Read Lashi NEHEMIA 9 Bible Online

NEHEMIA 9 - Lashi bible

NEHEMIA 9

¹Hau: lhammoo" khyab moo nyang: eig xe: myid: nyid" ein: nyid" moo Israela byumyu" yigi nyangnu" nya: yooboo joem shid re" kougshu: ziri ci: shug wa shid re" zeing: foem: wigi zoo: noem jang" ago". Nyangnu" gi nyangnu" nya: gung ri tungbau byumyu" yi dangain" bang: mo gootu: tu: kho' nyid abye: go". Nyangnu" gi kougshu: da" asoo" khyo" jid moo" byimi void lho: nyangnu" vhuloem joem moo zhoo" phei" geig gyoug" ci: ago". Hau: thang: nyangnu" gi yab jo, wigi nyangnu" nyang: yo' nyangnu" da" phoug" phyid" yi shoid vhang: lid lo da" yooboo joem ri yhen: yu boem ago".

³Soem" na: yi koo: gi nyangnu" ri nyangnu" da" ASEING Mangso da" tarha" ri nghab kyo" ago". Houg: lho: hau: thang: mo soem" na: yi: gu: moo nyangnu" da" yooboo ri yhen: yu lho: nyangnu" da" ASEING Mangsoo ri coung" boem ago".

⁴Levi byu yi shid re" gyam" daloem: jo, wigi hau: adang moo Yeshua- Bani- Kadmiela- Shebania- Buni- Sherebia- Bani yo' Khenani bang: yab jo, ago". Nyangnu" gi nyangnu" da" ASEING Mangsoo ri thui: zeing yo' akyu" mho' ago".

⁵Vhoo mo Levi byu yi nghoid da" Yeshua- Kadmiela- Bani- Hashabania- Sherebia- Hodia- Shebania- yo' Pethahia bang: gi noku coung" wa shid re" khe: yu shoug" bang: nghoid. Nyangnu" gi «To' yab lho: nanu" da" ASEING MANGSOO RI COUNG" BYID: WE'. Nyang: ri apyaid atoo: moo coung" ge'. Xangsu:- byu wigi coung" zi atham: nghoid loug we' Yugkhang" moo" gi nyang: da" phung gyi: myeing ri coung" byid: goo" baja"» ga: coung" ago".

⁶Hau: thang: Israela byumyu" yigi he: akyu" mho' dang: ri mho' ago". «Nang ASEING we"- nang dayug khyeing" za: ASEING nghoid da:. Nang gi mougkhung: joem yo' mougkhung: mo kyi: joem ri phain" so: phug to" da:. Nang gi myidgung yo' panglai: ri we' hau: joem moo bo da" ja: khang" moo" ri we' phain" so: to" da:. Nang gi dangain" bang: ri kangso' byid: da:. Mougkhung: mo yoem: so' joem gi nang ri goeb pid wigi nang ri coung" byid: ago".

⁷Nang ASEING Mangsoo we"- nang gi Abram ri khyen: yu wigi Babelon mung" Ura mo shu" thu lo da:. Nang gi nya: myeing ri Abraham ga: thid byid: da:.

⁸Nyang: gi re" dang moo jhug zug ziri nang shau" myang wigi Nang gi nyang: yo' dang: theing koid to" da:. Nang gi nyang: ri Khanan byumyu" yi da" mougmyid Hiti byumyu" yi yo' Amori byumyu" yi da" mougmyid Perizi byumyu" yi Yebusi byumyu" yi yo' Gergashi byumyu" yi da" mougmyid ri Nya: amyed ashen yi nyid wa da" mougmyid khyo" byid: pyam wa ga: dang: so" byid: da:. Nang gi jhug zug yug nghoid yoomo re" dang: so" ri nang cang da:.

⁹«Nang gi ngoonu" da" phoug" phyid" yi Egutu moo khasu" yau: khi" shoug" lid loo bye: ziri myang byid: da:. Nang gi nyangnu" thoem" ni moo pang" yu wa shid re" mho' yoid ziri shoug" gyoo: byid: bye:.

