Read Lashi ESTHA 5 Bible Online

ESTHA 5 - Lashi bible

ESTHA 5

¹Zooshug jang" zi soem" nyid" ein: nyid" ri Estha gi khokham myhi' byimi ri void ci: lho: khokham zhungtang jo, da" yab yo' veing" veing" khokham vang khoug: moo yhe: yab jo, da:. Khokham phoo gi vang khoem" duang: yo' veing" veing" da" yab khoug: mo khokham zhungtang moo zhung: jo, da:.

²Khokham myhi' Estha tunggung moo yab jo, ziri khokham phoo myang lang" nyang: ri khokham phoo myonhoo: byid: wigi khokham da" sheing: lhamdung: ri Estha jhang yhoin" kaid da:. Hau: thang: nyang: vang yhe: wigi hau: lhamdung: vhu" moo yhe: tain" da:.

³Khokham phoo gi «Khokham myhi' Estha we" ce: sei: bo la". Nang vho: ziri ngoo ri tid kyoo" la. Houg: lang" nga" mungdain: agung dayhi" nghoid loug we' nang shoug" yu wa» ga: myid: da:.

⁴Estha gi «Aseing: khokham vho: ngei nghoid rigi aseing: nang yo' Haman ri akhamyen re" eig yug shid re" soin' nyheing nyid da" zooshug pui" khyoo: nga" being" voo khyo" khi: nau da» ga: doem tid da:.

⁵Houg: lang" khokham phoo gi Estha da" being" voo bui" wa khyoo" Haman ri myab myab ri" wa shid re" amyeing" khyo' khe: kaid da:. Houg: yoomo khokham phoo yo' Haman gi Estha da" zoo: shug pui" khyoo: yhe: ago".

⁶Khokham phoo gi zabyid yhid: shug nyid uri «Nang vho: ziri ngoo ri tid kyoo" la. Houg: lang" nang yo" yu wa. Nga" mungdain: agung dayi" nang mho' nghoid rilang" nang ri ngoo byid: wa» ga: tid da:.

⁸«Aseing khokham nang wigi nga" mho' yoid thui: ri gyoo: byid: wa nghoid rigi nang yo' Haman shid re" ngoo doem nyheing wa zoo: shug pui" gootu: daloem: nghoid da" nab yo nyid" da" ayo, moo nga" being" voo re" bui" nhang: nau. Hau: uri ngoo vho: zi nang ri tid kyoo" wa» ga: doem tid da:.

⁹Haman gi zoo: shug pui" mo thu lo" ri nyang: gi myid pyo: nheugdeug nyid da:. Nghoid loug we' hau: thang: nyang: gi khokham vang" khoem" duang: moo Modekhai ri shau" myang da:. Modekhai gi nyang: so" lid: lo" ri phau" myang: zi ci: shug da" khyo" ato' yab lang" Haman gi nyang: ri nheig joem: yo: da:.

¹⁰Nghoid loug we' nyang: gi nya: myid ri zeing: lho: yhoem: khyoo: lo" da:. Hau: thang: nyang: gi nya: byencang" yiri nya: yhoem: khyoo: khe: zheing" yu lho: nya: yhoem: seing: myhi' Zaresha ri we' bo boo nhang: da:.

¹¹Nyang: gi houg: bang: ri nyang: jonu" khayhi' yo" khyoo:- yuggi zoo: kha myoo' yug yo" khyoo:- khokham pho wigi nyang: ri myhang: da" joyoo moo khasu" byid: too" byid: khyoo:- yo' khokham pho da" gyizoug: yi goo" bang: tho' khayhi' je yhouggyen: ziri phau: kyo" da:.

¹²Haman xo' tid zigi «Hau: tho' agoo" khokham myhi' Estha gi hang" dayug ri we' akoid byid: yu" da" zoo: shug pui" ri khokham phoo yo' ngoo ri koid byid: da:. Houg: lho: nga" tang: ri nab yo nyid" we' doem khe: too" shi" da:.

¹³Nghoid loug we' hau: Yuda byu Modekhai gi khokham kho" da" vang khyam: khoem" moo zhung: jo, ziri ngoo damyang nyid nyid gi he: myonhoo phung" yoeb- ziyoo jonu" gi nga" shid re" ce: dang: kang: aboo» ga: tid da:.

¹⁴Houg: yoomo nya: yhoem: seing: myhi' yo' nya: byencang" yi dangain" bang: gi «Nyhed xe: wim: pi: myhang: da" byu cu" said pyang" zeing da loem: nang koid ri agi rhe". Nab yo nyid" nab soin" Modekhai ri houg moo cu" lhang" said pyam wa shid re" khokham phoo ri nang yo" mho' zi nghoid. Hau: thang: zooshug pui" khyoo: pyoo: pyoo: za: nang yo" yhi: wa nghoid» ga: phajhi" coem' byid: ago". Haman gi he: ziri ge da" akhyoo" nghoid ga: shau" myid yoomo byu said pyang" zeing daloem: zhug nhang: da:.