Read Lashi ESTHA 9 Bible Online

ESTHA 9 - Lashi bible

ESTHA 9

¹Khokham amyeing" khyo" lu dang: fu" to" da" bidnyid Adar lhammoo" khyab daxe: soem" nyid" nyid" moo Yuda byumyu" yi da" gyivoo yi wigi nyangnu" yoem so' yo' zei: pyam wa ga: myid lang" to" da" bidnyid ju" ri" bye:. Nghoid loug we' hau: gungthid Yuda byu yi wigi nyangnu" ri lhoem: zain: oung: pyam ago".

²Mungdain: khoug mo voomoo" khang" moo" mo Yuda byumyu" yi nyid da" voo mo Yuda byumyu" yigi nyangnu" ri khaid zain: loo wa mo, ri gyi lhoem: tau" khaid wa shid re" zeing: foem: nyid ago". Khyi' khang" moo" byu yigi nyangnu" ri gyoug lho: hang" dayug we' nyangnu" ri ayo" thougtheung nghoid ago".

³Gyeing" nyang: ga: ri mung" du gyizoug: yi mung" zoug: yi moo" pyo: vhoebkhang" zoug: yi yo' khokham pho da" gungthid lagyoo: dangain" bang: gi Modekhai ri gyoug lho: Yuda byumyu" yiri bo pang" ago".

⁴Modekhai gi khokham kho" moo yoem: so' gyi: da" byu dayug bue" nyid bye: ziyo' nyang: gi je je yoem: so' gyi: re" nyid ziri mungdain: goin" khyi' khang" moo" moo se' lho: myeing gyi: nyid da:.

⁵Houg: yoomo Yuda byumyu" yigi nyangnu" nau khyo" nyangnu" da" gyivoo yiri yo" koid ago". Nyangnu" gi shamcoin" ci: lho: houg bang: ri khaid said toem" pyam ago".

⁶Susa voomoo" zeing moo nyang: Yuda byumyu" yi wigi yuggi wim: shoo: yug ri said pyam ago".

⁷Houg bang: phung: moo Yuda byumyu" yi da" gyivoo Haman ga: da" Hammedatha da" nya: zo: da" nya: yuggi zoo: yi daxi: yug nghoid da" Parshadatha- Dalphan- Aspad- Poratha- Adalia- Aridatha- Parmashta- Arisai- Aridai- yo' Vaizatha bang: bo shid: ago". Nghoid loug we' lanyhoeb jonu" alhoid yu nghoid ago".

¹¹Hau: nyid" moo nyang: Susa moo said pyam da" byu khanhoo' yug nghoid ziri khokham phoo ri lu dang: kyoo" byid: ago".

¹²Hau: thang: nyang: gi khokham myhi' Estha ri «Susa moo za: Yuda byu yigi Haman da" yuggi zoo: yi daxi: yug bo boem wigi byu wim: shoo: yug ri said pyam abye: go". Mung" du joem cang nyangnu" ce: noem khasu" koid bye: go" la asi'. Nang akhid" ci: vho: la". Nang shoug" yu wa zi za: nghoid. Nang gootu: ci: vhoo: shi" ziri ngoo ri tid kyoo" la. Hau: zi nang yo" yu wa zi nghoid da» ga: tid

¹³Estha gi «Aseing: khokham nang myid vho: nghoid rigi Susa moo Yuda byumyu" yiri akhid" nyid" koid nhang: yhang: ti" nab yo nyid" we' doem koid nhang: shi" we'. Houg: lho: Haman da" yuggi zoo: daxi: yug da" manggung joem ri byu said pyang" zeing moo cu" lhang" too" nhang: we'» ga: tid da:.

¹⁴Khokham phoo gi he: ziri koid wa amyeing" khyoo' byid: da:. Houg: lho: Susa moo hau: amyeing" fu" dang: pyo: sain" kaid da:. Haman da" yuggi zoo: daxi: yug da" manggung joem ri voobyu yi da" shidkhoin" moo lang" to" da:.

¹⁵Adara lhoo xain" daxe: myid: nyid" nyid" ri Susa moo Yuda byumyu" yi dage" doem phung: foem: lho: hau: voomoo" khoug: mo byu soem" shoo: yug ri said pyam ago". Nghoid loug we' lanyhoeb jonu" alhoid yu nghoid da:.

¹⁶Mung" du joem moo we' Yuda byumyu" yi phung: foem: wigi nyangnu" nyang: goem: loem yu boem ago". Nyangnu" gi nyangnu" ri ngheing" da" byu nyhed moin wim: khyeing" yug ri said pyam lho: nyangnu" da" gyivoo yi lo, mo loid lo" ago". Nghoid loug we' nyangnu" gi lanyhoeb jonu" joem alhoid yu goo" nghoid da:.

¹⁷He: zigi Adora lhoo xain" daxe: soem" nyid" nyid" ri bue" zi nghoid da:. Thang: nyid" daxe: myid: nyid" nyid" gi byu asaid loo za: ngei pyoo: tung" zooshug pui" koid ago".

¹⁸Nghoid loug we' Susa mo Yuda byu yigi daxe: soem" nyid" yo' daxe: myid: nyid" nyid" moo byu said lho: daxe: wim: nyid" nyid" ri theing: yoomo hau: daxe: wim: nyid" nyid" ri Dougno: Bidnyid koid ago".

