Read Lashi THU' LO" MOUGSOUG" 22 Bible Online

THU' LO" MOUGSOUG" 22 - Lashi bible

THU' LO" MOUGSOUG" 22

¹Byu dayug gi nu: anghoid lang" yang ri khau" said zo:- anghoid lang" khau" ung" zo: nghoid rigi nu: dadu: shid re" wim: du:- yang dadu: shid re" myid: du: doem xab ca" da:.

²Nyang: khau" gu: nyang: khyoug" ca" wa zi nghoid. Nyang: ci: we' ayoo" nghoid rigi nyang: khau" bye: gu: ri khyoug" wa shid re" nyang: ri join dayug khyo" wigi ung" pyam wa zi nghoid. Khausu gi nu:- loo zei:- yang yhang: ti" gougnyhoug ri khau" nghoid loug we' yhoem: seing: gi dei shi" zi nyang: doem myang nghoid rigi dadu: shid re" eig du: doem khyoug" ca" da:. Khausu dayug gi myen" ri yhoem: re" baid phoid nyid uri said pyam nghoid rigi nyang: ri said su: gi byusaid yooboo ayoo" nghoid da:. Nghoid loug we' nyid" gung ri bue" nghoid rigi byu said yooboo yoo" wa zi nghoid.

⁵Byu dayug gi nya: gougnyhoug ri yoo khyoo: anghoid lang" zabyid khyam: khyoo: myo, lham" zoo: nhang: kaid wigi nyangnu" lam" loo" lho: byencang" khyam: mo shivoo: joem zo: pyam nghoid rigi yhoem: seing: yoo anghoid lang" yhoem: seing: zabyid khyam: mo ge thang zi yu wigi doem khyoug" ca" zi nghoid.

⁶Byu dayug gi nya: yoo ri myi: nghe' wigi mhain" pung khyo" byencang" yoo moo yug jo, zi anghoid lang" yham" zung to" da" shivoo: nge" pyam nghoid rigi myi: nghe' kaid su: gi nge" pyam da" shivoo: shid re" doem khyoug" ca" zi nghoid.

⁷Byu dayug gi byencang" phoo da" ngei anghoid lang" jonu" ri nya: shid re" bo too" byid: jang" mo khausu gi nya: yhoem: mo hau: ziri khau" phyug wigi khausu ri doem myang nghoid rigi eig boem doem pug byid: ca" zi nghoid.

⁸Nghoid loug we' khausu ri amyang nghoid rigi ngei sheing: jonu" ri bo zoem: too" su: gi noku joyoo khyoo: shu" yhe: wigi nyang: gi byencang" phoo da" jonu" akhau" ein: khyo" jham' yhe: tang: ca" da:.

⁹Nu:- loo zei:- yang- byimi- gootu: jonu" cite" da" zi moo nghoid nghoid jonu" byug yoomo byo, go" nghoid rigi eig yug goin" ri noku joyoo khyoo: shu" ri" ca" da:. Mangso wigi yooboo yo" ga: tid thu da" yug byencang" phoo ri eig boem doem khyoug" ca" da:.

¹⁰Dayug yug gi byencang" phoo da" loo zei:- nu:- yang- gootu: gougnyhoug bo zung" byid: wa shid re" gyo: wigi bo zung" nyid uri gougnyhoug gi shid: la'- no la'- lhoid she: phyug la' bue" nghoid loug we' sagse: ayo" myang nghoid wigi

¹¹Hau: yug gi noku joyoo khyoo: yhe: wigi byencang" da" gougnyhoug nyang: akhau" ga: jham' yhe: tang: lang" hau: gougnyhoug akhau" nghoid rigi yhoem: seing: gi byug ziri khab, yu ca" da:. Byencang" phoo we' nyang: ri akhyoug" ca" wa zi nghoid.

¹²Nghoid loug we' gougnyhoug khau" phyug zi danghoid rigi hau: yug gi yhoem: seing: ri khyoug" ca" da:..

¹³Hau: ziri kyoem: khoug: gougnyhoug lam" wigi shi: zo: nghoid rigi sagse: khyo" gougnyhoug shoo" deing ziri ci: loo lang" kyoem: khoug: gougnyhoug wigi dashi: zoo: yoomo nyang: gi khyoug" aca" wa zi nghoid.

