Read Lashi THU' LO" MOUGSOUG" 32 Bible Online

THU' LO" MOUGSOUG" 32 - Lashi bible

THU' LO" MOUGSOUG" 32

¹Moshe gi boem mo agyoo" loo loo: gye" myang" sho' lo" nyid byug lang" byumyu" yigi Arun jang" moo zeing: foem: yhe: wigi nyang: ri «Ngoonu" ri Egutu mo shu" thu lo da" Moshe ciwim byug bye: zi ngoonu" asi'- houg: yoomo ngoonu" ri shu" vhu" shi: wa shid re" yu phara" daloem: koid shang» ga: tid ago".

²Arun gi nyangnu" ri «Nanu" yhoem: seing: myhi' yi nanu" nya: yuggi zoo: yi nanu" nya: myiyi zoo: yi xei" ci: da" sheing: nuxei" joem ri khyoid wigi nga" jhang" khyoo: ci: ri" ge'» ga: tid.

³Houg: yoomo byumyu" yi dangain" gi nyangnu" xei" ci: da" nuxei" joem ri khyoid wigi Arun jhang" khyoo: ci: yhe: boem abye: go" da:.

⁴Nyang: gi nuxei" joem ri yu wigi hau: joem ri sheing: ayeung shau' lho: myidzuang moo foid kaid wigi sheing: nu: soolhoo: dadu: koid byid: bye:. Byumyu" yigi «Israela byumyu" yi we"- he: zigi nyhang" ri Egutu mung" mo shu" thu lo da" yu phara" nghoid» ga: tid ago".

⁵Hau: thang: Arun gi sheing: nu: soolhoo: shidkhoin" moo phoin: daloem: koid wigi «Nab yo nyid" gi ASEING ri ngi: shab da" pui" nghoid wa bye:» ga: kyo" kaid da:.

⁶Nyangnu" gi thang: nab soin: no' mo myi: nghe' xoin" shid re" yo' zoem" khau: xoin" khyoo" zoo: wa shid re" gougnyhoug ri ci: re" ago". Byumyu" yigi pui" koid wigi agyeing: asoo" loo: sho' zo: lho: shug lho: gung shoo" zoem" khoug: nyid ago".

⁷ASEING gi Moshe ri «Myab gyoo" loo" we' ciwim gari nang Egutu mo shu" thu lo da" byumyu" yi yooboo koid wigi ngoo ri ngeug pyam abye: go" da:.

⁸Cang yhi: wa shid re" ngoo nyangnu" ri byid: to" da" amyeing" dang: joem ri nyangnu" to" pyam abye:. Nyangnu" gi sheing: nu: soolhoo: koid wigi hau: ziri no' lho: xoin" to' byid: nyid ago". Nyangnu" gi he: zigi Egutu mo ngoonu" ri shu" thu lo da" ngoonu" yu phara" nghoid ga: tid nyid ago"

⁹He: byumyu" yi nheigloem: khayhi' thain: ga: ziri ngoo si' bye:.

¹⁰Akhid" ngoo ri atoem' loo. Ngoo nyangnu" ri nheig yoo: nau: ziyo' ngoo nyangnu" ri yhe: said toem" pyam wa. Hau: thang: ngoo gi nang yo' re" amyed ashen yiri byumyu" gyi: bui" nhang: wa zi nghoid» ga: tid.

¹¹Nghoid loug we' Moshe gi nya: ASEING Mangsoo ri «ASEING we" re" myhang: thang phung" yoeb yo' yoem: so' yo' nang Egutu mo khyoid yu da" re" byumyu" yiri ciwim wigi nheig yo: nyid lha".

¹²Nang re" byumyu" yiri Egutu mo shu" thu lo wigi nyangnu" ri boem moo jhoid said pyam wa zi soin: nyid nhung: ga: Egutu byumyu" yiri ciwim yoomo tid nhang: nyid wa lha". Nheigloem: yoin ziri to" pyam we' nheigloem: thid wigi re" byumyu" yiri noo phyoo" ajen" byid: loo:.

¹³Re" dei zoo: yi nghoid da" Abraham- Isag- Yaku bang: ri myid boin: we'. Nang nyangnu" amyed ashen yiri mougkhung: mo kyi: joem su" myoo: nhang: wigi nang dangsoo" byid: to" da" mung" dangain" ri apyaid atoo: nyangnu" re" nghoid baja" ga: nang nyangnu" ri geing: teing dangsoo" byid: too" ziri we' daboin: nyid shi" we» ga: mho' yoid nyid.

¹⁴Hougsu" yoomo ASEING gi nya: myid ri thid pyam wigi nya: byumyu" yi adang moo soin: to" da" noophyoo" joem ri abyid: loo: nghoid da:.

¹⁵Moshe gi Dang: theing khoin" eig shoid goin" lhid" to" da" lugpyi" eig pyi" ri vu, lho: boem khyo" gyoo" loo bye:.

¹⁶Hau: lugpyi" ri Mangsoo nyang: nyang: koid wigi Dang: theing khoin" joem ri we' hau: adang moo nyang: nyang: thuang" lhid" to" zi nghoid.

