Read Lashi ESTHA 2 Bible Online

ESTHA 2 - Lashi bible

ESTHA 2

¹Hau: thang: khokham pho da" nheig yoo: gyo" thang: rilang" Vashti koid lid lo ziyo' nyang: ri khasu" amyeing" khyo' to" zi myid soin: yu" nyid da:.

²Houg: yoomo khokham phoo yo' dage" nyid da" phajhi" byid: mo, dayham" gi hid: su" ga: phajhi" byid: ago". «Young" da" zoomyi: gyeing" dayham" ri sho yu" ri agi rhe".

³Nang khyo" wigi mung" du khang" moo" mo moo" voin ludaid yiri khyen: nhang: to" lho: yhoung" da" zoomyi: nu" yi dangain" ziri he: voomoo" zeing Susa mo re" khokham kho" mo myiyi: yi nyid da" jhang khyoo: shu" ri" nhang: wa amyeing" ge khyo' kaid da:. He: moo" ri re" myiyi: yiri yu" coung: byid: nyid yug unug Hegai ri zei: nhang: we' houg: lho: nyangnu" ri shoung: nhang: we'.

⁴Hau: thang: nang yu" vho: thang da" myiyi: nu" ri khyen: yu lho: Vashti da" joyoo moo: khokham myhi' khyo" nyid nhang: we'» ga: tid ago". Khokham phoo gi he: phajhi" byid: dang: ri ge da: ga: myid lho: cang da:.

⁵Hau: Susa moo: Yaira da" yuggi zoo: Modekhai ga: myheing da" Yuda byu dayug nyid da:. Nyang: gi Benyamin kung: mo nghoid lho: Kisha yo' Shimi da" amyed ashen nghoid da:.

⁶Babelon khokham Nebukhadneza gi Yuda khokham Yehoiakhin ri thung byu dayham" yo' dage" Yerusalem mo pyoung" she yu uri Modekhai gi nyangnu" yo' dage" bo bo lo" da:.

⁷Nyang: moo: Hebre myeing khyo" Hadasa ga: da" nya: zoo-oug: Estha ga: zi nyid da:. Nyang: gi young" da" zoomyi: nu" nghoid wigi gung du: young" su: nghoid. Nya: myhi' phoo shid: lo" thang: ri Modekhai wigi nyang: ri shu" yu wigi nya: zoo: yo' dakhyo" khu: gyi: da:.

⁸Khokham gi nya: da" lu dang: ri pyo: kaid thang: myiyi: nu" myoo: sho' yug ri Susa khyoo: shu" re" boem uri Estha we' houg bang: moo bo da:. Nyang: ri we' khokham vang" mo: unug Hegai lo, moo yhe: nyhid: to" da:.

⁹Hegai gi Estha ri yu" ngei wigi Estha gi nyang: wigi myonhoo: byid: zi shoug" yu da:. Nyang: gi Estha ri gung doin: gung myheig byid: wa shid re" yo' gooki' lid zoo: shug zhoo" wa shid re" ayo, amyang" loo: za: hain: hain: soin' byid: da:. Nyang: gi Estha ri khokham kho" mo myiyi: yi nyid da" joyoo mo ge thang da" joyoo ri byid: wigi nyang: ri dei byid: wa shid re" khokham kho" vang" moo nyid da" gooki' lid khyen: to" da" myiyi: nu" nyhed yug ri nyhid: too" byid: da:.

¹⁰Akhid" Modekhai phajhi" byid: to" ziyo' dakhyoo" Estha gi nyang: Yuda myiyi: nghoid ziri zau" to" da:.

¹¹Nyid" khang" nyid" Modekhai gi Estha khasu" nyid ziyo' nyang: moo ci: shau" loo wa ziri si' sho' ga: khokham kho" mo myiyi: yiri nyhid: to" da" vang" shidkhoin" khyoo: yhi: yhi: loo loo so" yen" da:.

¹²Myiyi: yiri shoung: lho: yu" coung: zi dazain myang" da:. Lhammoo" khyug khyab gi mura xu: ri ci: lho: gung myheig byid: da:. Hau: thang: gootu: lhammoo" khyug khyab gi seig xu: ri ci: lho: gung myheig byid: da:. Hau: thang: myiyi: nu" dayug bain thang: dayug ri khokham Ahasuru da" shidkhoin" khyoo: shu" yhe: da:.

