Read Lashi THU' LO" MOUGSOUG" 27 Bible Online

THU' LO" MOUGSOUG" 27 - Lashi bible

THU' LO" MOUGSOUG" 27

¹Phoin: ri shug yo' koid we'. Sheing: khyoo: 7 pe: 6 lo, shi"- pyi: khyoo: 7 pe: 6 lo, shi" koid wigi sheing: khyoo: pyi: khyoo: dayhang: ti" nghoid lho: myhang: khyoo: 4 pe: 6 lo, shi" koid we'.

²Azoin" myid: shoid goin" moo phoin: khyoug: tab we'. Hau: ziri phoin: yo' shoin" wigi dangain" jang" mo gyid: mid" yo' thoeb pyam we'.

³Myiyab geig pyam wa shid re" oug" phain' joem yabgeig lhang" khang" joem jarung: joem langhui" joem myioug" phain' joem ri koid we'. Hau: jonu" dangain" ziri gyid: mid" yo' koid we'.

⁴Gyid: mid" kyang dain: daloem: koid lho: hau: azoin" myid: shoid moo gyid: mid" keing: loem: kaid wigi gyid: lo, zei: theing" myid: loem: tab we'.

⁵Kyang dain: ri phoin: da" datoem' koo: moo: nghoid wa khyo" phoin: da" akhoem' avhoo: moo tab we'.

⁶Dang wa da" keing: youg: ri shug yo' koid wigi gyid: mid" yo' thoeb pyam we'.

⁷Phoin: ri dang wa uri hau: keing: youg: joem ri dashoid khyoo: dayoug: khyo" wigi theing" khuang khoug: moo jhu: too" we'.

⁸Boem gung moo ngoo nang ri tid khyo" ziyo' dakhyoo" ti" phoin: ri seigthi" yo' wigi boung: yhang: ti" koid we'.

⁹«Nga" shidkhoin" zoem" shid re" zin: yung" pain" yabkyo' pain" ruang: yo' vang" khyam: kyam' too" we'. Mougpyi: shoid khyo: yabkyo' pain" ruang: ri 50 gaid sheing: nhang: wigi

¹⁰Gyid: mid" zeing eig xi: loem: gyid: mid" zeing khyid: eig xi: loem: yo' ngei langhui" joem ngei yam khyang joem yo' kyam' too" we'.

¹¹Mougzhung: shoid khyoo: we' houg yo' dakhyoo" ti" koid wigi kyam' we'.

¹²Bidvang shoid mo yabkyo' pain" ruang: gi 25 gaid sheing: wigi zeing daxi: loem: yo' zeing khyid: daxi: loem: nghoid wa.

¹³Khoem" bo da" bidthu shoid khyoo: khyam: ri we' 25 gaid sheing: nhang: we'.

¹⁴Khoem" da" eig shoid goin" moo dashoid khyoo: yabkyo' pain" ruang: 7 gaid koo: yo' zeing soem" loem: zeing khyid: soem" loem: koid we'.

¹⁶Vang" khoem" ri mougnyoug void khyeing:- khalham" void khyeing: yo' soug" goug" pain" bo da" zin: yung" pain" gi moo za: thoug" yhoung to" da" yabkyo' pain" ruang: 10 gaid bo ziri kaid we'. Hau: ziri zeing myid: loem: zeing khyid: myid: loem: yo' koid too" we'.

¹⁷Vang" khyam: zeing dangain" ziri ngei keing: pyi: yo' xo' to" wigi langhui" joem ri ngei yo' koid lho: zeing khyid: joem ri gyid: mid" yo' koid we'.

¹⁸Vang" khyam: gi sheing: khyoo: 50 gaid- pyi: khyoo: 25 gaid yo' myhang: khyoo: 7 pe: 6 lo, shi" nghoid. Yabkyo' pain" ruang: rigi zin: yung" pain" yo' koid wigi zeing khyid: moo gyid: mid" yo' koid too" we'.

¹⁹Zoem" yo' vang" khyam: moo ci: da" sang" jham" joem yo' zoem" mo jonu" dangain" ziri gyid: mid" yo' koid we'.

²⁰Myen khang" moo" myi: bang nyid wa shid re" myikug shid mo ge thang zhainloin: xu: re" jhang ci: ri" goo" wa shid re" byumyu" yiri amyeing" byid: we'.

²¹Arun yo' nya: yuggi zoo: yigi myikug ri nga" shidkhoin" zoem" akhoug: mo Dang: Theing Kuid: shidkhoin"- yabkyo' pain" ruang: nghe: shoid moo tug too" wa zi nghoid. Houg: zigi nga" shidkhoin" moo myen" thang: mo zi nab soin: ju" sho' bang nyid ca" da:. He: da" amyeing" dang: joem ri Israela byumyu" yi yo' nyangnu" da" amyed ashen yi apyaid atoo: cang yhe: ca" ago".