Read Lashi THU' LO" MOUGSOUG" 29 Bible Online

THU' LO" MOUGSOUG" 29 - Lashi bible

THU' LO" MOUGSOUG" 29

¹«He: zigi Arun yo' nya: yuggi zoo: yi nga" moo" moo khainjung yi khyo" nyangnu" gung ri shugbyid: boem wa khyoo: ri nang nyangnu" ri koid byid: wa da" khyoo: joem nghoid. Dam abo da" nuloo: zoo: dadu: yo' yang loo: eig du: yu wigi.

²Doocid" abo da" ge thang sungsoo: phei" ri Zhainloin: xu: yo' zooyho' da yham" ri koid we' xu: yo' anghoid looza: dayham" ri koid we' dayham" ri xu: joid wigi zooyho' poo" zoo: joem ri koid we'.

³Hau: ziri kyang daloem: moo kaid wigi nuloo: zoo: dadu: yo' yang loo: eig du ri nang xoin" to' byid: uri hau: zooyho' kyang ri we' ngoo ri ngei" byid: la.

⁴«Arun yo' nya: yuggi zoo: yiri nga" shidkhoin" zoem" khoem" duang: khyoo: shu" ri" wigi thung" khyo" gung cid" nhang: we'.

⁵Hau: thang: Arun ri khainjung byimi joem nghoid da" byi:- byisheing:- xoin" ngei" byizuang- yanggang nghoeb- phyid" cu" joem ri foid we'.

⁶Nyang: ri vhu" thoeb thoeb byid wigi ‹ASEING ri shugbyid: to" da› ga: thuang" lhid" to" da" shugbyid: ein: wa gyeung" shang: asoo" ri houg: moo tei" tab byid: we'.

⁷Hau: thang: mainkaid xu: ri yu lho: nya: vhuloem moo foid gyoin: wigi nyang: ri aya: byid: we'.

⁸«Nya: yuggi zoo: yiri khe: yu wigi nyangnu" ri byi: foid we'.

⁹Nyangnu" phyid" doem: moo phyid" cu" cu" byid:- vhuloem moo vhu" thoeb thoeb byid: we'. Hau: zigi Arun yo' nya: yuggi zoo: yiri nang khasu" lo, ki" byid: wa da" khyoo: nghoid. Nyangnu" yo' nyangnu" da" amyed ashen yigi ngoo ri apyaid atoo: khainjung khyo" wigi dei byid: nyid wa zi nghoid ago".

¹⁰Nuloo: zoo: ri nga" shidkhoin" zoem" khyoo: she: re" wigi Arun yo' nya: yuggi zoo: yi da" lo, ri hau: nu: vhuloem moo ki" wa shid re" tid we'.

¹¹Nuloo: zoo: ri nga" gyeung" shang: shidkhoin" zoem" moo said we'.

¹²Nuloo: zoo: suid" dayham" ri yu wigi phoin: khyoug: moo re" lo, nyoug" yo' joid too" we'. Deing gu: rigi phoin: khyid: moo foid khyo' pyam we'.

¹³Hau: thang: khougseing" khougloem ri nghoeb to" da" xu: joem seing" mo ge thang da" ziyo' jeingloem: eig loem: ri xu yo' dage" yu lho: hau: joem ri phoin: moo ngoo ri xoin" khyo" nghe' ngei" byid: we'.

¹⁴Nghoid loug we' nuloo: zoo: shoo"- shooyid- khyid" joem rigi dab nghe: moo yhe: nghe' pyam we'. Hau: zigi khainjung yi da" yooboo khyoid xoin" nghoid da:.

¹⁵Yang loo: dadu: ri she: re" wigi Arun yo' nya: zoo: yi da" lo, hau: yang vhuloem moo ki" wa shid re" tid we'.

¹⁶Hau: ziri said wigi suid" ri yu lho: phoin: lheing khab' moo foid shoin" we'.

¹⁷Yang ri adu du jab wigi khougseing" khougloem yo' khyid: joem ri cid" lho vhuloem yo' shoo" khyi' joem atho' moo koid: boem too" we'.

