Read Lashi THU' LO" MOUGSOUG" 24 Bible Online

THU' LO" MOUGSOUG" 24 - Lashi bible

THU' LO" MOUGSOUG" 24

¹ASEING gi Moshe ri «Nang yo' Arun- Nadab- Abihu- Israela byumyu" vhujhung: yi nyhed xi: gi boem khyoo: nga" jang" moo do, lo wigi nanu" vi: vi: moo nyid wigi goeb, pid lho: noku ge'.

²Gooyug abo loo za: nang dayug kyeing" nga" jhang khyoo: tab loo we'. Byumyu" yi we' boem khyoo: yo" do, loo wa zi anghoid» ga: tid.

³Moshe gyoo" lo" wigi ASEING amyeing" dang: joem yo' tarha" dangain" ziri byumyu" yiri tid kyoo" lang" byumyu" yi dangain" we' «ASEING tid to" gu: dangain" ngoonu" cang abye:» ga: dage" doem phug tid boem bye:.

⁴Moshe gi ASEING dang: dangain" ziri lhid" to" da:. Thang: nab soin: no' mo nyang: gi boem khyid: moo phoin: daloem: koid wigi Israela akung: daxe: eig kung: shid re" dakung: ri lug boem daloem: khyo" wigi lug boem daxi: eig loem: koid: zhug to" da:.

⁵Hau: thang: nyang: gi zoolu: yiri nhang: kaid wigi nyangnu" gi ASEING ri nghe' ngei" xoin" to' ziyo' zoem" khau: xoin" khyo" wigi nuloo: bam: dayham" ri we' xoin" to' byid: da:.

⁶Moshe gi gougnyhoug suid" ri dago" yi" yu wigi jarung: joem moo kaid lho: dago" yi" deung ziri gi phoin: da" goo" shoid moo foid khyo' pyam da:.

⁷Hau: thang: nyang: gi ASEING da" amyeing" dang: joem lhid" kaid to" da" Dang: theing mougsoug" pug ri yu wigi byumyu" yi shid re" hau: ziri nyho: lho: nghab shug bye:. Nyangnu" we' «Ngoonu" gi ASEING ri tid dang: tam" gyo: wigi nyang: amyeing" byid: to" zi ja: khang" moo" ri koid wa bye:» ga: tid.

⁸Hau: thang: Moshe gi jarung: joem mo suid" ri yu wigi hau: ziri byumyu" yi adang moo peig zhain' kaid bye:. Nyang: gi «Hau: da" suid" gi nyang: amyeing" dang: dangain" ri byid: uri ASEING gi nanu" yo' koid da" dang: theing ri dazid thung" tab da» ga: tid.

⁹Moshe- Arun- Nadab- Abihu- yo' Israela byumyu" vhujhung: nyhed xi: yug gi boem khyoo: do, lo" ago".

¹⁰Nyangnu" gi Israela byumyu" yi da" Mangsoo ri myang ago". Nya: khyid: vhoo: moo gi mougnyoug yhang: te" da" Nila lug nyoug myhu" to" da:.

¹¹Mangsoo gi Israela byumyu" vhu" shi: bang: ri dam atab nghoid da:. Nyangnu" we' Mangsoo ri myang wigi nyangnu" dage" zo: shug boem ago".

¹²ASEING gi Moshe ri «Boem khyoo: nga" jang" moo do, lo wigi nang hid: mo: lo nyid gu: moo byumyu" yiri jhau" byid: wa shid re" ngoo lhid" to" da" tarha" dangain" bo da" lug pyi" eig loem: ri nang ri ngoo byid: wa» ga: tid.

¹³Moshe yo' nyang: ri pang" thoug su: Yoshu gi soin nyheing wigi Moshe gi gyeung" shang: boem khyoo: do, lo" da:.

¹⁴Moshe gi vhujhung: yiri ngoonu" agyoo" ri" cang gi ngoonu" ri hid moo lang" nyid ge'. Arun yo' Hura ri nanu" yo' dage" hid: moo: nyid: too" khoo' wa zi nghoid yoomo hang" nghoid nghoid tid goo" ca" moo" bo nghoid rigi nya: tang: jhang khyoo: yhi: ge'» ga: tid.

¹⁵Moshe Sina boem khyoo: do, lo" thang: ri hau: boem ri jhoemmoug" yo' nghoeb pyam da:.

¹⁶Boem gung khyoo: ASEING da" phung" yoeb gi bidbang yo' gyoo" ri" bye:. Israela byumyu" yigi hau: bidbang ri boem gung moo myi: nghe" nyid yhang: ti" yu" thu nyid ago". Jhoemmoug" gi boem moo khyug nyid" ju" sho' nghoeb to" wigi nyhed nyid" nyid" rigi jhoemmoug" khyo" ASEING gi Moshe ri khe: kaid da:.

¹⁸Moshe gi hau: jhoemmoug" khyoo: vang wigi boem khyoo: do, lo" da:. Nyang: gi houg: moo myid: xi: nyid" myid: xi: myen nyid nyid da:.