Read Lashi THU' LO" MOUGSOUG" 15 Bible Online

THU' LO" MOUGSOUG" 15 - Lashi bible

THU' LO" MOUGSOUG" 15

¹Hau: thang: Moshe yo' Israela byumyu" yigi he: jikhoin" yo' ASEING ri coung" nyid. «Ngoo ASEING ri jikhoin" khoin" wa. Ciwim gari phung" yoeb yo' oung: doid khyoo: ri yo" yu su: nghoid. Nyang: gi myang: joem yo' myang: jui: mo, ri thoem" khyoo: du" zei pyam bye:.

²ASEING gi nga" yoem: bo thang da" goem loem su: nghoid. Nyang: gi ngoo ri khyoid yu su: nghoid. Nyang: gi nga" Mangsoo nghoid yoomo ngoo nyang: ri coung" nghei wa. Nga" pho da" Mangsoo nghoid yoomo nya: gyi: sheung: khyoo: ri ngoo jikhoin" khoin" wa.

³ASEING gi gyi sarhi' zoug: nghoid. ASEING ein: zigi nya: myeing nghoid.

⁴«Nyang: gi Egutu mo gyidab yo' gyimyang: rheing" joem ri panglai: khyoo: she: khyoo' bye:. Ge thang da" moo" voin mo, ri we' Thoem" Ni moo nhoeb said pyam bye:.

⁵No, da" panglai: yo' nyangnu" ri nghoeb pyam bye:. Nyangnu" gi lug boem daloem: yhang: ti" athi" khyoo: vang loo" bye:.

⁶«ASEING we"- re" lo, yo lo, gi gyoug pho" da" yoem: so' nghoid da:. Hau: zigi gyivoo ri adu du yo" khyau" pyam bye:.

⁷Re" gyivoo joem ri re" phung" yoeb wigi yu did aboo loo: sho' nang khyo' pyam byid: bye:. Re" da" nheig yo: zigi nyangnu" ri khoofoo: yhang: ti" nge" joem: pyam nhang: bye:.

⁸Nang panglai: ri moid wigi gyid myhang: do, loo nhang: lho: hau: zigi pyiyam yhang: ti" yab jen boem ago". Panglai: mo no, thang joyoo moo myidkeing: doem: bue" loo bye:.

⁹Gyivoo gi ‹Ngoo nyangnu" ri cang khaid wigi nyangnu" ri myheig wa. Ngoo nyangnu" ziyoo ri kho' yu wigi ngoo vho: gu: dangain" yu wa. Ngoo nga" sham: ri she: wigi nyangnu" mo jo, gu: dangain" yu wa› ga: tid.

¹⁰Nghoid loug we' ASEING we" re" so' dalheing: moid thu kaid lang" Egutu byumyu" yiri noeb shid: nhang: bye:. Nyangnu" gi yu" gyoug yu" lhung: da" gyid khoug: khyoo: xuid: yhang: ti" noeb loo" bye:.

¹¹ASEING we"- yu phara joem moo nang yo' du zi hang" nyid wa lha". Gyeung" shang: jang" moo mau" pho" da" nang gi hang" yo' du wa lha". Re" da" mau" pho" moo" zoo" yo' gyi: sheung: moo" zoo" ri nang yo' dakhyo" hang" yo" koid wa lha".

¹²Nang re" lo, yo lo, dain: kaid lang" mougmyid gi ngoonu" da" gyivoo joem ri myhau: pyam bye:.

¹³Re" dangsoo" khoin" moo: dang: zung" ziyo' nang khyoid yu bye: da" byumyu" yiri nang vhu" she: loo bye:. Re" gyeung" shang: mung" khyoo: re" yoem: vhu" yo' nyangnu" ri nang vhu" she: loo bye:.

¹⁴Byumyu" yi shau" gyo: wigi gyoug dain nyid ago". Philisti byumyu" yi gyoug dain nyid ago".

¹⁵Edom vhujhung: yi gyoug dain nyid ago". Moba sarhi' yi gyoug nain" nyid ago". Khanan byumyu" yigi nyangnu" da" voem" da" myid byug byug ago".

¹⁶Gyug ziyo' dain zigi nyangnu" adang moo ju" loo bye:. O" ASEING we" re" yoem: so' ri nyangnu" myang bye:. Nang join mo loid byoin kaid bye: da" Re" byumyu" yi bain byung: sho' dain moug" yab jo, nhang: bye:.

¹⁷Nang gi nyangnu" ri shu" vang lo" wigi ASEING we"- re" yhoem: shid re" nang khyen: to" da" joyoo- nanyang: koid to" da" Noku Yhoem: Moo"- Re" boem tho' moo: nyangnu" ri nyid nyid nhang: bye:.

¹⁸ASEING nang gi apyaid atoo: khokham nghoid nyid baja" o"»

¹⁹Israela byumyu" yi panglai: moo myidgung cen: khyo" lid phyed loo" bye:. Nghoid loug we' Egutu byumyu" yi gyimyang: rheing" we' nyangnu" myang: joem we' myang: jui: mo, we' panglai: khyoo: vang yhe: uri ASEING gi gyid ri doem tau" nhang: wigi nyangnu" ri nhau pyam bye:.

²⁰Arun da" nya: bi: lapi: myhi' Miriam gi nya: da" zeing yu da:. Myiyi: yi dangain" we' nya: thang: cang lho: zeing baid lho: go" nyid ago".

²¹Miriam gi «ASEING ri jikhoin" khoin" wa. Ciwim gari nyang: gi phung" yoeb yo' oung: doid khyoo: ri yo" yu su: nghoid. Nyang: gi myang: joem yo' myang: jui: mo, ri panglai: khyoo: du" zei pyam bye:» ga: nyangnu" shid re" jikhoin" khoin" byid: da:.

²²Hau: thang: Moshe gi Israela byumyu" yiri Thoem" Ni mo zi Shura dain" pyoid yoo khyoo: shu" yhi: lo" da:. Dain" pyoid yoo mo soem" nyid" soo" nghoid loug we' nyangnu" gyid amyang nghoid ago".

²³Hau: thang: Mara ga: myheing da" joyoo khyoo: nyangnu" ju" lo ago". Nghoid loug houg moo yau da" gyid gi ayo" shug loo: sho' kho" da:. Hougsu" yoomo hau: ziri Mara ga: myheing ago".

²⁴Byumyu" yigi Moshe ri myeing" myo: wigi «Ngoonu" gyid ce: shug wa» ga: myid: ago".

²⁵Moshe gi ASEING jhang akyu" mho' lang" ASEING we' nyang: ri seigdu dadu toin" shed wigi hau: ziri nyang: gyid moo du" kaid lang" yo" shug da" gyid bue" loo bye:. Hau: joyoo moo ASEING gi nyangnu" ri cang yhe: wa tarha" ri byid: wigi jham" ca: yu" da:.

²⁶Nyang: gi «Ngoo jo ein: koid ziri nanu" phau" myang: wigi nga" amyeing" dang: ri cang yhe: nghoid rigi ngoo nanu" ri Egutu byumyu" yiri tab byid: da" noophyoo" joem yhang: ti" yooboo dam abyid: wa nghoid. Ngoo nanu" ri noophyoo" mo gi nhang: da" ASEING nghoid» ga: tid.

²⁷Thang: ri nyangnu" gi gyid bug daxe: eig duang: jo, wigi thab gam nyhed xi: gam jo, da" Elim moo ju" lho: nyangnu" hau: gyid yam moo theing: ago".