Read Lashi NEHEMIA 3 Bible Online

NEHEMIA 3 - Lashi bible

NEHEMIA 3

¹He: zigi voomoo" vang doem zhug da" khyoo: nghoid da:. Khainjung moo" Eliashib yo' nya: khainjung byencang" yigi vang khoem" moo" ri doem zhug shugbyid: wigi hau: khoem" moo" ri nya: joyoo moo tab ago". Nyangnu" gi dasho: yug da" gyi pyuzung yo' Hananela gyi pyuzung joem ju" sho' ri shugbyid: ago".

²Yerikho mo byu yigi houg: mo xo' da" du ri zhug ago". Imri da" yuggi zoo: Zakhura gi hau: thang: mo xo' da" du ri doem xo' zhug ago".

³Hosena kung: bang: gi wimdo, khoem" moo" ri zhug ago". Nyangnu" gi khoem" bung joem ri koid tab wigi khoem" moo" joem ri nyang: nya: joyoo moo tab to" ago". Khoem" moo" ri kyang jhid wa shid re" khoem" kyang yo' seig khyung" joem ri tab to" ago".

⁴Hakoza da" myid: zoo:- Uria da" yuggi zoo: Meremod gi hau: thang: moo xo' da" du ri zhug da:. Meshezabela da" myid: zoo:- Berekhia da" yuggi zoo: Meshulam gi hau: thang: mo du ri xo' zhug da:. Bana da" yuggi zoo: Zadog gi hau: thang: mo du ri xo' zhug da:.

⁵Tekoa mo byu yigi hau: thang: mo du ri xo' zhug da:. Nghoid loug we' hau: voogung mo vhujhung: koid bang: gi moo" pyoo: mo, wigi nyangnu" ri kho' gam byid: da" moo" ri koid wa shid re" ngeug he: ago".

⁶Pasea da" yuggi zoo: Yoiada yo' Besodeia da" yuggi zoo: Meshulam gi Yeshana khoem" moo" ri doem zhug ago". Nyangnu" khoem" bung joem ri koid tab wigi khoem" moo" joem ri nyang: nya: joyoo moo tab to" ago". Khoem" moo" ri kyang jhid wa shid re" khoem" kyang yo' seig khyung" joem ri tab to" ago".

⁷Gibeon mo Melatia- Meronod mo Yadon yo' Gibeon yo' Mizpa mo byu yigi Uphrad bidvang shoid mung" zoug: nyid da" yhoem: ju" sho' xo' deing jo, da" gu: ri zhug ago".

⁸Harhaia da" yuggi zoo: Uziela ga: da" sheing: baid moo" zei: yug gi hau: thang: mo du ri xo' zhug da:. Nam pyo: xu: lheig yug Hanania gi vang khyam: lam: da" joyoo moo ju" da" gu ri zhug da:.

⁹Hura da" yuggi zoo: Yerusalem ri agung kho' vhoeb da" Rephaia gi hau: thang: mo du ri xo' zhug da:.

¹⁰Harumab da" yuggi zoo: Yedaia nya: yhoem: nam mo xo' da" gu: ri xo' zhug da:. Hashabneia da" yuggi zoo: Hatusha gi hau: thang: mo du ri xo' zhug da:.

¹¹Harim da yuggi zoo: Malkhiya yo' Pahad Moba da" yuggi zoo: Hashub gi hau: thang: mo du yo' myikhyoem gyi pyuzung ri zhug ago".

¹²Halohesha da" yuggi zoo: Shalum ga: da" Yerusalem gootu: dakhyam" ri vhoeb su: gi hau: thang: mo du ri xo' zhug da:. (Nya: myiyi: zoo: yigi nyang: ri hau: moo" moo bo pang" da:.)

¹³Hanun yo' Zanoa voomoo" mo voobyu yigi lang: khung" khoem" moo" ri zhug ago". Nyangnu" gi khoem" moo" joem ri nyang: nya: joyoo moo tab to" ago". Khoem" moo" ri kyang jhid wa shid re" khoem" kyang yo' seig khyung" joem ri tab to" ago". Houg: lho: mhoid soid khoem" moo" ju" sho' dasho: wim: xi: pe: vi: sho' doem zhug ago".

¹⁴Rekhab da" yuggi zoo: Malkhiya ga: da" Bed Hakherem mung" du mo vhoebkhang" su: gi mhoid soid khoem" moo" ri doem zhug da:. Nyang: gi khoem" moo" joem ri nyang: nya: joyoo moo tab to" lho: khoem" moo" ri kyang jhid wa shid re" khoem" kyang yo' seig khyung" joem ri tab to" da:.