¹⁰Nang gi khokham ri thougtheung khyoo: Nya: mung" mo nya: gyizoug: yi' yo' byumyu" yiri thougtheung khyo" mau" pho" moo" ri zei: bye:. Ciwim gari nang gi re" byumyu" yiri nyangnu" wigi khasu" doin: zeig zo: ziri nang se' da:. Nang gi akhid" ju" sho' yo" seing: nyid shi" da" myeing gyi: khyoo: gi hau: uri shoug" yu zi nghoid.

¹¹Nang gi panglai: khyo" kho' lho: re" byumyu" yi shid re" khyoo: phang byid: da:. Houg: lho: nyangnu" ri mougmyid hei' jang" khyo" shu" lid lo" da:. Nyangnu" ri cang khaid bang: gi lugzeing ri panglai: khyoo: du" zei kaid yhang: ti" thoem" no, khyoo: gyo" noeb shid: ago".

¹²Nang gi nyangnu" ri nyid" gung ayo, ri jhoemmoug" thei" yo' shu" lo da:. Houg: lho: myen" ayo, moo nyangnu" da" khyoo: ri myi: yo' thoin" pang byid: da:.

¹³Sina boem moo nang gi mougkhung: mo gyoo" re" da:. Nang gi re" byu yiri dang: ji wigi Nyangnu" ri ge da" Tarha" yo' jo da" jhau" shid dang: joem byid: da:.

¹⁴Nang gi nyangnu" ri re" Dougno: Bidnyid ri gyeung" shang: sho' too" wa shid re" jhau" shid bye:. Houg: lho: nang gi re" dei zoo: Moshe khyo" nyangnu" ri re" Tarha" joem byid: bye:.

¹⁵Nyangnu" zooyoid uri nang gi nyangnu" ri mougkhung: mo zooyho' khyoo' byid: da:. Nyangnu" gyid shid lang" lug moo" boem mo gyid byid: da:. Nang gi nyangnu" ri byid: wa ga: dangsoo" to" da" mougmyid ri yhe: seing: yu wa shid re" tid bye:.

¹⁶Nghoid loug we' ngoonu" da" phoug" phyid" yigi nghoid boin: re" lho: nheigloem: thain: ago". Houg: lho: re" amyeing" dang: ri cang wa shid re" ngeug pyam ago".

¹⁷Nyangnu" gi tam" gyoo: cang yhi: wa shid re" ngeug he: pyam ago". Nyangnu" gi nang koid lid lo zi dangain" ri to" myid pyam ago". Nyangnu" gi nang koid da" mau" pho" alhoo: again joem ri to" myid pyam ago". Nyangnu" nghoid boin: yoomo nyangnu" gi nyangnu" ri Egutu khyoo: doem shu" tau" phang: wa vhujhung: dayug ri khyen: ago". Nghoid loug we' nang gi yooboo khyoid byid: da" Mangsoo nghoid da:. Nang gi jeju" byeung" lho: jheddab myid bo ziyo' nheig yoo: wa ahain: su: nghoid da:. Re" nheig khyeug myid gi gyi: sheung: da:. Nang gi nyangnu" ri ashe: pyam too" nghoid da:.

¹⁸Nyangnu" gi nujung nu" lhoo: daloem: koid wigi Hau: zigi nyangnu" ri Egutu mo shu" thu lo da" yu phara" nghoid ga: tid ago". ASEING nyangnu" gi nang ri khayhi' anoug akhyoid rue" lid: lo ago" la".

¹⁹Nghoid loug we' nang gi nyangnu" ri hau: dain" pyoid yoo moo ashe: pyam too" khoo' nghoid da:. Ciwim gari re" da" nheig khyeug myid gi gyi: sheung: da:. Nang gi nyangnu" ri myen" myen" nyid" nyid" khyoo: shid vhu" she: lo da" Jhoemmoug" zoo" ri we' myi: ri we' ayu pyam byid: nghoid da:.