¹⁸Zoo: noem xoin" khyo" yang du goin" ziri phoin: moo nghe' pyam we'. Hau: xoin" da" shoem: gi ngoo ri vho: ngei nhang: da:.

¹⁹«Shugbyid: wa shid re" ci: da" yang gootu: dadu: ri we' she: re" wigi Arun yo' nya: zoo: yi da" lo, hau: yang da" vhuloem moo ki" wa shid re" tid we'.

²⁰Hau: ziri said wigi suid" dayham" yu lho: Arun yo' nya: zoo: yi da" lo, yo shoid nukhyab thang: moo we' lo, yo shoid lo, moo" cam" moo we' lo, yo shoid khyid: moo" cam" moo we' joid wa zi nghoid. Deing da" suid" joem ri phoin: lheing khab' foid sain" we'.

²¹Phoin: mo suid" dayham" yo' mainkaid xu: dayham" ri yu wigi Arun yo' nya: byimi joem moo we' nya: yuggi zoo: yi yo' nyangnu" da" byimi joem adang moo peig zhain' gyoin: we'. Nyang: yo' nya: zoo: yi nyangnu" byimi joem gi ngoo ri shugbyid: to" zi nghoid wa.

²²«Yang loo: xu:- myiyhang xu:- khougseing" khougloem moo bo da" xu:- seing" mo ge: thang du- jeingloem: eig loem: yo' hau: moo dab da" xu:- lo, yo shoid bungsain: ri yham" shang: yu we'.

²³Ngoo ri ab too" bye: da" zooyho' kyang mo zooyho' daja: mo daloem: loem: yu we'. Zhainloin: xu: yo' koid da" zooyho' daloem:- xu: abo da" zooyho' daloem: zooyho' poo" dakhyab ri yu wigi

²⁴Hau: zoo: noem joem ri Arun yo' nya: yuggi zoo: yi da" lo, moo kaid wigi gooki lid da" jhungshug khyo" wigi nyangnu" ri ngoo ri shugbyid: wa zi nghoid.

²⁵Hau: thang: nyangnu" jang" mo hau: ziri yu wigi nga" shid re" zoo: noem xoin" khyo" wigi phoin: tho' moo myi: nghe' xoin" adang moo ngoo ri nghe' ngei" byid: we'. Hau: xoin" da" shoem: gi ngoo ri vho: ngei nhang: da:.

²⁶«Hau: yang loo: mo yanggang shoo" yu wigi nga" shid re" gooki lid jhungshug khyo" wigi shugbyid: we'. Hau: zigi nanu" shid re" nghoid wa.

²⁷«Khainjung aya: kham: yu uri yang da" yanggang shoo" yo' bungsain: shoo" ri nga" shid re" gooki' lid jhungshug khyo" shugbyid: wigi aya: kham: yu wa shid re" ci: lho: khainjung yi shid re" too" byid: we'.

²⁸Hau: da" khainjung yi seing: da" gougnyhoug yanggang yo' bungsain: shoo" gi ngoo khanham we' alid: wa da" nga" byumyu" yi da" zoem" khau: xoin" nghoid nyid da:. He: zigi ngoo ASEING shid re" nga" byumyu" yi da" jhungshug nghoid nyid da:.

²⁹Arun shid: da" thang: ri nya: khainjung byimi ri nya: zoo: yiri byid: too" kho' wigi nyangnu" gi aya: kham: yu uri void nhang: we'.

³⁰Arun da" nya: zoo: yi mo khainjung aya: yoo" yug gi gyeung" shang: joyoo moo dei byid: wa nga" shidkhoin" zoem" akhoug: khyoo: vang yhe: uri hau: ri nyhed nyid" ju" sho' void wa zi nghoid.

³¹«Arun yo' nya: zoo: yiri lo, ki" mainkaid byid: jang" moo ci: da" yang shoo" ri yu wigi hau: ziri gyeung" shang: joyoo moo poo" we'.

