Read Lashi NEHEMIA 4 Bible Online

NEHEMIA 4 - Lashi bible

NEHEMIA 4

¹Vang khyam: ri ngoonu" Yuda byumyu" yi doem zhug shid" nyid bye: khyoo: ri Sanbalad shoug" gyoo: lang" nyang: nheig joem: yo: lho: ngoonu" ri tid phue: juang" lo da:.

²Nyang: gi nya: byu yi yo' Samari gyizoo: yi shidkhoin" moo «He: asho" ajhen: da" Yuda byumyu" yigi nyangnu" cikoid nyid ga: myid boem lug la". Nyangnu" gi voomoo" ri doem zhug wa myid soin: boem lug la". Nyangnu" gi xoin" ngei" wigi hau: moo" ri danyid" moo za: yo" koid pain' wa ga: myid boem lug la". Nyangnu" gi myi: nge" gyoeb boem jo, da" lugboem yoomo yhoem: koid lug yo" koid yu goo" wa la"» ga: tid da:.

³Tobia gi nya: nam moo yab jo, wigi «Nyangnu" gi khayhangte" vang khyam: ri se' yo" zhug goo" wa la". Zeigni dadu: wigi lang" hau: ziri yo" doin: phyo' khyo' pyam da» ga: xo' tid da:.

⁴Ngoo gi «O" Mangsoo we"- nyangnu" ngoonu" ri juang" yi nyid ziri shoug" gyoo: byid: la. Nyangnu" juang" zigi nyangnu" da" vhuloem moo gyo" zang" baja". Nyangnu" yo" zi dangain" ri lhoid yu pyam zi shoug" nhang: lho: nyangnu" ri tungbau meing: khyoo: thung: byu khyo" myheig lo" zi shau" boem baja".

⁵Nyangnu" koid da" akhyeing" ashoeb moo" ri yooboo akhyoid byid:. Nyangnu" yooboo joem ri ato" myhid pyam. Ciwim gari nyangnu" gi ngoonu" zhug to" ziri aphoug" akhyoid tid pyam ago"» ein: ngoo akyu" mho'.

⁶Houg: yoomo ngoonu" gi vang ri doem zhug wigi khamyhang amyang" ri hau: agung kho' myhang: do, loo" bye:. Ciwim ga: ri shava byu yigi moo" zei: wa myid bo ago".

⁷Sanbalad- Tobia yo' Arabia mo byu yi Amon mo byu yi Ashdod mo byu yigi Yerusalem vang khyam: ri doem zhug da" moo" zoo" lo, zoo" so" wigi bang" ziri bain jhid loo" bye: ga: ziri shoug" gyoo: lang" nyangnu" gye neig yo: ago".

⁸Houg: yoomo nyangnu" dangain" zeing: re" lho: Yerusalem ri coem' zain: wa yo' lhu: shug wa ga: byen phyoo" khau" zain: ago".

⁹Nghoid loug we' ngoonu" gi ngoonu" da" Mangsoo ri akyu" mho' lho: hau: vang joem ri myen" myen" nyid" nyid" lhoug zung" wa byu byeing abyid loo nyhid: too" bye:.

¹⁰Yuda byumyu" yigi nyangnu" khoin" da" jikhoin" daloem: yo" da:. Hau: zigi «Ngoonu" gi yoovoin lid: voin yoomo yoem: neing: bye:. Yu pyam wa zhoothung" adu athang: gye" myo: da:. Akhid" nyid" ngoonu" vang ri khasu" yo" doem zhug loo: wa lug la"» ga: zi nghoid.

¹¹Ngoonu" da" gyivoo yigi nyangnu" wigi ngoonu" adang moo nyid lho: ngoonu" ri said pyam thang: ri ngoonu" da" moo" ri yo" toem' pyam sho' nyangnu" ri ngoonu" amyang goo" wa ciwim nyid ziri asi' goo" wa ga: myid jho: ago".

¹²Nghoid loug we' dayo, thang: dayo, ngoonu" da" gyivoo yi phung: gung moo nyid da" Yuda byu yigi ngoonu" da" gyivoo wigi ngoonu" ri thougtheung wa byen phyoo" zain: nyid khyoo: joem ri re" tid poin" ago".