²⁰Nang gi re" gyi: sheung: khyo" nyangnu" koid ca" ziri nyangnu" ri tid shid da:. Nang gi nyangnu" ri Manna byid: zho" lho: shug gyid byid: jhug da:.

²¹Dain" pyoid yoo moo myid: xi: zain byeung" sho' Nang gi nyangnu" ca" zi dangain" nyangnu" ri byid: da:. Nyangnu" da" byimi joem gi khanham we' ayoem: byug. Houg: lho: nyangnu" da" khyid: joem we' ayam: noo nghoid ago".

²²Nang gi nyangnu" wigi byumyu" yo' mungdain: Nyangnu" nya: mougkyoo" mo mougmyid joem ri oung: yu nhang: da:. Nyangnu" gi Sihon vhoeb da" Heshbon mougmyid ri oung: yu pyam ago". Houg: lho: Oga khokham koid da" Bashan mung" ri we' oung: yu pyam ago".

²³Nang gi nyangnu" ri mougkhung: mo kyi: myoo' myo: da" zoo shang: yiri byid: da:. Houg: lho: nang wigi nyangnu" ri byid: wa ga: nyangnu" phoug" phyid" yiri dangsoo" byid: to" da:. mougmyid ri oung: yu nhang: lho: hau: akhoug: moo nyid nhang: bye:.

²⁴Nyangnu" gi Khanan mung" ri oung: yu pyam ago". Nang gi houg moo nyid da" byumyu" yiri khaid oung: pyam ago". Nang gi nyangnu" ri Khanan mung" byu yi yo' nyangnu" da" khokham yiri nyangnu" nau khyo" koid wa akhang" byid: da:.

²⁵Re" byumyu" yigi reung: da" voomoo" joem Myid xu: bo da" mougmyid- jonu" byeing sho' bo da" yhoem: joem bain du: too" bye: da" gyid teing thoem" joem Zhainloin gam joem shigam joem yo' zabyid gam joem ri lhoid seing: yu ago". Nyangnu" gi nyangnu" vho: gu: dangain" zo: wigi xu: re" boem ago". nyangnu" gi nang wigi nyangnu" ri byid: to" da" ge zi dangain" ri pyoo: pyoo: kham zo: abye: go".

²⁶«Nghoid loug we' re" byumyu" yigi nang ri thougtheung gyi koid lho: re" da" tid dang: ri atam" gyoo: nghoid ago". Nyangnu" gi re" tarha" ri nungthang phug pyam ago". Nyangnu" gi nyangnu" ri tid poin" da" lapi: yiri said pyam ago". Houg bang: gi nyangnu" ri re" jhang khyoo: lheing: loo: wa khyo" tid boem. Nyangnu" gi dalheing: thang: dalheing: nang ri aphoug" akhyoid koid da:.

²⁷Hougsu" yoomo nang gi nyangnu" da" gyivoo yi wigi nyangnu" ri vhoeb zoo: nhang: bye:. Nyangnu" gi nyangnu" yau: khi" shoug" nyid da" akhoug: mo bo pang" wa shid re" nang ri yoid nyho: ago". Houg: lho: nang gi nyangnu" ri mougkhung: mo tu" byid: da:. Nang gi re" gyi: sheung: da" nheig khyeug myid yo' Nyangnu" ri nyangnu" da" gyivoo yi lo, mo khyoid yu wa vhujhung: yiri nhang: kaid byid: da:.

²⁸Yug yo myenjham" khyoo: doem ju" loo lang" nyangnu" yooboo doem shoid ago". Houg: lho: nang gi nyangnu" da" gyivoo yi wigi nyangnu" ri doem oung: pyam nhang: da:. Nghoid loug we' nyangnu" nheigloem: thid wigi nyangnu" ri khyoid yu wa shid re" nang ri mho' lang" mougkhung: mo nang shau" gyo: lho: dalheing: thang: dalheing: re" gyi: sheung: da" nheig khyeug myid khyo" nang gi nyangnu" ri khyoid yu da:.