³²Nyangnu" gi hau: ziri kyang mo zooyho' yo' dage" nga" shidkhoin" zoem" khoem" duang: yam moo zoo: wa zi nghoid.

³³Nyangnu" gi lo, ki" mainkaid byid: jang" moo thung" ri: yo' sen: wigi yooboo khyoid jang" mo ci: da" shoo" ri zoo: wa zi nghoid ago". Hau: zigi gyeung" shang: nyid yoomo khainjung yi kyeing" dage zoo: wa zi nghoid.

³⁴Shoo" anghoid lang" zooyho' dayham" nab soin: ju" sho' deing jo, nghoid rigi hau: ziri nghe' pyam ca" da:. Hau: zigi gyeung" shang: nyid yoomo yo" zoo: wa zi anghoid.

³⁵«Ngoo nang ri amyeing" byid: too" bye: ziyo' dakhyoo" ti" nyhed nyid" byeung" sho' Arun yo' nya: zoo: yiri lo, ki" mainkaid byid: khyoo: ri koid we'.

³⁶Yooboo khyoid xoin" khyo" wigi nyid" khang" nyid" nu: dadu: du: nang xoin" to' ca" da:. Phoin: ri younglho' pyam ca" da:. Hau: thang: hau: zi gyeung" shang: wa shid re" zhainloin: xu: joid ca" wa zi nghoid.

³⁷He: ziri nyhed nyid" ju" sho' nyid" khang" nyid" koid wa zi nghoid. Phoin: gi gyeung" shang: nyid yoomo hougmoo zang" da" dayug yug anghoid lang" daja: ja: gyeung" shang: da" yoem: so' yo' dam dab wa zi nghoid.

³⁸«Ju" loo wa da" ayo, moo dazain byeung" da" yang nu" eig du: du: ri phoin: moo nyid" khang" nyid" xoin" to' we'.

³⁹Nab soin: ri yang nu" dadu: myen" thang: ri yang nu" dadu: khyo" wigi xoin" to' byid: we'.

⁴⁰Xang: shi" da" yang nu" ri ge da" sungsoo: phei" 22 rung yo' zhainloin: xu: da parheing" ri lheig go" wigi ngei" byid: we'. Xoin" khyo" zabyid yhid: da parheing" ri foid khyo' pyam wa zi nghoid.

⁴¹Yang nu" eig du: ein: du: ri we' nab soin: ri koid yhang: ti" sungsoo:- zhainloin: xu:- zabyid yhid: dago" yi" kaid wigi xoin" ngei" byid: wa zi nghoid. He: zigi ngoo ASEING ri ngei byid: da" zoo: noem xoin" nghoid wigi hau: xoin" shoem: gi ngoo ri vho: ngei nhang: da:.

⁴²Ju" loo wa da" ayo, dangain" moo he: nghe' ngei" xoin" nga" shidkhoin" zoem" khoem" duang: nga" shidkhoin" moo ngei" byid: ca" wa zi nghoid. Hau: joyoo gi nga" byumyu" yi yo' ngoo shoug" go" wigi nanu" yo' dang: tid goo" wa joyoo nghoid.

⁴³Hau: joyoo moo ngoo Israela byumyu" yi yo' shoug" go" wigi nga" phung" yoeb yo' he: joyoo ri gyeung" shang: sho' koid too" wa zi nghoid.

⁴⁴Zoem" yo' phoin: ri ngoo gyeung" shang: nhang: wa. Arun yo' nya: yuggi zoo: yiri khainjung yi khyo" ngoo ri dei byid: wa shid re" kho' too" wa zi nghoid.

⁴⁵Israela byumyu" yi da" akhoug: moo ngoo nyid wa zi nghoid wigi ngoo gi nyangnu" Mangsoo nghoid wa.

⁴⁶Ngoo gi nyangnu" ri Egutu mo shu" thu lo da" nyangnu" ASEING Mangsoo nghoid ziri nyangnu" se' loo goo" wa. Houg: lang" ngoo gi nyangnu" phung: moo: yo" nyid da:. Ngoo gi nyangnu" ASEING Mangsoo nghoid.