" yam moo nyhang" dangain" mo, zoo: noem jang" wa shid re" ngoo amyeing" byid: bye:.

²²Ngoo gi khokham ri nyha" da" Mangsoo gi nyang: ri loem jeing" bang: atho' moo gi angei apyo: ziyo' dam byid: zi nghoid ein: tid too" yoomo nyha" gyung: khyoo: moo gyivoo joem lo, mo nyhang" ri lhoug zung" wa shid re" myang: gyiphung: khokham jang" mo mho' wa ziri ngoo sho' nyid.

²³Hougsu" nghoid yoomo nyhang" zoo: shug jang" wigi nyhang" ri lhoug zung" wa shid re" Mangso jhang akyu" mho' boem bye:. Nyang: gi ngoonu" akyu" mho' dang: ri tam" gyoo: byid: bye:.

²⁴Hau: khainjung vhujhung: yi akhoug: mo Sherebia tang: Hashabia yo' gootu: daxi: yug ri ngoo khyen: too" bye:.

²⁵Hau: thang: ri khokham nya: phajhi" khyoug" mo, moo" voin mo, yo' Israela byumyu" yi Noku Yhoem: Moo" shid re" byid: da" ngei sheing: yo' oug" khu lang: bain joem ri leug yu" wigi hau: joem ri khainjung yi jhang khyoo: ngoo ab byid: bye: zi nghoid.

²⁶He: zigi nyangnu" ri ngoo ab byid: da" jonu" joem nghoid. Ngei 25 tain:. Ngei 41 joid: jain" bo da" oug" khu lang: bain 100. Sheing: 2062 joid: jain". Sheing: 4 joid: jain" bo da" jarung: 20 khyab. Sheing: yo' dayhang: ti" phoug" da" gyid: mid" gyeung" goem 2 loem: nghoid da:.

²⁸Ngoo gi nyangnu" ri «Nanu" gi nanu" phoug" phyid" da" ASEING Mangsoo jang" moo gyeung" shang: nyid ziyo' dakhyoo" ti" nya: jhang khyoo: nheugshid: nheugdeug byid: da" ngei sheing: oug" khu lang: bain dangain" we' gyeung" shang: nyid.

²⁹Hau: zi joem ri nanu" Noku Yhoem: Moo" moo ju" sho' nyhang" lhoug zung" ca" wa zi nghoid. Yerusalem mo khainjung yab moo hau: zi joem ri leug wigi khainjung vhujhung: yi Levi yi yo' Israela byumyu" yi da" vhujhung: yi jang" moo ab byid: we'» ga: tid.

³⁰Houg: yoomo khainjung yi yo' Levi yigi ngei shang: yo' oug" khu lang: bang joem ri Yerusalem moo jo, da" Noku Yhoem: Moo" khyoo: de" loo" wa shid re" lhoem: khab' yu boem bye: zi nghoid.

³¹Ngoonu" gi Ahava gyid khyoo" yam mo Yerusalem khyoo: lhammoo" dakhyab daxi: eig nyid" nyid" ri yhe: lo" bye:. Ngoonu" da" Mangsoo gi ngoonu" ri gyi koid wa da" gyivoo lo, mo we' gyung: khyoo: mo khyangtoug: joem lo, mo we' lhoug zung" wa shid re" ngoonu" yo' dage" nyid.

³²Ngoonu" Yerusalem moo ju" uri soem" nyid" no: nyid bye:.

³³Hau: thang: myid: nyid" ein: nyid" ri ngoonu" ri Noku Yhoem: Moo" khyoo: yhe: wigi ngei sheing: oug" khu lang: bain ri leug lho: Uria nya: zoo: khainjung Meremod lo, moo ab byid: bye:. Nyang: yo' dage" Phineha nya: zoo: Eleaza yo' Levi byu eig yug. Yeshua nya: zoo: Yozabad yo' Binui nya: zoo: Nodia bang: nghoid ago".

³⁴Dalheing: dam dangain" ziri soin: yu" leug yu" wigi zhayhen" koid bye:.

³⁵Pyoung" she: loo" shoug" jang" mo tau" loo bang: dangain" gi Israela byumyu" yi da" Mangsoo ri myi: nghe' xoin" ngei" wa shid re" xoin" ci: lo boem ago". Nyangnu" gi Israela byumyu" dangain" mo shid re" nu: 12 du:. Yang loo: 96 du:. Yang nu" 77 du: yo' yooboo khyoid xoin" to' wa shid re" coidbaid 12 du: ci: lo boem bye: nghoid ago". Gougnyhoug dangain" zigi ASEING shid re" myi: nghe' xoin" ngei" pyam bye: zi nghoid.

³⁶Nyangnu" gi khosen phoo nyangnu" ri byid: kaid da" sagse: dang: jhug mougsoug" ri Uphrad bidvang shoid mung" du mo mung" gyi yo' moo" voin bang: ri byid: wigi nyangnu" gi hau: byumyu" joem yo' Noku Yhoem: Moo" ri we' pang" thoug bye:.