²⁹Nang gi nyangnu" ri re" jhau" shid khyoo: joem ri cang wa shid re" tid poin" da:. Nghoid loug we' re" tarha" cang zigi kangso' dei khyoo: nghoid loug nyangnu" da" nghoid boin: myid yo' re" tarha" ri ngeug he: pyam ago". Nyangnu" gi myo, yang" ziyo' nheigloem: thain: yoomo anau cang nghoid ago".

³⁰Dazain thang: dazain nang gi nyangnu" ri nheigloem: sheing: sheing: to" wigi tid poin" da:. Nang gi re" lapi: yiri dang: ji wa shid re" nheigloem: soozoo: lheing: nhang: da:. Nghoid loug we' re" byumyu" yigi nu jid ago". Houg: yoomo nang gi gootu: byumyu" yi wigi nyangnu" ri oung: pyam nhang: da:.

³¹Nghoid loug we' re" nheig khyeug myid gyi: sheung: yoomo nang gi nyangnu" ri ashe: pyam- phyo' we' aphyo' shoin' pyam nghoid da:. Nang gi jeju" byeung" ziyo' nheig khyeug myid byeung" da" Mangsoo nghoid.

³²O" Mangsoo we"- ngoonu" da" Mangsoo we"- nang gi gye" gyi: sheung: o". gye" gyoug dain phau" myang: pho" zi nghoid. Gye" yoem: so' bo zi nghoid. Nang gi nang dangsoo" to" da" dang: theing ri jhug zug tung" zoem: ci: da:. Asuri khosen yi ngoonu" ri doin: zeig zo: lid lo da" ayo, mo akhid" nyid" ju" sho' lang" ngoonu" khayhi' kyi" khyeug kham zo: lo la". Ngoonu" khokham yi ngoonu" vhujhung: yi ngoonu" khainjung yi yo' lapi: yi ngoonu" phoug" phyid" yi yo' ngoonu" byumyu" dangain" gi kyi" khyeug zi shoug" kham zoo: bye:. Ngoonu" khayhi' kyi" khyeug shoug" ziri myid boin: byid: la.

³³Nang ngoonu" ri yooboo byid: zigi jo zi koid abye:. Ngoonu" yooboo shoid rilang" nang gi jhug zug lid loo bye:.

³⁴Ngoonu" da" phoug" phyid" yi ngoonu" da" khokham yi vhujhung: yi yo' khainjung yigi re" tarha" ri acang goo" nghoid ago". Nyangnu" gi re" amyeing" dang: joem yo' tid poin" dang: joem ri atam" gyoo: nghoid ago".

³⁵Khokham yigi re" mainkaid jeju" khyo" re" byumyu" yiri nang wigi byid: to" da" myid xu: ge mougmyid lam da" mung" moo nyid boem uri vhoeb zoo: lid lo ago". nghoid loug we' nyangnu" gi yooboo mo doem tau" lo wigi nang ri dei byid: wa ziri du" pyam ago".

³⁶Houg: lho: akhid" ngoonu" gi nang wigi ngoonu" ri byid: to" da" mung"- ngoonu" ri zoo: noem byid: da" he: myid xu: ge mung" moo join bue" nyid boem bye:.

³⁷Hau: mougmyid mo zei thu lo da" shivoo: joem gi nang wigi ngoonu" adang moo vhoeb zoo: nhang: da" khokham yi jhang ju" lo" da:. Ciwim gari ngoonu" yooboo shoid yoomo nghoid. nyangnu" gi ngoonu" yo' ngoonu" da" gougnyhoug joem ri nyangnu" vho: khyo" koid ago". houg: lho: ngoonu" gi xoo: sho' nheigloem: thang nyid boem bye:»

³⁸Bue" lo khyoo: dangain" gang mo Israela byu yi ngoonu" gi hid moo: geing: teing da" myid veing" aso" lhid" wigi ngoonu" da" vhujhung: yi ngoonu" da" Levi byu yi yo' ngoonu" da" khainjung yigi hau: dang moo nyangnu" dazid ri thung" to" ago".