Read Lashi ESTHA 3 Bible Online

ESTHA 3 - Lashi bible

ESTHA 3

¹Dayo, zoo: myang" thang: ri Khokham Ahasuru gi Haman ga: da" byu dayug ri mung" zoug: jung: aya: moo khyen: to" da:. Haman gi Agag amyed ashen mo Hammedatha da" nya: yuggi zoo: nghoid da:.

²Khokham phoo gi nya: moo" voin da" gyizoug: yi dangain" bang: Haman da" shidkhoin" moo poid thug thoug lho: goeb pid da" khyo" Haman ri phau" myang: khyoo: coem' ci: shug wa shid re" gyizoug: yiri amyeing" daloem: byid: to" da:. Modekhai mo lid wigi dangain" bang: gi hougsu" koid ago". Modekhai gi hau: zi koid wa shid re" ngeug pyam da:.

³Nyang: ciwim yoomo khokham da" amyeing" dang: ri acang ziri khokham da" gyizoug: goo" yug wigi myid: ago".

⁴Danyid" thang: danyid" nyangnu" gi nyang: ri khokham amyeing" cang wa shid re" jhoin" nghoid loug we' nyang: gi nyangnu" tid ziri atam" gyoo: byid: nghoid da:. Nyang: gi «Ngoo Yuda byumyu" nghoid. Ngoo Haman ri ayo" goeb pid» ga: tid da:. Houg: lho: nyangnu" gi Modekhai da" avoid ri Haman yo" zeing: kham abe ga: ziri si' noug yoomo Haman ri tid kyo" ago".

⁵Haman gi nyang: ri Modekhai poid thug thoug lho: agoeb pid ziri shoug" gyoo: lang" nheig joem: yo: lo da:.

⁶Modekhai gi Yuda byumyu" nghoid ga: ziri se' byug lang" Modekhai ri za: yooboo dam byid: wa tho' je xo: zi koid wa ga: myid phyed da:. Nyang: gi Persi mungdain: goin" moo nyid da" Yuda byumyu" yugkhang" moo" ri said pyam wa soin' nyid da:.

⁷Khokham Ahasuru vhoeb zi daxe: eig zain ein: zain- xang: shi" lhammoo" khyab nghoid da" Nisan khyab moo Haman gi nyang: myid soin' to" da" moo" ri zei: shid" wa bidnyid ri (Purim ga: nyangnu" myheing da:.) me" lab khyo" wigi shoug" sho: yu da:. Lhammoo" daxe: eig khyab nghoid da" Ada lhammoo" khyab daxe: soem" nyid" nyid" ri khyen: phyed da:.

⁸Houg: yoomo Haman gi khokham phoo ri «Re" mungdain: goin" moo byu damyu" nyid byo jo, wigi mung" du khang" moo" moo nyid ziri shau" myang. Nyangnu" gi gootu: hang" yo' we' adu da" thung" ri: ri cang ago". Hau: tho' agoo" nyangnu" gi khokham mungdain: tarha" ri we' acang nghoid ago". Houg: yoomo nyangnu" ri hougsu" zeing: kham byid: wa khyoo: nang atung" ge myid amyang.

⁹Aseing: khokham myid veing" nghoid rigi nyangnu" ri said pyam wa amyeing" khyo' we'. Nang amyeing" khyo' nghoid rigi mungdain: vhoeb da" moo" moo: ci: wa shid re" khokham ngei jhi: khyoo: ngei 375 tain: ri ngoo gyeing" kaid byid: wa ein: kookham: kham» ga: tid.

¹⁰Khokham phoo gi lu dang: pyo: jang" moo dazid khyo" wigi tarha" ri ci: da" nya: lo, pain" ri khyoid yu lho: Agag amyed ashen nghoid da" Hammedatha da" nya: yuggi zoo: Yuda byumyu" yi da" gyivoo Haman ri byid: da:.

¹¹Khokham phoo gi nyang: ri «Hau: byumyu" yi yo' nyangnu" da" ngei gi re" da" zi nghoid da:. Nyangnu" ri nang vho: khyo" koid pyam we'» ga: tid da:.

¹²Houg: yoomo xang: shi" lhammoo" khyab daxe" soem" nyid" nyid" ri Haman gi khokham da" moo" seing: yiri khe: lho: lu dang: pyo: mougsoug" dakhyab ri mungdain: moo: ci: da" myeing" khang" moo" yo' lhid" cab' khang" moo" khyo" phug lhid" wigi vhoebkhang" bang:- gyizoug: yi yo' gyizoug: yi dangain" jhang khyoo: foin: pyo: kaid wa shid re" amyeing" byid: da:. Hau: amyeing" lu dang: ri khokham Ahasuru da" myeing khyo" lhid" pyo: lho: nya: lo, pain" dazid thung" tab da:.

¹³Mougsoug" di" bang: gi he: lu dang: ri mungdain: mo mung" du khang" moo" khyoo: di" byid: ago". Hau: amyeing" dang: moo Yuda byumyu"- nge zoo: gyi: zoo:- myiyi: yi yo' zooshang: yi dangain" ri Ada lhammoo" daxe: soem" nyid" nyid" hau: danyid" moo za: said pyam wa pyeing: dang: bo da:. Nyangnu" ri nheig khyeug myid aboo loo: za: said pyam lho: nyangnu" da" jonu" joem ri we' yo" seing: yu pyam goo" wa zi nghoid da:.

¹⁴Hau: amyeing" lu dang: moo bo da" khyoo: joem ri mung" du, khang" moo" mo voobyu yiri se' too" nhang: wa khyo" nghoid da:. Hougsu" lang" hau: bidnyid ju" re" ri yugkhang" moo" jen" jen" yo" soin' ci: wa zi nghoid.

¹⁵Khokham da" amyeing" dang: khyo" Susa voomoo" zeing mo voobyu yiri si nhang: wigi mougsoug" di" bang: wigi hau: lu dang: ri mung" du joem khyoo: di" byid: da:. Susa voomoo" ri lhu: shug kaid da" uri khokham pho yo' Haman gi dage" zhung: lho: yhid: shug nyid ago".