¹⁴«Hang" nghoid loug we' byencang" phoo da" gougnyhoug ri ngho" wigi yhoem: seing: anyid uri dam dab, nghoid nghoid- shid: nghoid nghoid nyang: gi doem khyoug" ca" da:.

¹⁵Nghoid loug we' yhoem: seing: nyid jang" moo nyang: bue" nghoid rigi nyang: akhyoug" ca" wa zi nghoid. Vhu" kung: phau" yo' ngho" nghoid rigi vhu" kung: phoug" ri byid: wigi hau: ziri ge nghoeb pyam da:.

¹⁶Byu dayug yug gi hang" we' amho' shi" da" myiyi: gyeing" dayug ri mhid" phyo' nghoid rigi nyang: gi nyang: ri phau" kaid wigi gyeing" nyang: lo, xo' yu ca" da:.

¹⁷Nghoid loug we' myiyi: nu" nya: ba" gi nyang: ri abyid: zhoo" noug nghoid rigi nyang: gi zoomyi: gyeing" shid re" nya: phoo ri phau" kaid nhoo' nyang: ngei khyoug" ca" da:.

¹⁸Se' fa" da" myiyi: hang" ri nghoid loug we' said pyam zi shoug" ca" da:.

¹⁹Gougnyhoug yo' gung shoo" zoem" khoug: da" yuggi hang" ri nghoid loug we' said pyam zi shoug" ca" da:.

²⁰Ngoo ASEING mo lid yu phara" ri xoin" to' da" byu hang" nghoid loug we' shid: wa dang: phyed zi shoug" ca" da:.

²¹Nanu" Egutu mo tungbau joem bue" yu" bye: ziri myid boin: wigi tungbau joem ri anoug akhyoid anghoid lang" adoin zeig zoo: goo".

²²Cougmoo" myhi' yo' coug" zoo: yiri anoug akhyoid akoid goo".

²³Nanu" koid nghoid rigi nga" jhang bo pang" wa shid re" nyangnu" yoid mho' uri ngoo ASEING tam" gyo: byid: wigi

²⁴Ngoo nheigloem: yoin lo wigi nanu" ri meing: zain: jang: moo said pyam nhang: wa zi nghoid. Nanu" yhoem: seing: myhi' yigi cougmoo" myhi' bue" wigi nanu" zooshang: yigi phoo abo da" coug" zoo: yi bui" wa zi nghoid.

²⁵Nanu" nga" byu yi nghoid da" sho" jhen: bang: ri ngei jhid" byid: nghoid rigi ngei amyaid jhid" zoo: bang: yhang: ti" akoid go" atu" amyaid ri amho' zoo: goo".

²⁶Byu dayug yug gi nang ri jhen: xab ca" yoomo nya: byisheing: re" jang" moo re" byid: to" nghoid rigi nang hau: ziri nyang: ri moug: acoid shid" uri nyang:- doem yhe: byid: ca" da:.

²⁷Ciwim gari nyang: nya: gung ri loem sho' void wa zi hau: dakhyab kyeing" dayoo" yoomo nghoid. Nyang: ciyo' yo" yhoeb wa lha". Ngoo gi nheig se' myen: su: nghoid yoomo bo pang" wa shid re" nyang: ngoo ri mho' yoid uri ngoo nyang: ri tam" gyoo: byid: wa zi nghoid.

²⁸Mangsoo ri gei asang: goo". Nanu" byumyu" yi da" vhujhung: yiri anheing" goo".

²⁹«Ngoo ri nanu" da" shivoo: zabyid yhid: yo' zhainloin: xu: joem mo ayo, ju" lang" ngoo ri xoin" ngei" byid: ge'. Nanu" yuggi zoo: zooshid" ri we' ngoo ri byid: ge'.

³⁰Xang: shi" xang" da" nu: zoo: yo' yang zoo: ngoo ri byid: ge'. Xang: shi" xang" da" aloo: zoo: ri nya: yhid yo' nyhed nyid" to" wigi shed nyid" nyid" rigi ngoo ri re" shugbyid: ge'.

³¹Nanu" gi nga" byumyu" yi nghoid yoomo kyoem: khoug: gougnyhoug lam" wigi ngaid, said da" gougnyhoug shoo" ri age zoo: wa zi nghoid. Hau: gungthid hau: ziri lakhuid" ri byid: zhoo" ge'.