¹³Myiyi nu" gi khokham kho" mo myiyi: yi nyid da" yhoem: mo zi khokham kho" khyoo: yhe: da" uri nyang: nyang: void nau da" byimi ci: nghoid loug we' ge void da:.

¹⁴Nyang: gi houg khyoo: myen" thang: zoo" ri yhe: wigi thang: nyid" ri khokham kho" mo gootu: myiyi: yi dab daloem: khyoo: shu" lo" lho: khokham da" dangcang: myhi' yiri yu" coung: da" unug Shagaza da" lo, moo: nyhid: byid: zi shau" da:. Nyang: gi khokham pho wigi yu" ngei lho: myeing yoid khi: lang" za: anghoid rigi khokham pho jhang adoem ge yhi: wa.

¹⁵Khokham pho jhang Estha yhi: wa ayo, ju" ri" bye:. Estha gi Abihala da" myiyi zoo: nghoid wigi Modekhai da" nya: zoo:-oug: nghoid da:. Modekhai gi nyang: ri nya: myiyi: nu" yhang: ti" khu: to" da:. Estha ri myang da" yugkhang" moo" gi nyang: ri nheugshid: nheugdeug ngi: shab byid: ago". Estha da" akhyeing: ayo, ju" loo lang" khokham kho" mo myiyi: yiri yu" coung: da" unug Hegai phajhi" byid: wigi void nhang: zi za: nyang: void da:.

¹⁶Hougsu" yoomo Ahasuru khokham bue" zi nyhed zain daxi: khyab ein: da" Tebed lhammoo" khyab moo Estha ri khokham kho" mo khokham Ahasuru jhang khyoo: shu" yhe: ago".

¹⁷Khokham phoo gi myiyi nu" goo" bang: tho' nyang: ri je yu" ngei lho: nyang: gi khokham pho wigi myonhoo: byid: ziyo' jheddab ziri goo" bang: dangain" tho' re" je yo" yu da:. Khokham phoo gi bid moug ri Estha da" vhuloem moo zhung" byid: lho: nyang: ri Vashti da" joyoo moo khokham myhi' bui" nhang: da:.

¹⁸Hau: thang: khokham phoo gi Estha ri ngi: shab da" khyo" zooshug pui" zeing daloem doo" zho" wigi nya: da" gyizoug: yi yo' tung vhoeb yi dangain" ri khi: zhoo" khi: jhug da:. Nyang: gi da mungdain: goin" moo Dougno: Bidnyid danyid" khyo" lu dang: pyo: lho: khokham dayug da" myeing gyi: jhungshug joem ri gam byid: da:.

¹⁹Hau: uri khokham pho wigi Modekhai ri moo" pyo: vhoebkhang" zoug: aya: moo yoovoin foin: to" da:.

²⁰Estha koem' gi nyang: Yuda byumyu" nghoid ziri atid thu shi" nghoid da:. Hang" ri we' atid kyoo" wa shid re" Modekhai wigi nyang: ri tid to" wigi nyang: we' ngi shi" uri nya: dang: gyo: ziyo' dakhyoo" ti" he: moo" moo nyang: tid khyo" cang da:.

²¹Khokham kho" moo Modekhai moo" zei: da" ayo, moo khokham pho da" yab khyoo: vang yhe: da" khoem" moo zung" da" unug Begthana yo' Teusha eig yug gi khokham Ahasuru ri gyi koid re" wigi gau" said pyam wa soin' boem ago".

²²Hau: ziri Modekhai se' wigi Estha ri tid kyo" da:. Estha we' Modekhai shau" myang byid: ziri khokham phoo ri tid kyo" da:.

²³Sho: myid: joeb yu" ri lu dang: jo nyid ziri shau" myang yoomo eig yug goin" ri pyang" zeing moo lhang" said pyam ago". Khokham phoo gi he: ziri khokham mungdain: mhoomyid: lhid" xoem" bug moo lhid" xoem" too" wa shid re" amyeing" byid: kaid da:.