Read Lashi ESTHA 1 Bible Online

ESTHA 1 - Lashi bible

ESTHA 1

¹Khokham Ahasuru gi Persi voomoo" zeing Susa mo khokham zhungtang moo zhoung: lho: India mo wigi Etiopi ju" sho' mung" du 127 loem: ri vhoeb da:.

³Nyang: khokham bue" zi soem" zain ein: zain ri nyang: gi nya: gyizoug: yi yo' moo" pyo: vhoebkhang" zoug: yi dangain" ri zoo: shug soin' wigi pui" koid byid: da:. Persi gyidab joem yo' Media gyidab joem we' hau: mung" du joem mo mung" zoug: yi nheigboo ludaid yi yo' dage" houg moo re" ju" nyid boem ago".

⁴Nya: da" khokham vang" moo yoo" zoo: yoo" shug khyoo: yo" gyi: sheung: reung: thang khyoo: ri lhammoo" khyug khyab ci: shug byid: da:.

⁵Hau: thang: khokham phoo gi Susa voomoo" zeing mo yoo" zoo yoo" shug bang: myung shoo" bang: dangain" ri dakhyo" kyeing" zooshug doo" zho" da:. Hau zoo: shug pui" zeing ri khokham vang" bain: khyam: moo dalabain goin" doo" zho" da:.

⁶Hau: khokham vang" ri moug: nyoug pain" yo' do, u pain" phyu: yabkyo' pain" ruang: joem lang: khang" to" wigi zin: yung" pain" ruang: joem rigi khoolham" boo" void pain" cu' tei" yo' tei" lho: ngei khuang joem moo lug phyu: cab' joem jang lhang" to" wigi koid yung" to" ago". Lug phyu: lheing joem lug ni joem yi yi wim da pale" kug yo' lug nyoug joem khang" pyam da" khokham vang bain: khyam: moo sheing: cuang yo' ngei cuang joem to" too" byid: da:.

⁷Shug ja rigi sheing: khu joem moo shoin: wigi doo" jhug ago". Khu daloem: yo' daloem: we' adu nghoid ago". Khokham phoo gi khokham yi shug da" zabyid yhid: ri agoin agoo" doo" jhug da:.

⁸Shug ja: ri atu' loo: sho' doo" byid: wigi nyang: yug nyang: vho: myhoo' zo: shug wa shid re" khokham kho" dei zoo: yiri amyeing" byid: to" ago".

⁹Hau: ayo, moo khokham myhi' Vashti gi khokham vang khoug: mo myiyi: yiri zoo: shug doo" zho" wigi pui" zeing koid nyid da:.

¹⁰Pui" zeing koid wigi nyhed nyid" ein: nyid" ri khokham phoo gi shug pyo: wigi nya: dei zoo: yi Unug nyhed yug nghoid boem da" Mehuman- Biztha- Harbona- Bigtha- Abagtha- Zetha yo' Khaka bang: ri khe: fang yu da:.

¹¹Nyang: gi khokham myhi' Vashti ri nya: bidmug zhung" pyam wigi ri" wa shid re" nyangnu" ri amyeing" byid: da:. Khokham myhi' gye" young" da" myiyi dayug nghoid wigi nya: da" young" ziri khokham pho gi nya: gyizoug: yi yo' being" voo yi dangain" ri ci: shug nau da:.

¹²Nghoid loug we' dei zoo: yi wigi khokham myhi' Vashti ri khokham pho da" amyeing" yhe: tid kyo" boem ri nyang: ri" wa shid re" ngeug pyam da:. He: zigi khokham phoo ri nheig joem: yoo: nhang: da:.

¹³Tarha" yo' amyeing" dang: da" khyoo: moo dang: myid: thu lo ri khokham phoo gi nya: da" zoug: ludaid yiri phajhi" lhung myid: da:. Houg: yoomo nyang: gi nya: phajhi" byid: bang: ri khe: da:. Nyangnu" gi cikoid wa ziri si' bang: nghoid.

¹⁴Nyang: phajhi" je lhoung mho' bye: bang: gi Khashena- Shetha- Admatha- Tarshi- Mere- Marsena yo' Memukhan bang: nghoid ago". Persi yo' Media mung" mo he: gyizoug: yi nyhed yug gi nya: mungdain: mo gyi: thang da" zoug: yi nghoid ago".

¹⁵Nyang: hau: gyizoug: yiri «Ngoo Ahasuru amyeing" byid: lho: khokham myhi' Vashti ri dei zoo: nhang: kaid lho: khi: nhang: kaid nghoid loug we' khokham myhi' gi tid dang: agyoo: nghoid da:. Nyang: ri khasu" koid ca" ga: tarha" moo tid too" byid la"» ga: myid: da:.

¹⁶Hau: thang: Memukhan gi khokham yo' nya: gyizoug: yiri hid: su" ga: tid kyo" da:. «Khokham myhi' Vashti gi khokham phoo ri za: aphoug" akhyoid koid zi anghoid nya: gyizoug: yiri we' aphoug" zi nghoid da:. Gyeing" nyang: ga: ri mungdain: goin" mo yuggi khang" moo" ri aphoug" zi nghoid da:.

¹⁷Mungdain: goin" mo myiyi: yugkhang" moo" gi khokham myhi' koid ziri shoug" gyoo: lang" nya: yhoem: seing: phoo ri yu" nge loo goo" wa. Nyangnu" gi ‹Khokham Ahasuru gi khokham myhi' Vashti ri khe: kaid uri nyang: ayhi:› ga: tid goo" wa.

¹⁸Persi yo' Media mung" mo gyizoug: yi da" yhoem: seing: myhi' yigi khokham myhi' da" khyoo: ri shoug" gyoo: lang" mau: acoid shi" ri nyangnu" nya: yhoem: seing: phoo yiri tid kyo" boem wa. Khyi' khang" moo" mo myhi' zeing yigi nyangnu" da" yhoem: seing: phoo yiri aphoug" akhyoid koid wigi nyangnu" yhoem: seing: phoo yigi nyangnu" da" yhoem: seing: myhi' yiri nheig yo: loo goo" wa.

¹⁹Aseing khokham gyo: ngei nghoid rigi khokham shidkhoin" khyoo: khanham we' Vashti ayo" doem thu shoug" wa shid re" amyeing" daloem: khyo' kaid we'. Adoem ge thid wa da" Persi yo' Media mungdain: tarha" khyo" lhid" nhang: wa. Hau: thang: nya: joyoo moo je ge da" myiyi: dayug ri khokham myhi' thid bui" nhang: we'.

²⁰Re" amyeing" lu dang: ri hid: yhi' gyi: da" mungdain: goin" moo kyo" kaid lang" myiyi: yugkhang" moo" gi nyang: nya: yhoem: seing: phoo ri yoo" zoo: yoo" shug nghoid nghoid myung shoo" nghoid nghoid phau" myang: eung: khyo" phau" ri" goo" wa» ga: tid da:.

²¹Khokham phoo yo' nya: gyizoug: yigi he: khyoo: ri gyo: ngei wigi khokham phoo gi Menukhan phajhi" byid: da" khyo" koid da:.

²²Nyang: gi mung" du khang" moo" khyoo: hau: mung" du mo myeing" yo' lhid" cab' khyo" lhid" nhang: wigi phoo zeing khang" moo" gi nyang: nya: yhoem: moo yhoem: seing: nghoid wigi lo" thang amyeing" akhang" khyo" yo" tid ca" wa amyeing" pyo: kaid da:.