Read Lashi ESTHA 6 Bible Online

ESTHA 6 - Lashi bible

ESTHA 6

¹Hau: myen jang: khokham phoo gi ayo" yhoeb yoomo hau: khokham mungdain: da" yung" lhid" xoem" joem ri ci: re" lho: nyang: ri nghab kyoo" wa shid re" amyeing" byid: da:.

²Nyangnu" nghab lo" da" du moo khokham phoo ri said pyam wa shid re" khokham yab joem ri zung" byid: da" unug eig yug nghoid da" Bigthana yo' Teresha tang: khoug: lheing: lheing: ziri Modekhai wigi shoug" pau: myang: byid: da" khyoo: bo da:.

³Khokham phoo gi «He: shid re" Modekhai ri ngoonu" khasu" ngi: shab lho: aphoug" jhungshug byid: boem bye: la"» ga: myid: da:. Nya: dei zoo: yigi «Nya: shid re" ci we' akoid byid: shi"» ga: tu" ago".

⁴Khokham phoo gi «Nga" gyizoug: yi dayug yug khokham kho" moo nyid go" la"» ga: myid: da:. Hau: uri shi" Haman gi khokham vang" khyoo: vang re" da:. Nyang: gi jen" jen" koid too" bye: da" byu said pyang" zeing moo Modekhai ri lhang" said pyam wa shid re" khokham phoo ri akhang" mho' wa ga: ju" re" zi nghoid da:.

⁵Houg: yoomo dei zoo: yigi «Hid: moo nang ri shoug" noug yoomo Haman lang" nyid da:» ga: tid ago". khokham phoo gi «Nyang: ri shu" vang ri" ge'» ga: tid da:.

⁶Houg: yoomo Haman vang loo" lang" khokham pho gi nyang: ri «Ngoo gye" ngi: shab byid: nau da" byu dayug nyid. He: yug shid re" ngoo khasu" koid ri gi wa lha"» ga: lhoem: myid: da:. Haman gi nyang: nya: gung ri «Akhid" khokham pho wigi houg yhi' ngi: shab byid: nau da" yug gi hang" se' nghoid wa la". Ngoo nyang: she' danghoid wa» ga: myid yu da:.

⁷Houg: yoomo nyang: gi khokham phoo ri «Hau: yug shid re" nanyang: void da" khokham byimi yu ri" byid: wa amyeing" khyo' kaid we'. Nanya: myang: gung tho' moo khokham zhung: da" too: ke" wa shid re" amyeing" khyo' we'.

⁹Hau: thang: hau: yug ri he: byisheing: joem foid byid: wigi nyang: ri vhu" shi: wa shid re" re" da" myhang: thang da" nheigboo ludaid dayug ri nhang: byid: we'. Hau: yug ri myang: tho' moo zhung: nhang: wigi voomoo" khoug: moo goem: sho' shu" so" yen" nhang: we'. Nyangnu" yhe: lo" uri nheigboo ludaid dayug gi ‹Khokham pho wigi ngi: shab byid: noug yug ri khasu" aphoug" jhungshug byid: ziri yu" ge'› ga: tid fu" baja"» ga: tid da:.

¹⁰Hau: thang: khokham phoo gi Haman ri «Byisheing: yo' myang: ri myab lo" yu lho: Yuda byu Modekhai ri he: ngi: shab byid: da" moo" dangain" soin' koid byid: we'. Nang phajhi" byid: zi ja: khang" moo" nyang: ri koid byid: we'. Khokham kho" vang" khyam: moo nyang: zhung: jo, ziri nang shau" myang wa» ga: tid da:.

¹¹Hougsu" yoomo Haman gi byisheing: joem yo' myang: ri she: yu lho: Modekhai ri byisheing: foid byid: da:. Modekhai gi myang: tho' moo do, zhung: wigi Haman gi nyang: ri voomoo" khoug: khyoo: shu" so" yen" zoo" ri «Khokham pho wigi ngi: shab byid: noug da" yug ri khasu" aphoug" jhungshug byid: ziri yu" ge'» ga: tid fu" da:.

¹²Hau: thang: Modekhai gi khokham vang" khyoo: doem tau" lo" lho: Haman gi sho' ziyo' myonhoo: ri nghoeb ci: wigi yhoem: khyoo: tau" lo" da:.

¹³Nyang: gi nyang: moo bue" lid lo da" khyoo: dangain" ri nya: yhoem: seing: myhi' yo' nya: byencang" yiri lo" tid kyo" da:. Hau: thang: nya: yhoem: seing: myhi' yo' hau: phajhi" bo da" nya: byencang" yigi nyang: ri «Nang gi Modekhai ri yoem: so' asoem" byid: pyam lo" nyid abye:. Nyang: gi Yuda byu dayug nghoid lho: nyang: ri nang ayo" oung: pyam wa. Nyang: gi nang ri gyeing" nyang: oung: pyam ri" wa» ga: coem' tid da:.

¹⁴Nyangnu" dang: doem go" nyid shi" uri khokham kho" mo unug bang: hain: hain: ju" re" wigi Haman ri Estha da" zooshug pui" khyoo: re" khe: lo" da:.