Read Lashi THU' LO" MOUGSOUG" 16 Bible Online

THU' LO" MOUGSOUG" 16 - Lashi bible

THU' LO" MOUGSOUG" 16

¹Israela byumyu" phung: goin" Elim mo thu lo" wigi nyangnu" Egutu mo thu lo zi lhammoo" eig khyab daxe: wim: nyid" ju" uri Elim yo' Sina boem agyoo: moo jo, da" Sin dain" pyoid yoo khyoo: nyangnu" ju" lo ago".

²Hau: dain" pyoid yoo moo nyangnu" dangain" gi Moshe yo' Arun ri myeing" myo: wigi

³«ASEING ngoonu" ri Egutu moo said pyam wa ziri ngoonu" je" vho:. Hougmoo: neing: thang gi ngoonu" zhung: jo, wigi shoo" yo' gootu: zoo: shug ri ngoonu" vho: da" nhoo' shoug" zo: zi nghoid. Nghoid loug we' he: dain" pyoid yoo moo zooyoid wigi ngoonu" dangain" shid: wa shid re" re" tang: ngoonu" ri shu" thu lo abye:» ga: tid ago".

⁴ASEING gi Moshe ri «Akhid" ngoo gi nanu" dangain" bang: shid re" mougkhung: mo zoo: shug vo khyoo' byid: wa. Byumyu" yigi nyid" khang" nyid" yhe: wigi hau: nyid" shid re" gi" koo: koid: yu wa zi nghoid. He: khyoo: khyo" wigi nyangnu" nga" jhoug" shid khyoo: ri cang ago" la' ein: ziri ngoo yo" jham" ca: yu" wa zi nghoid.

⁵Khyug nyid" nyid" rigi nyid" khang" nyid" koid: tho' mo nanu" eig tu je myo: koid: wigi hau: ziri nyeing" so' koid too" ca" wa zi nghoid» ga: tid.

⁶Houg: lang" Moshe yo' Arun gi Israela byumyu" yi dangain" ziri «ASEING nanu" ri Egutu mo shu" lo ziri akhamyen nanu" si' goo" wa.

⁷Nab soin: ri nanu" ASEING phung" yoeb bang ziri myo kyoem: sho' shau" myang wa. Nyang: ri thougtheung wigi nanu" da" myeing" myo: khyoo: ri nyang: shoug" gyoo: bye:. Nghoid loug nyang: ri thougtheung abye:. Ciwim gari nga" tang: gi nya: jhoug" shid khyoo: ri za: dayo" tid kyo"» ga: tid.

⁸Hau: thang: Moshe gi «Nanu" nyang: ri khayi' myeing" myo: ziri nyang: shoug" gyoo: yoomo nanu" shid re" myen" thang: zoo: wa shid re" shoo" yo' nab soin: nanu" vho: nhoo' zoo: wa shid re" zoo: noem ASEING byid: wa zi nghoid. Nga" tang: ri nanu" myeing" myo: zigi ASEING ri myeing" myo: zi nyang: nghoid bye:» ga: tid.

⁹Moshe gi Arun ri «Nanu" myeing" myo: da" dang: khoin" ri ASEING shau" gyo: bye: yoomo ASEING shidkhoin" moo shava byu dangain" re" foem: yab jo, ge' ein: tid wa» ga: tid.

¹⁰Houg yo' dakhyo"- Arun gi shava byu yiri dang: tid kyo" nyid uri nyangnu" dain" pyoid yoo khyoo: yu" kaid ri nyeigdain tung" jhoemmoug" khoug: mo ASEING da" phung" yoeb gi bang thu loo da:.

¹¹ASEING gi Moshe ri

¹²«Israela byumyu" yi myeing" myo: ziri ngoo shoug" gyoo: bye:. Myen" thang: nanu" shid re" shoo"- nab soin: nanu" vho: nhoo' zooyho' ri shoug" zoo: wa zi nghoid ein: tid we'. Houg: lang" ngoo ASEING gi nyangnu" Mangsoo nghoid ziri yo" si' wa» ga: tid.

¹³Myen" thang: ri ngho' tu' phung: moo" joem dang: lo wigi dab moo byeung" sho' lo nghoeb pyam wigi nab soin: rigi dab nooyoo dangain" jang" moo nghain: jhu" gyo" jo, da:.

¹⁴Nghain: jhu" ngei" bei: pyam lang" hau: dain" pyoid yoo moo poo" poo" apug pug zi daja: jo, da:. Hau: zigi nghain: khi' yhang: ti" nu" nham' nyid da:.

¹⁵Israela byumyu" yi hau: ziri myang lang" ce: noem nghoid zi nyangnu" asi' yoomo nyang: cang" nyang: «Ce: noem nghoid» ga: myid: go" nyid boem da:. Moshe gi nyangnu" ri «He: zigi nanu" zoo: wa shid re" ASEING byid: da" zoo: noem nghoid.

¹⁶Nya: yhoem: byu yiri yu" lho: gi" koo: dayug shid re" dabye: bye: nyang: yug nyang: koid: yu baja" ga: ASEING amyeing" byid: to"» ga: tid.

