Read Lashi NEHEMIA 2 Bible Online

NEHEMIA 2 - Lashi bible

NEHEMIA 2

¹Lhammoo" myid: khyab myang" thang: danyid" nyid" ri khosen Artaxaxe voem: zo: nyid uri ngoo gi nya: jhang zabyid yhid: ci: yhi: byid: bye:. Nyang: gi lid: lo da" ayo, cang ngoo myonhoo: byo, nheig koug nyid ziri khanham we' amyang yu" yoomo

²Nyang: gi «Nang ciwim yoomo houg yhi' myonhoo: byo, nheig koug nyid lha". Nang gi no zi anghoid yoomo myid apyo: zi danghoid aja» ga: myid: bye:. Ngoo gye dain pyam bye:.

³Houg: lho: ngoo gi «ASEING khokham apyaid atoo: moo kang: sheing: nyid baja" o". Nga" phoug" phyid" yiri myhoeb to" da" voomoo" gi byo, yoin" boem khoug: moo nhe' boem" jo, wigi hau: voomoo" khoem" joem we' myi wigi nghe' pyam zi shoug" uri ngoo myo nhoo: byo, nheig akug khasu" yo" koid wa» ein: phug tid bye:.

⁴Khokham phoo gi «Nang vho: zi ci: nghoid la"» ga: myid: boem. Ngoo gi mougkhung: mo Mangso jhang akyu" mho' lho:

⁵Khokham phoo ri ASEING khokham phoo nang ngoo ri myid vho: lho: ngoo mho' ziri byid: nau nghoid rigi nga" phoug" phyid" yiri myhoeb to" da" Yuda mung" khyoo: ngoo ri loo" nhang: wigi hau: voomoo" ri doem lo" de: nhang: la» ein: tid byid:

⁶Khosen phoo gi khosen myhi' yo' dage" zhung: jo, lho: ngoo mho' ziri akhang" byid: da:. Nyang: gi ngoo ri khamyhang myang" sho' lo" nyid byug lho: khanham doem tau" lo wa ziri myid: da:. Houg: lho: ngoo gi nyang: ri tid kyoo" bye:.

⁷Hau: thang: ngoo gi Uphrad bidvang shoid mung" mo mung" zoug: yiri Yuda mung" khyoo: ngoo gyung: yo" so" lid: loo" nhang: wa shid re" tid kyo" da" mougsoug" byid: la ein: nyang: ri mho' da:.

⁸Ngoo gi Noku Yhoem: Moo" lhoug zung" mo, nyid wa gyikhoug: zung khoem" moo" joem koid wa shid re" we' voomoo" vang joem koid wa shid re" we' houg: lho: ngoo nyid wa yhoem: shid re" we' seig voo: pang" thoug byid: wa akhang" ri khokham da" seig moo" yoo lhoug zung" su: Asab mo yo" yu wa mougsoug" dakhyab ri mho' yu bye:. Mangsoo gi ngoo yo' dage" nghoid lho: khosen phoo gi ngoo mho' zi dangain" ngoo ri byid: da:.

⁹Khokham phoo gi gyizoug: dayham" yo' myang: jui: da" gyizoo: daphung: ri ngoo yo' dage" nhang: kaid byid: da:. Houg: yoomo ngoo gi Uphrad bidvang shoid khyoo: gyung: so" to' loo" bye:. Houg moo ngoo gi mung" zoug: yiri khosen pho da" mougsoug" byid: bye:.

¹⁰Nghoid loug we' Bed Horon mo Sanbalad yo' Amon moug: mo moo" voin ludaid Tobia gi Israela byumyu" yi shid re" gi koid wa byu dayug ju" re" ziri shoug" gyoo: lang" gye" nheigloem: gyo: lung nyid ago".

¹¹Ngoo gi Yerusalem khyoo: xo' yhe: lho: soem" nyid" nyang:-

¹²Yerusalem shid re" ngoo ri Mangso wigi cikoid nhang: yoomo nheigloem: ri nhau" to' kaid byid: ziri hang" ri we' ngoo atid kyoo". Hau: thang: gam gung ri ngoo yhoeb to' wigi nga" byencang" dayham" ri shu" lho: thu yhe: loo" bye:. Ngoonu" ci: yhe: da" gougnyhoug gi ngoo zhung: da" loo zei: za: danghoid.