¹⁹Hougsu" yoomo voozoo: joem moo nyid da" Yuda byumyu" yigi Adara lhoo' xain" daxe: myid: nyid" nyid" ri ngei pyo: da" Dougno: Bidnyid yo' zoo: shug ayo, khyo" koid lho: nyang: cang" nyang: zooshug jhungshug gam byid: ago".

²⁰Modekhai gi he: bue" lo da" khyoo: joem ri lhid" xoem" too" nhang: lho: Persi mung" goem: sho' mo, jang" moo vi: moo: nyid da" Yuda byumyu" yiri mougsoug" foin: kaid nhang: da:.

²¹Nyangnu" ri zain khang" moo" Adara lhoo' xain" daxe: myid: nyid" nyid" yo' daxe: wim: nyid" nyid" gu: moo Dougno: Bidnyid khyo" cang koid nhang: ago".

²²He: bidnyid gu: gi Yuda byumyu" yi nyangnu" da" gyivoo yi lo, mo loid byoin yu da" bidnyid nghoid da:. He: lhoo' khyab gi koug shui: ziyo' nheigloem: thang jang" mo ngei pyo: ziyo' myid pyo: da" bidnyid khyoo: phug lo" da" lhoo' khyab nghoid da:. Nyangnu" gi he: bidnyid gu: moo zoo: shug pui" koid wigi nyang: cang" nyang: yo' myung: shoo" bang: ri zooshug jhungshug gam byid: ca" ga: jhoug" shid" to" da:.

²³Houg: yoomo Yuda byumyu" yigi Modekhai jhoug" shed to" da" khyoo: ri cang wigi hau: pui" gi zain khang" moo" mo thung" ri daloem: bue" lo bye:.

²⁴Yuda byumyu" yi da" gyivoo- Agag da" amyed ashen- Hammedatha da" yuggi zoo: Haman gi Yuda byumyu" yiri said toem" pyam wa bidnyid khyen: uri (Nyangnu" Purim ga: myheing da:.) me" lab da:. Nyang: gi nyangnu" ri jhoid za: said toem" pyam wa soin' to" da:.

²⁵Nghoid loug we' Estha gi khokham pho jhang yhe: lho: khokham phoo khyoo" amyeing" lhid" pyoo: nhang: yoomo Haman gi nyang: wigi Yuda byumyu" yi shid re" nyheing soin' to" da" vhu" pi: lo, kyo' moo shoug" loem zo: da:. Nyang: yo' nya: da" yuggi zoo: yigi byu said pyang" zeing moo cu" lhang" said pyam zi shoug" ago".

²⁶Houg: yoomo hau: Dougno: Bidnyid eig nyid" ri Purim ga: myheing da:. Hau: soug" cab' gi «Me" lab» ga: zi nghoid. Modekhai da" mougsoug" yoomo yo' nyangnu" moo bue" lo da" moo" zoo" dangain" yoomo

²⁷Yuda byumyu" yigi nyangnu" nya: shid re" nyangnu" da" amyed ashen yi shid re" yo' Yuda byumyu" bue" lo da" yugkhang" moo" shid re" zain khang" moo" nya: ayo, ju" lo lang" he: eig nyid" ri Modekhai da" jhoug" shid khyoo: ri cang wigi main: main: cang wa thung" ri daloem: koid to" ago".

²⁸Mung" du khang" moo" yo' voomoo" khang" moo" moo nyid da" ju" loo wa da" byuxeig khang" moo" mo Yuda yhoemkhung: yi khang" moo" gi ju" loo wa da" ayo, dangain" moo Purim bidnyid eig nyid" ri myid boin wigi cang nyid wa shid re" myid veing" dang: theing khyo' to" ago".

²⁹Hau: thang: Abihala da" myiyi: zoo:- khokham myhi' Estha we' Modekhai bo wigi xang: shi" mo Modekhai lhid" lid loo bye: da" khyoo: Purim yo' sen: wigi mougsoug" dakhyab ri nya: amyeing" akhang" byeung" byeung" ci: lho: lhid" pyoo: kaid da:.

³⁰Hau: mougsoug" gi Yuda byumyu" dangain" ri yeing lho: lhid" zi nghoid wigi hau: mougsoug" yang: je: joem ri Persi mungdain: mo mung" du 127 loem khyoo: foin: byid: kaid da:. Hau: mougsoug" moo Yuda byumyu" yi yug yoo tung" yo' goem loem zi shoug" yu wa shid re"

³¹Houg: lho: Yuda yi yo' nyangnu" da" amyed ashen yi khyo" kougshu: da" bidnyid moo cang yhi: ca" da" tarha" ri yu" lho: lheig yu ziyo' dakhyo" Purim bidnyid eig nyid" ri nya: ayo, moo cang koid ca" ga: lhid" to" da:. He: ziri Modekhai yo' Estha eig yug goin" wigi amyeing" khyo' kaid zi nghoid.

³²Estha da" amyeing" dang: yo' Purim shid re" tarha" ri geing: teing nhang: ziyo' mougsoug" deing: moo lhid" xoem" to" ago".