Read Lashi THU' LO" MOUGSOUG" 19 Bible Online

THU' LO" MOUGSOUG" 19 - Lashi bible

THU' LO" MOUGSOUG" 19

¹Israela byumyu" yi Rephidim mo thu yhe: lo" wigi Egutu mo thu lo thang: lhammoo" soem" khyab ein: da" xang: shi' nyid" ri Sina dain" pyoid yoo khyoo: ju" yhe: lo" ago". Sina boem khyid: moo nyangnu" theing: wigi

³Moshe gi Mangsoo yo' shoug" goo" wa shid re" boem khyoo: do, lo" abye:. ASEING gi nyang: ri boem mo khe: wigi Yaku da" amyed ashen yi nghoid da" Israela byumyu" yiri

⁴«Ngoo ASEING gi Egutu byumyu" yiri khasu" koid loo bye: ziri we' zoin gi nya: zoo: ri nya: dung yo' shu" dang: yen" yhang: ti" ngoo nanu" ri shu" loo bye: ziri we' nanu" myang ago".

⁵Akhid" nanu" nga" dang: tam" gyo: wigi nga" dang: theing ri cang nghoid rigi nanu" gi nga" byumyu" nghoid wa. Mougmyid gyab, goin" gi nga" zi nghoid loug we' nanu" rigi ngoo khyen: to" da" nga" byumyu" yi nghoid wa.

⁶Nga" shid re" za: shugbyid: to" da" byumyu" yi nghoid wa. Houg: lho: khainjung yi khyo" nanu" gi ngoo ri dei byid: loo goo" wa ein: tid we'» ga: nyang: ri tid da:.

⁷Houg: lang" Moshe gi gyoo" lo wigi byumyu" yi da" vhujhung: yiri khe: yu lho: ASEING nyang: ri amyeing" byid: da" gu: dangain" ri nyangnu" tid kyo" da:.

⁸Hau: thang: byumyu" yigi «ASEING tid zi ja: khang" moo" ri koid wa» ga: dage" phug tid bye: ziyo' Moshe gi hau: ziri ASEING ri doem tid kyo" da:.

⁹ASEING gi Moshe ri «Ngoo yo' nang dang: tid go" ziri shau" gyo: lho: nang ri akhid" mo thu: gu: loem jeing" nyid baja" jhoemmoug" thei" zeing khyo" ngoo re" jhang khyoo: ri" wa nghoid» ga: tid. Moshe gi ASEING ri byumyu" yi tid boem ziri lo" tid kyo" da:.

¹⁰ASEING gi nyang: ri «Byumyu" yi jhang gyoo" yhe: wigi nyangnu" ri noku coung" nghei wa shid re" akhid" nyid" yo' nab yo nyid" nyangnu" nyang: gung ri kyeing sain goo" baja". Nyangnu" nyang: mi byi: ri we' cid" lho:

¹¹Soem" nyid" ein: nyid" ri soin' nyheing too" ca" ago". Houg nyid" ri byumyu" yi dangain" ngoo ri yo" myang sho' Sina boem khyoo: ngoo gyo" loo wa.

¹²Byumyu" yi ayo" lid wa shid re" boem lheing khab' kyoo" koid wigi xoem" to" lho: nyangnu" ri boem khyoo: ado, loo wa anghoid lang" hau: jhang khyoo: tab lang" atab' yhi: wa shid re" tid we'. Hug moo: zang" nang: su: kha: yug nghoid loug we' said pyam zi shoug" ca" wa.

¹³Nyang: ri luggo, yo' du"- anghoid lang" myoo: yo' beig ca" da:. Nyang: ri hang" we' azang" tain" goo". Byu yo' gougnyhoug eig ja: goin" zi hid: su" koid wigi nyangnu" ri said pyam ca" da:. Nghoid loug we' laboo" myeing thang: ri byumyu" yi boem khyoo: do, loo wa zi nghoid ga: tid bye:.

¹⁴Hau: thang: Moshe gi boem khyo" gyoo" re" wigi byumyu" yiri noku ku wa shid re" soin too" ge' ga: re" tid. Hougsu" yoomo nyangnu" we' nyangnu" da" byimi ri cid" yung" cid" lho' ago".

¹⁵Houg: lho: Moshe gi nyangnu" ri «Soem" nyid" ein: nyid" ri soin' nyheing too" ge'. hau: ayo, khoug: moo myiyi: yuggi gung shoo" zoem" khyoo: ri akoid goo"» ga: tid.

¹⁶Soem" nyid" ein: da" nab soin: ri mouggoem: goem:- moug lab' myeig- boem gung moo jhoemmoug" pung zeing thu re" wigi laboo" thui: zeing mhoid zi shoug" gyoo: bye:. Byumyu" yi dangain" gi zoem" khoug: moo dain wigi nain" nyid ago".

¹⁷Moshe gi Mangsoo yo' shu" shoug" wa shid re" zoem" mo nyangnu" ri shu" thu lo wigi nyangnu" we' boem khyid: moo yab jo, ago".

¹⁸ASEING gi myiyham: deing: yo' Sina boem khyoo: gyoo" ri" yoomo boem dangain" jang" moo myikhoug" yo' nghoeb pyam bye:. Myikhoug" gi myikhyoem' moo" mo myikhoug" yhang: ti" do, lo" nyid wigi byumyu" yi dangain" gye" gyoug nain" nyid ago".

¹⁹Laboo" thui: gi gyi: tho' moo gyi: lo nyid. Moshe tid lang" Mangsoo gi mouggoem: thui: yo' doem phug tid bye:.

²⁰ASEING gi Sina boem gung khyoo: gyo" re" wigi boem gung mo Moshe ri re" khe: kaid bye:. Moshe do, lo" lho: wigi

²¹ASEING gi nyang: ri «Gyoo" lo" wigi byumyu" yiri kyoo" koid to" jang" moo alid ri" wa shid re" yo' ngoo ri ayu" wa shid re" lo" tid poin" byid: we'. Nyangnu" hougsu" koid nghoid rigi nyangnu" myoo: sho' shid: goo" wa.

²²Nga" jang" moo re" da" khainjung yi lang" nyang: yug nyang: gung ri kyeing sain pyam ca". Anghoid rigi nyangnu" ri ngoo yooboo dam byid: wa zi nghoid» ga: tid.

²³Moshe gi ASEING ri «Byumyu" yi ayo" do, loo goo" wa. Khasu" wim gari nang gi ngoonu" ri gyeung" shang: da" boem khyo" myid to" lho: hau: lheing khab' moo kyoo" koid too" wa shid re" amyeing" byid: to" da» ga: tid.

²⁴ASEING gi «Gyoo" yhe: wigi Arun ri nang yo' dage" yhe: shu" do, loo we'. Nghoid loug we' khainjung yi yo' byumyu" yigi kyoo" ri lid: wigi nga" jang" moo yo" do, loo zi anghoid. Hougsu" anghoid rigi nyangnu" ri ngoo yooboo dam byid: wa» ga: tid.

²⁵Hau: thang: Moshe gi byumyu" yi jhang khyoo: gyoo" lo" wigi ASEING tid ziri nyangnu" ri yhe: tid kyoo" bye:.