Read Lashi NEHEMIA 5 Bible Online

NEHEMIA 5 - Lashi bible

NEHEMIA 5

¹Hau: thang: khamyhang akyoo: ri mung" byu myoo" sho' myiyi: yuggi yigi nyangnu" da" bidnoem seing" cang" Yuda yi adang moo anoug akhyoid myeing" myo: lo ago".

²Dayham" gi «Ngoonu" gi yhoem: byu myo: da- ngoonu" kangso' yo" dei wa shid re" gug zoo ca" da» ga: tid ago".

³Gooji gi «Ngoonu" zoo ayoid wa shid re" ngoonu" gi ngoonu" da" yoo yo' zabyid khyam: joem ngoonu" da" yhoem: joem ri pung: zoo: ca" boem bye:» ga: tid ago".

⁴Houg moo gootu: dayham" gi «Ngoonu" gi khokham ri ngoonu" da" yoo yo' zabyid khyam: joem shid re" kheing" kaid wa shid re" ngei jhid" ca" da:.

⁵Ngoonu" gi ngoonu" da" bidnoem seing" cang" Yuda yi yo' dakung: kyeing" danghoid. Ngoonu" da" zooshang: yigi nyangnu" da" zooshang: yi yhi' age boem anghoid re". Nghoid loug we' ngoonu" gi ngoonu" da" zooshang: yiri join bui" nhang: ca" bye:. Ngoonu" da" myiyi: zoo: yi dayham" rigi join khyo" bain oung" zo: pyam bye:. Ngoonu" ri pang" thoug wa zi ajo,. Ciwim gari ngoonu" da" yoo joem yo' zabyid khyam: joem ri ngoonu" mo yu pyam byid: zi shoug" bye:» ga: tid boem.

⁶Nyangnu" myeing" myo: thui: ri ngoo shoug" gyoo: lang" ngoo nheig yoo: bye:.

⁷Houg: lho: moo" zei: wa myid phyed bye:. Ngoo gi mung" byu yi da" vhujhung: yi yo' gyizoug: yiri ngeug thug pyam lho: nyangnu" ri «Nanu" gi nanu" da" mang: nhung" yiri doin: zeig zo: nyid ago"» ein: tid bye:. Ngoo gi hau: yau: khi" ri zei: wa shid re" mung" byu yiri khe: zheing" lho:

⁸«Ngoonu" gi nyangnu" nya: gung ri tungbau yi jhang oung" pyam ca" wigi oung" pyam bye: da" ngoonu" Yuda mang: nhung" yiri ngoonu" ge bue" da" yhi' doem tau" qei yu bye:. Akhid" nanu" gi nanu" nya: mang: nhung" yiri nyangnu" nya: bidnoem seing" cang" Yuda byu yi jhang nyangnu" nya: gung ri oung" zoo: ca" wa khyo" agyoo: atho' phain" nyid ago"» ein: tid bye:. Vhujhung: yigi sam: zoo: nyid nyid wigi ci: we' ayo" tid nghoid ago".

⁹Hau: thang: ngoo gi «Nanu" koid nyid zigi shoid da:. Nanu" gi Mangsoo ri phau" myang: lho: jo ziri koid eung: nyid ago". Houg: lang" nanu" gi tungbau byu- ngoonu" da" gyivoo yi wigi ngoonu" ri coem' juang" wa khyo" ce: daja: we' aboo wa.

¹⁰Ngoo gi mung" byu yiri ngoo mo ngei yo' gug zoo ri jhid" yu nhang: bye:. Houg: lho: nga" byencang" yi yo' nga" shid re" moo zei: mo, ri we' dayhang: ti" jhid" byid: ago". Akhid" ngoonu" gi ngoonu" doem yo" yu ca" zi dangain" ri to" pyam boem loo: shang.