¹⁵Kohoze da" yuggi zoo: Shalum ga: da" Mizpa mung" du ri vhoebkhang" su: gi gyid thu khoem" moo" ri doem xo' zhug da:. Nyang: gi khoem" moo" duang dangain" ri bo zhug wigi khoem" moo" joem ri nyang: nya: joyoo moo tab to" lho: khoem" kyang yo' seig khyung" joem ri tab to" da:. Nyang: gi Shela gyid thoem" mo David da" voomoo" mo gyo" lo da" zoem" lhang: ju" sho' khokham khyam: yo' tab jo, da" gu: ri doem zhug da:.

¹⁶Azbug da" yuggi zoo: Bethzura mung" du ri vhoebkhang" da" Nehemia gi David loeb- gyid thoem"- yo' gyi zung joem ju" sho' zhug da:.

¹⁷Vhoo: moo myeing bo da" Levi yigi hau: thang: mo vang joem ri xo' zhug ago". Bani nya: yuggi zoo: Rehum gi hau: thang: moo xo' da" du ri zhug da:. Keila mung" du agung dayi" ri vhoeb da" Hoshabia gi nya: mung" du da" gungthid khyo" hau: thang: mo du ri xo' zhug da:.

¹⁸Hanadad da" nya: yuggi zoo: Bavai ga: da" Keila mung" du agung dayi" ri vhoeb su: gi hau: thang: mo du ri xo' zhug da:.

¹⁹Yeshua da" yuggi zoo: Ezera ga: da" Mizpa ri vhoeb su: gi gyi zi to" da" joyoo shidkhoin" gu: vang lo" guid" da" joyoo moo ju" sho' gu: ri xo' zhug da:.

²⁰Zabai da" yuggi zoo: Barug gi houg mo xo' lho: khainjung moo" Eliashib da" yhoem: vang" khoem" ju" sho' zhug da:.

²¹Hakoza da" myid: zoo:- Uria da" yuggi zoo: Meremod gi houg mo xo' wigi Eliashib da" yhoem: thang sho' zhug da:.

²²Vhoo: moo khainjung yigi houg mo xo' wigi vang myoo: sho' gu: ri doem zhug ago". Yerusalem aqei: ayam mo khainjung yigi houg mo xo' da" du ri zhug da:.

²³Benyamin yo' Hashub gi nya: eig yug da" yhoem: shidkhoin" gu: moo zhug da:. Anania da" nya: myid: zoo:- Maseia da" yuggi zoo: Azaria gi nya: yhoem: shidkhoin" mo eung: da" du ri xo' zhug da:.

²⁴Henadad da" yuggi zoo: Binui gi Azaria da" yhoem: mo vang jhoin: ju" sho' xo' da" du ri zhug da:.

²⁵Uzai da" yuggi zoo: Pala gi vang jhoin: mo zi voomoo" zung" da" gyizoo: yi joyoo nam mo atho' khokham kho" mo gyi pyuzung ju" sho' xo' da" du gu: ri zhug ago". Parosha da" yuggi zoo: Pedaia gi hau: thang: mo du nghoid da" gyid: khoem" moo" nam mo bidthu shoid athang: ju" sho' yo' Noku Yhoem: Moo" lhoug zung" mo da" gyi pyuzung gu ri zhug ago" (He: joyoo gi Noku Yhoem: Moo" koid mo, nyid da" joyoo- voomoo" mo Ophela ga: myheing da" du nghoid da).

²⁷Tekoa mo bang: gi eig lheing: ein: lheing: hau: thang: mo du nghoid da" Noku Yhoem: Moo" lhoug zung" bang: nyid da" gyi pyuzung mo Ophela nam moo ju" sho' doem re" zhug ago".

²⁸Khainjung daphung: gi hougmo xo' da" gu: nghoid da" myang: khoem" moo" mo mougzhung: shoid khyoo: nya: yug nya: yhoem: shidkhoin" eung: eung: moo zhug ago".

²⁹Immera da" yuggi zoo: Zadog gi hougmo xo' da" nya: yhoem: shidkhoin" eung: eung: moo zhug da:.

³⁰Shelemia da" yuggi zoo: Hanania yo' Zalapha da" khyug yug ein: da" yuggi zoo: Hanun gi eig lheing: ein: lheing:- hau: thang: du gu: ri xo' zhug da:. Berekia da" nya: yuggi zoo: Meshulam gi hau: thang: mo du nghoid da" nya: yhoem: shidkhoin" moo zhug da:.

³¹Sheing: baid moo" zei: yug Malkhiya gi hau: thang: mo gu: nghoid da" mougzhung: bidthu shoid vang khyam: jhoin: atho' moo jo da" yab nam- Noku Yhoem: Moo" khyoo: yhe: da" Mipkhad khoem" moo" nam moo: jo da" phaga: phung: yab yo' Noku Yhoem: Moo" koid mo nyid da" joyoo ju" sho' zhug da:.

³²Sheing: baid moo" zei: bang: yo' phaga: ga: bang: gi lo" thang da" du gu: nghoid da" vang jhoin: yab mo zi yang khoem" moo" duang: ju" sho' zhug ago".