¹³Bidvang shoid langkhung" khoem" moo" khyo" ngoo voomoo" mo thu lo" lho: mougpyi: shoid Mainjung: gyid thu khyo" mhoid soid khoem" moo" khyoo: yhe: lo" da" uri myen" ayo, danghoid ashi". Ngoo yhe: lo" zoo" ri byo, yoin" jo, da" voomoo" vang joem yo' myi: wigi nghe' phyo' pyam to" da" khoem" moo" joem ri joeb ca: yu" khoo' bye:.

¹⁴Hau: thang: voomoo" da" bidthu shoid khyo" moug zhung: shoid gyid thu khoem" moo" yo' khokham da" gyid thoem" khyoo: ju" khoo' bye:. Ngoo zhung: da" loo zei: gi khyoo: amyang yoomo byo, yoin" jo, da" zhoothung" boem khyo" so" lid: lo" da:.

¹⁵Houg: yoomo ngoo gi Kidron lang khung" khyoo: gyoo" yhe: lho: myang: jui: so" lo" zoo" ri vang khyam: joem ri yu" khoo' bye:. Hau: thang: ngoo re" lo da" khyoo: khyo" doem tau" lo wigi langkhung" khoem" moo" khyo" voomoo" khoug: khyoo: doem tau" loo bye:.

¹⁶Ngoo kha khyoo: ju" yhi: kho' khyoo: ri we' ngoo cikoid nyid ziri we' hau: mung" mo gyizoug: yi hang" dayug we' asi' nghoid ago". Akhid" ju" sho' nga" Yuda byumyu" nyang: cang"- khainjung yi vhujhung: yi gyizoug: yi hau: moo" moo bo zei: wa gooji hang" ri we' ngo wigi ci: atid kyoo" shi".

¹⁷Nghoid loug we' akhid" koem' gi ngo wigi nyangnu" ri «Yerusalem byo, yoin" jo, lho: hau: da" voomoo" khoem" joem gi phyo' shoin' pyam zi shoug" yoomo ngoonu" khasu" yau: khi" loem zo: nyid ziri yu" ge'. voomoo" vang khyam: joem ri doem so' zhug lho: ngoonu" da" ngi: yoem" khyoo: ri thang nhang: loo: goo" shang» ein: tid bye:.

¹⁸Houg: lho: Mangsoo ngoo yo' dage" nyid nyid lho: nyang: wigi ngoo ri khasu" pang" lai lo ziyo' khosen pho wigi ngoo ri citid to" ziri ngoo nyangnu" ri tid kyoo" bye:. Nyangnu" gi «Ngoonu" doem nyheing zhug shid" boem looshang» ga: tid ago". Houg: lho: nyangnu" gi moo" zei: shid" wa soin' ago".

¹⁹Ngoonu" cikoid wa zi byen phyoo" soin' kyam: lo" nyid ziri Sanbalad- Tobia yo' Geshem myheing da" Arab bang: shoug" gyoo: lang" nyangnu" gi ngoonu" ri yi juang" pyam lho: «Nanu" koid nyid ziri khasu" shau" myid go" lha". Nanu" gi khosen ri thougtheung gyi koid zi danghoid anghoid re" » ga: myid: boem.

²⁰Ngoo gi «Mougkhung: mo Mangsoo gi ngoonu" ri oung: doid khyoo: byid: wa. Ngoonu" gi nya: da" dei zoo: yi nghoid. Ngoonu" gi yhoem: zhug shid" lo" nyid bye:. Nghoid loug we' nanu" yo' Yerusalem mo jonu" ce: daloem: yo' we' abo soin: nghoid ago". Houg: lho: nanu" gi houg mo thung" ri: daja: ri we' abo yo" seing: goo" wa» ein: tid bye:.