¹¹Nyangnu" wigi nanu" ri xab ca" da" jhen: ngei nghoid nghoid- gug zoo nghoid nghoid- zabyid nghoid nghoid- zhainloin: xu: nghoid nghoid dangain" ri khyoid byid: pyam loo we'. Houg: lho: nyangnu" da" yoo joem zabyid khyam: joem zhainloin: yoo joem yo' yhoem: joem ri akhid" nyang: nyangnu" ri doem tau" byid: ge'» ein: tid bye:.

¹²Vhujhung: yigi «Nang tid ziyo' dakhyoo" ti" ngoonu" koid boem wa bye:. Ngoonu" gi jonu" joem ri doem tau" byid: wigi jhen: joem ri we' ado, yu loo wa» ga: tid ago". Ngoo gi hau: uri shi" nyangnu" to" da" dangsoo" ri zoem: ci: wa shid re" khainjung yiri khe: to" wigi khainjung yi shidkhoin" moo jham' tang: nhang: bye:.

¹³Hau: thang: ngoo gi nga" phyid" doem moo cu" ci: da" pain" cu' ri phid: yu lho: ko: pyam bye:. Ngoo gi «Nanu" to" da" dangsoo" ri azoem: su: hang" riwe' Mangso wigi hidsu" ko: pyam loo wa. Mangsoo gi nanu" yhoem: joem yo' nanu" seing: da" ja: khang" moo" ri yu pyam byid: lho: nanu" ri ci: we' ateing too" byid: khoo' wa» ein: tid bye:. Houg: moo ju" nyid da" yugkhang" moo" gi «Amen» ga: tid lho: ASEING ri coung" byid: ago". Houg: lho: vhujhung: yigi nyangnu" da" dangsoo" joem ri cang ago".

¹⁴Artaxaxe khosen bue" zi eig xi: zain ein: zain mo zi nyang: vhoeb da" soem" xe: eig zain ein: zain ju" sho' Yuda mung" moo ngoo mung" zoug: moo" koid lid lo da" daxe: eig zain gu: moo nga" bidnoem seing" cang" yi we' ngoo we' mung" zoug: dayug khyo" ngoo kham zoo: wa shid re" khyo' byid: da" zoo: shug daja: we' azoo:.

¹⁵Nga" shid vhu" moo mung" zoug: koid lid lo da" yugkhang" moo" gi zoo: noem yo' zabyid yhid: shid re" danyid" ri ngei pyi" myid: xi: khyo" koid: zo: wigi mung" byu yiri lid: da" yoovoin voin nhang: to" da:. Nyangnu" da" dei zoo: yi lang" mung" byu yiri doin: zeig zo: ago". Nghoid loug we' ngoo gi houg yo' adu loo: sho' moo" zei: da:. Ciwim gari ngoo gi Mangsoo ri ngi: shab byid: da:.

¹⁶Ngoo gi vang doem zhug da" moo" moo nga" yoem: dangain" kaid pyam lho: ce: jonu" daja: riwe' ayo" zheing" too"- Nga" shid re" moo" zei: byid: da" yugkhang" moo" gi doem zhug da" moo" moo bo pang" ago".

¹⁷Ngoo gi nga" voem: zoo: zoobui" moo Yuda byumyu" yi yo' nyangnu" da" vhujhung: yi dasho: wim: xi: yug ri main main shu" zho" wigi hau: tho' mo aqei: ayam mungdain: joem mo nga" jhang re" da" byu dangain" ri we' doo" zhoo" bye:.

¹⁸Nyid" khang" moo ngoo gi nuloo: dadu: du: yung" thang da" yang khyug du: du: yo' gyo, myoo" sho' du: du: wigi daxi: nyid: ein: da" danyid" ri zabyid yhid: moin" aseig ri doo" byid: bye:. Nghoid loug we' mung" byu yi khate" lid da" yoovoin voin ca" boem ziri ngoo si' byid: wigi mung" zoug: dayug koid: zoo: wa akhang" yo" to" ziri ngoo akoid: zoo:.

¹⁹O" Mangsoo we"- Nang ri ngoo akyu" mho' kaid da:. He: byumyu" yi shid re" ngoo koid lid lo da" ja: khang" moo" shid re" nga" akyu" ri myid boin: byid: la.