¹⁷Israela byumyu" yi hougsu" koid ago". Dayham" gi jain" sho' koid: wigi dayham" gi neung: neung: koid: yu ago".

¹⁸Nyangnu" hau: ziri leig yu" wigi gye" myoo: sho' we' anghoid- gye" neung: sho' we' anghoid- nyang: yug nyang: ge" myhoo' toeb za: dakuid: yu ago".

¹⁹Moshe gi nyangnu" ri «Dayug we' hau: ziri nab kyoo' shid re" ayo" to" too" wa» ga: tid.

²⁰Nghoid loug we' dayham" bang: gi Moshe dang: atam" gyoo: looza: hau: ziri teing to" ago". Hau: zigi thang: nab soin: ri lugdung: bue" wigi boeb nam nyid wigi nyangnu" ri Moshe wigi nheig yo: da:.

²¹Nab soin: khang" moo" nyang: tu: nyang: gi" wa myhoo' koid: yu bye:. Bid myhang: lo ziyo' loung loo lang" myidjang tho' moo ayeung bue" lo" byug bye:.

²²Khyug nyid" nyid" rigi eig tu khyo" wigi dayug shid re" eig bye: bye:- nyangnu" koid: yu ago". Shava phung: mo vhujhung: yi dangain" we' Moshe jhang re" wigi hau: khyoo: ri re" tid kyo" ago".

²³Houg: lang" nyang: gi nyangnu" ri «Nab kyoo' gi nya: shid re" shugbyid: to" da" gyeung" shang: Dougno: Bidnyid nghoid. Nanu" zooyho' bung: ca" zi akhid" nyid" bung: ge'. Nanu" poo" ca" zi akhid" nyid" poo" ge'. Deung ziri nab kyoo' shid re" to" too" ge' ga: ASEING amyeing" byid: to"» ga: tid.

²⁴Nyangnu" gi Moshe amyeing" byid: ziyo' dakhyoo" ti" thang: nab ju" sho' to" too" nghoid loug we' hau: zigi boeb, we' aboeb lugdung we' aboo nghoid da:.

²⁵Moshe gi «Hau: ziri akhid" nyid" zoo: ge'. Ciwim gari akhid" nyid" gi Dougno: Bidnyid ein: da" ASEING shid re" shugbyid: to" da" nyid" nghoid nyid. Nanu" zoem" pain' moo ce: zoo: noem we' myang wa zi anghoid.

²⁶Nanu" khyug nyid" ju" sho' zoo: noem koid: zheing" wa zi nghoid. Dougno: nyid" ein: da" nyhed nyid" nyid" rigi hau: zi jo, zi anghoid» ga: tid.

²⁷Nyhed nyid" nyid" ri dayham" gi zoo: noem koid: zheing" wa shid re" tunggung khyoo: thu yhe: nghoid loug we' nyangnu" ci: we' amyang goo" nghoid da:.

²⁸Hau: thang: ASEING gi Moshe ri «Re" byu yi khamyhang ju" sho' nga" amyeing" dang: ri ngeig pyam nyid shi" goo" wa la".

²⁹Ngoo ASEING gi nanu" ri Dougno: Bidnyid byid: too" bye:. Hau: khyug nyid" nyid" ri ngoo nanu" ri eig nyid" shid mo gi" koo: zoo: noem ri khanham we' byid: too" bye:. Yugkhang" moo" nyhed nyid" nyid" rigi theing: ca" ziyo' nya: yhoem: pain' khyoo: age thu ein: ziri boin: so" nyid ge'» ga: tid.

³⁰Hougsu" yoomo byumyu" yigi nyhed nyid" nyid" ri moo" azei: goo" nghoid ago".

³¹Israela byumyu" yi hau: zoo: noem shug phoo" ri Manna ga: myheing ago". Hau: zigi bang: bang: phyu: da" seig shi" zoo: yhang: ti" du wigi byooyhid: yo' koid da" zooyho' poo" zoo: yo' xoin" so' du da:.

³²Moshe gi «ASEING da" amyeing" dang: gi Manna zooyho' dayham" ri nyha" amyed ashen yi shid re" teing shoung: too" we'. Hougsu" lang" nyang: ngoonu" ri Egutu mo shu" thu lo uri dain" pyoid yoo moo nyang: ngoonu" ri byid: zho" da" zoo: noem nghoid ein: ziri nyangnu" yo" myang si' goo" baja"» ga: tid.

³³Moshe gi Arun ri «Yam: nu" yu wigi Manna zooyho' myid: kug kaid lo: zoo: yi du yi shid re" ASEING shidkhoin" moo to" too" we'» ga: tid.

³⁴ASEING wigi Moshe ri amyeing" byid: yhang: ti" Arun gi hau: ziri Dang: Theing Kuid: shidkhoin" khyoo: ci: yhe: wigi yhe: shoung: to" da:.

³⁵Israela byumyu" yi nyangnu" nyid wa da" Khanan mung" ju" sho' myid: xi: zain nyang: manna zooyho' ri zo: ago". (

³⁶Hau: zigi tarha" vang akyug leig da" jang yo' leig ri shed joid: bo da:.)