¹³Houg: yoomo ngoo gi shava byu yiri shamcoin" joem lham: toid joem lid: joem ci: nhang: wigi vang nungthang moo abain zhug shi" joyoo khang" moo" moo dakung: yo' dakung: cang lho: zung" nhang: too" bye:.

¹⁴Byumyu" yi seing" kho" nyid ziri ngoo shau" myang wigi nyangnu" yo' nyangnu" da" vhujhung: yi gyizoug: yiri «Ngoonu" da" gyivoo yiri agyug goo"- ASEING gi khayhi' gyi: sheung: lho: khayhi' gyoug dain ca" ziri myid boin: we'. Houg: lho: nanu" da" bidnoem yi shid re" nanu" da" nya: zoo: yi nanu" da" nya: yhoem: seing: myhi' yi nanu" da" yhoem: joem shid re" gyi zain: byid: ziri myid boin: ge'» ein: tid da:.

¹⁵Ngoonu" da" gyivoo yigi nyangnu" age khyoo: byen phyoo" khau" zain: to" ziri ngoonu" wigi se' pyam byid: bye: ga: ziri shau" gyo: boem lang" Mangso wigi nyangnu" byen phyoo" zain: moo" ri oung: pyam byid: bye: ziri myid boin: ago". Hau: thang: ngoonu" dangain" gi vang ri doem zhug wa shid re" doem tau" lo" boem bye:.

¹⁶Hau: ayo, mo thang: phyang" nga" byu agung dayi" moo" zei: nyid uri agung dayi" gi gyi byi: gyimi void- lham: toid joem goo joem yo' lid: joem ci: lho: lhoug zung" ago". Houg: lho: ngoonu" da" vhujhung: yi we' vang doem zhug nyid da" byu phung: yiri joeb byeung" sho' pang" thoug byid: ago".

¹⁷Vang zhug wa seig voo: di" bang: lang" dalo, yo' moo" zei: wigi deing" da" dashoid lo, wigi gyizi sham: lham: ci: ago".

¹⁸Houg: lho: vang zhug nyid da" yugkhang" moo" da" phyid" doem: moo shamcoin" da cam" cam" tei" voin ci: ago". Laboo" moid wigi tid poin" wa su: gi nga" nam moo nyid nyid da:.

¹⁹Ngoo gi mung" byu yi yo' nyangnu" da" vhujhung: yi gyizoug: yiri «Moo" lo, zoo" gi soung sheing: yoomo ngoonu" gi vang cang wigi dayug yo' dayug soung ve: nyid boem da:.

²⁰Nanu" gi laboo" moid thui: shoug" gyoo: lang" nga" jhang zeing: foem: lo ge'. Ngoonu" da" Mangsoo gi ngoonu" shid re" meing: zain: byid: ri" wa» ein: tid bye:.

²¹Houg: yoomo nyid" khang" nyid" nab soin: moug: boo" yo, mo zi myen" kyi: joem thu sho' ngoonu" mo agung dayi" bang: vang moo moo" zei: nyid uri agung dayi" bang: gi lham: toid joem ci: lho: lhoug zung" nyid boem bye:.

²²He: ayo, moo ngoo gi moo" yo" loem bang: ri nyid" gung ngoonu" moo" zei: ziyo' dakhyo" myen" ayo, moo we' voomoo" ri yu" lhoug zung" wa shid re" Yerusalem moo myen" myen" ri nyangnu" yo' nyangnu" da" pang" thoug byu yi nyid ca" goo" wa ein: tid too" bye:.

²³Ngoo gi nga" byimi joem ri myen" ayo, moo lang" akhyoid pyam- nga" moo" zei: byencang" yi dayug we' nga" dei zoo: yi dayug we' nga" kang: zung" bang: dayug we' akhyoid pyam nghoid ago". Houg: lho: ngoonu" dangain" bang: gi ngoonu" da" gyi jonu" joem ri lo, moo zhoeb ci: boem bye:.