Read Lashi THU' LO" MOUGSOUG" 2 Bible Online

THU' LO" MOUGSOUG" 2 - Lashi bible

THU' LO" MOUGSOUG" 2

¹Hau: ayo, moo Levi kung: mo byu dayug gi nyang: nya: byu kung: mo myiyi: dayug ri lo, xo' yu da:.

²Hau: myiyi gi nya: shid re" yuggi zoo: dayug khu: byid: da:. Hau: myiyi: gi hau: zoonu" gye" yung" ziri myang lang" nyang: gi hau: zoonu" ri lhammoo" soem" khyab shoung: to" da:.

³Nghoid loug we' hau: zooshang: ri nyang: ayo" shoung: too" loo: lang" nyang: gi gyidpheing" gam wigi koid to" da" gyoin daloem ri yu lho: hau: ziri gyid ayo" vang wa shid re" nhi" gyoid jhid da:. Nyang: gi zoonu" ri hau: gyoin khoug: moo kaid lho: gyid yam mhain" pung yoo moo yhe: to" to" da:.

⁴Hau: zoonu" da" nya: bi gi hau: zoonu" ci bue" ziri yu" wa shid re" atung" ve: da" joyoo moo ye: yab jo, da:.

⁵khokham da" myiyi: zoo: gi gung cid" wa shid re" gyid lang khyoo: gyoo" yhe: lho: nya: da" dei zoo: myhi' yigi gyid yam moo so" nyid ago". Nyeigdain tung" nyang: gi mhain" phung khoug mo gyoin ri shau" myang wigi hau: ziri join myhi' dayug ri yu nhang: da:.

⁶khokham nu" gi hau: gyoin ri phang kaid lho: yuggi nu" ri myang da:. Hau: zoonu" gi ngau nyid lho: khokham nu" gi nyang: ri nheig yu" khyeug da:. Houg: lho: nyang: gi «He: zigi Hebre zoonu" dayug nghoid da» ga: tid da:.

⁷Hau: thang: zoonu" da" nya: bi gi khokham nu" ri «Re" shid re" zoonu" ri coung: byid: wa Hebre myiyi: dayug ri ngoo yhe: khi: byid: ca" wa rhe"» ga: myid: da:.

⁸khokham nu" gi «Jeju" khyo" yhe: khe: loo we'» ga: tid. Houg: yoomo myiyi: nu" gi zoonu" nya: myhi' ri nyang: lo" khe: loo byid: da:.

⁹Khokham nu" gi hau: myiyi: myhi' ri «Hau: zoonu" ri shu" lo" wigi nga" shid re" lo" coung: byid: la. Nang ri ngoo aphoug" byid: wa» ga: tid da:. Houg: yoomo hau: myiyi myhi' gi hau: zoonu" shu" yu lho: nyang: ri coung: da:.

¹⁰Hau: thang: ri zoonu" dajhi' gyi: loo lang" nyang: ri khokham da" myiyi: zoo: jhang khyoo: shu" yhe: da:. Khokham nu" gi nyang: ri nya: zoo: aseing: khyo" coung: yu da:. Khokham nu" gi «Ngoo gi nyang: ri gyid mo xue: yu zi nghoid yoomo nyang: ri Moshe ein: myheing wa» ga: nyang: nyang: tid zo: da:.

¹¹Moshe gyi: loo lang" nyang: gi nya: Hebre byumyu" yi jhang lam" yhe: wigi nyangnu" ri moo" khasu" doin: zeig koid nhang: zi shau" boem ziri nyang: shau" myang da:. Nyang: gi Egutu byu dayug gi Moshe da" byumyu" yi mo dayug nghoid da" Hebre byu dayug ri said pyam ziri lang" yhe: myang da:.

¹²Moshe gi lheing khoem yu" lho: hang" ayu" nyid ziri shau" myang lang" nyang: gi Egutu byu dayug ri said pyam lho: nya: mang ri midcoo: boem" moo myhoeb pyam da:.

