Read Lashi NEHEMIA 1 Bible Online

NEHEMIA 1 - Lashi bible

NEHEMIA 1

¹He: zigi Hakhalia da" yuggi zoo: Nehemia bain koid lid loo bye: da" moo" zoo" joem nghoid da:. Persi mung" moo Artaxaxe khosen koid zi eig xi zain ein: zain Kisle Lhammoo" khyab moo ngoo Nehemia gi voomoo" zeing Susa moo ju" nyid.

²Nga" mang: nhung" yi mo dayug nghoid da" Hanani gi byu daphung: yo' dage" Yuda mung" khyo" ju" lo da:. Houg: lho: ngoo gi nyangnu" ri Yerusalem da" khyoo: yo' Babelon moo pyoung" nyhid: to" jang" mo doem tau" lo" da" ngoonu" da" mang: nhung" Yuda byu yi da" khyoo: ri lhoem: myid yu".

³Nyangnu" gi ashid: loo: nyid deing lho: moug: xoug" khyoo: doem lo" ju" nyid bang: gi gye" nyid yau: boem ziyo' aqei: ayam moo nyid da" tungbau byumyu" yigi nyangnu" ri yu" nge nyid boem da" khyoo: ngoo ri tid kyo" ago". Nyangnu" gi ngoo ri Yerusalem voomoo" vang joem byo, yoin" jo, shi" ziyo' voomoo" khoem" moo" joem gi nghe' pyam da" ayo, mo akhid" nyid" ju" sho' adoem so' koid shi" ziri tid kyo" ago".

⁴He: gu: dangain" ri ngoo shoug" gyoo: lang" ngoo gi gyo" zhung: lho: ngoug bye:. Bidnyid myoo" sho' ngoo koug ngau lho: zoo: noem azoo:. Ngoo gi Mangso jhang

⁵«Mougkhung: mo ASEING Mangsoo we"- Nang gi gyi: sheung: yug nghoid wigi nang ri ngoonu" gyoug yab jo, boem bye:. Nang gi nang ri jheddab bang: yo' to" da" dang: theing ri jhug zug tung" zoem: ci: wigi nang amyeing" byid: to" ziri cang da:.

⁶ASEING we"- Ngoo ri yu" yu" we' Houg: lho: re" dei zoo: yi nghoid da" Israela byumyu" yi shid re" myen" ri nyid" ri ngoo akyu" mho' nyid da" uri nga" akyu" mho' dang: ri gyoo: byid: la. Ngoo gi ngoonu" Israela byumyu" yi yooboo shoid bye: khyoo: ri yhen: yu nyid. Nga" phoug" phyid" yo' ngoo gi yooboo shoid bye:.

⁷Ngoonu" gi nang ri thougtheung da" khyoo: akhyeing" ashoeb ziri koid lid lo lho: nang amyeing" byid: too" bye: khyoo: ri acang loo: koid bye:. Ngoonu" gi re" dei zoo: Moshe khyo" nang wigi ngoonu" ri byid: to" da" tarha" joem ri acang loo: koid bye:.

⁸Nang Moshe ri tid ziri akhid" myid boin: bye:. Houg zigi Israela byumyu" nanu" gi nga" dang: moo jhug azug boem nghoid rigi ngo wigi nanu" ri gootu: byumyu" yi da" phung: gung khyoo: khaid sain" pyam wa.

⁹Nghoid loug we' nanu" nga" jhang doem lheing: lo wigi ngoo mo nanu" ri amyeing" byid: to" ziri koid boem nghoid rigi nanu" ri mougmyid thang sho' khyoo: kho' sain" pyam bye: nghoid loug we' ngoo ri noku coung" wa shid re" khyen: to" da" joyoo khyoo: nanu" ri doem shu" tau" yu wa› ga: zi nghoid.

¹⁰ASEING we"- hid: bang: gi re" dei zoo: yi yo' nanya: byu yi nghoid ago". Nang gi re" gyi: sheung: da" yoem: so' yo' yoem: vhoo" khyo" nyangnu" ri khyoid yu too" bye:.

¹¹Akhid" nga" akyu" mho' dang: ri tam" gyoo: byid: lho: nang ri ngi: shab byid: noug myid boo da" dei zoo: yi gooji da" akyu" mho' dang: ri we' tam" gyoo: byid: la. Akhid" nyid" ngoo ri oung: doid nhang: la. Khokham pho wigi ngoo ri nheig khyeug wa khyoo: koid byid: we'› ein: akyu" mho'. Hau: ayo, gu: moo ngoo gi khosen pho da" zabyid yhid: jang di" byid: yug nghoid.