¹³Thang: nyid" we' nyang: gi doem tau" yhe: lho: Hebre byu eig yug thoin: go" nyid ziri yhe: myang da:. Nyang: gi shoid da" yug ri «Nang gi nanya: Hebre byencang" phoo ri ciwim baid nyid la"» ga: tid da:.

¹⁴Hau: yug gi «Nang ri hang" wigi nga" eig yug da" vhoebkhang" su: yo' tarha" agyi koid nhang: to" la". Nang gi Egutu byu ri said ziyo' dayhang: ti" ngoo ri we' said pyam wa rhe"» ga: tid da:. Hau: thang: Moshe gi gyoug wigi «Ngoo koid da" khyoo: ri byu joem si' bye: goo" nhung» ga: nyang: nyang: za: tid da:.

¹⁵Bui" bye: da" khyoo: ri khokham phoo shoug" gyoo: lang" nyang: gi Moshe ri said pyam wa soin' da:. Nghoid loug we' Moshe gi phang: loid lo" wigi Median mung" moo yhe: nyid da:. Danyid" nyid" ri Moshe gi gyid thung" daloem: anam moo zhung: jo, uri Median khainjung phoo Yethru da" myiyi: zoo: nyhed yug gi gyid re" kham: yu wigi nya: tang: ho' yi da" nya: pho yang yo' coidbaid joem shid re" thung" lhang" joem moo kaid byid: ago".

¹⁷Nghoid loug we' yang zung" bang: dayham" gi Yethru da" myiyi: zoo: yiri khaid pyam ago". Houg: lang" Moshe gi nyangnu" ri yhe: pang" yu lho: nyangnu" gougnyhoug joem ri gyid kham: jhug byid: da:.

¹⁸Nyangnu" gi nyangnu" da" nya: pho jhang doem tau" loo" lang" nyang: gi «Akhid" nyid" nanu" ciwim yoomo gye no, lho: tau" loo go" la"» ga: myid: da:.

¹⁹Nyangnu" gi «Egutu byu dayug yug yang zung" bang: lo, mo khyoid yu byid: lho: nyang: gi ngoonu" ri gyid lang" kham: byid: wigi ngoonu" da" gougnyhoug joem ri gyid kham: jhug da"» ga: tu" ago".

²⁰Nyang: gi nya: myiyi: zoo: yi ri: «Nyang: khayoo: la"- nanu" ciwim yoomo nyang: ri houg moo nyhid: too" khoo' go" la". Ngoonu" yo' dage" zoo: wa shug wa shid re" nyang: ri yhe: khe: loo ge'» ga: tid.

²¹Houg: yoomo Moshe gi houg moo nyid wa myid veing" da:. Yethru gi nya: myiyi: zoo: Ziphora ri lo, xo' byid: wigi

²²Ziphora gi Moshe ri yuggi zoo: dayug khu byid: da:. Moshe gi «Ngoo gi he: mung" moo being" voo dayug bue" nyid- houg: yoomo ngoo gi nyang: ri Gershom ein: myheing wa» ga: nyang: nyang: za: tid da:.

²³Zain nyid myang" sho' thang: ri Egutu khokham phoo gi shid: lo" byug da:. Nghoid loug we' Israela byu yigi nyangnu" da" join bui" nyid da" akhoug: moo nookyeing" kyeing" nyid shi" yoomo pang" thoug yu wa shid re" mho' yoid nyid ago". Nyangnu" mho' yoid thui: gi Mangsoo jhang ju" do, lo" wigi

²⁴Mangsoo gi nyangnu" da" nookyeing" thui: ri gyoo: byid: wigi Abraham- Isag- Yaku yo' to" da" nya: dang: theing ri myid boin: byid: da:.

²⁵Nyang: gi join bue" nyid da" Israela byu yiri shau" myang lho: nyang: gi nyangnu" shid re" bo myid byid: da:.