¹⁷Yoshu gi byumyu" yi nyho: nyid thui: ri shoug" gyoo: lang" Moshe ri «Dab moo meing: zain: go" nyid zi ngoo shau" gyo:» ga: tid.

¹⁸Moshe gi «Hau: ziri meing: zain: oung: lho: nyho: nyid zi we' anghoid meing: zain: soem" lho: ngoug nyid zi we' anghoid- jihkoin" khoin" da" thui: danghoid» ga: tid.

¹⁹Moshe gi nu: soolhoo: yo' byumyu" yi go" nyid ziri yo" myang sho' tab gyo" yhi: lang atho' tid loo: sho' nheigloem: yoin da:. Hau: boem khyid: moo nyang: ci: to" da" lugpyi" joem ri du" kho' pyam wigi go, byug bye: da:.

²⁰Nyang: gi nu: soolhoo: ri yu wigi myi: moo ayeung shau' lho: thung" phei" pyam wigi gyid yo' leig wigi Israela byumyu" yiri shug nhang: bye:.

²¹Nyang: gi Arun ri «Nang hid: te" da" yooboo zeing koid wa shid re" byumyu" yi nang ri cenoem koid byid: lha"» ga: myid: da:.

²²Arun gi «He: byumyu" yi yooboo koid wa shid re" myid bo ziri nang se' nyid zi nghoid yoomo ngoo ri anheig yoo:.

²³Nyangnu" ngoo ri ‹Egutu mo shu" thu lo da" Moshe ciwim byug bye: zi ngoonu" asi'- houg: yoomo ngoonu" ri shu" vhu" shi: wa shid re" yu phara" daloem: koid shang» ga: tid ago".

²⁴Ngoo gi nyangnu" mo sheing: zi ri ci: ri" ge' ein: tid lang" hau: bang: gi sheing: zi joem khyoid wigi nga" jang" moo ci: re" ago". Ngoo hau: sheing: zi ri myi: moo du" kaid lang" he: nu: soolhoo: bue" loo bye: zi nghoid» ga: tid.

²⁵Arun gi byumyu" yiri akhang" loo: za: nhang: kaid wigi gyivoo yi shidkhoin" moo nyangnu" nyang: koo" moo" zei: ziri Moshe myang bye:.

²⁶Hougsu" yoomo nyang: gi dab khoem" duang moo: yab jo, wigi «ASEING shoid khyoo: dab bang: dangain" he: shoid khyoo: loo ge'» ga: yoid tid. Houg: lang" Levi yi dangain" nya: jhang" khyoo: zeing: lo ago".

²⁷Moshe gi nyangnu" ri «Israela ASEING Mangsoo gi nanu" nyang: yug nyang: da shambyang mo da" sham: ri she: ci: wigi he: shoid khyam: khoem" mo thei: shoid khyam: khoem" ju" sho' nanu" mang: nhung"- nanu" byencang"- nanu" yhoem: kyoo" cang" yiri said pyam wa zi nghoid ga: amyeing" byid: bye:» ga: tid.

²⁸Levi yigi hau: ziri tam" gyoo: wigi hau: nyid" ri yuggi soem: khyeing" koo: said pyam bye:.

²⁹Moshe gi Levi yiri «Akhid" nyid" nanu" nya: zoo: nanu" mang: nhung" yiri said khyo" wigi ASEING da" moo" zoo" moo khainjung yhang: ti" zei: bye: yoomo ASEING gi nanu" ri mainkaid byid: bye:» ga: tid.

³⁰Thang: nyid" ri Moshe gi byumyu" yiri «Nanu" gyoug pho" yooboo zeing ri koid abye: go. Nghoid loug we' akhid" ngoo ASEING jhang boem khyoo: doem do, lo" wigi nanu" yooboo shid re" lo" yo" tid khyoid byid: abe» ga: tid.

³¹Moshe ASEING jhang khyoo: doem do, lo" wigi «He: byumyu" yi gyoug pho" yooboo zeing daloem: koid shoid too" bye:. Nyangnu" sheing: wigi yu phara" koid lho: hau: ziri no' ago".

³²Jeju" mo nyangnu" yooboo ri khyoid pyam byid: la. Nghoid loug we' nang akhyoid pyam byid: nghoid rigi re" byumyu" yi da" myeing ri nang lhid" to" da" mougsoug" pug mo nga" myeing ri phyug pyam byid: we'» ga: tid.

³³ASEING gi «Hang" nghoid loug ngoo ri thougtheung yooboo koid su: ri hau: mougsoug" pug mo ngoo nya: myeing phyug pyam byid: wa zi nghoid.

³⁴Akhid" yhe: wigi ngoo nang ri tid to" da" hau: joyoo khyoo: byumyu" yiri shu" yhi: we'. Nga" moug: lagyoo: yi nanu" ri lhoug zung" nyid wa ziri boin: soo" nyid we'. Nghoid loug we' hau: byumyu" yiri nyangnu" yooboo shid re" ngoo yooboo dam byid: wa ayo, gi ju" lo nyid bye:» ga: tid.

³⁵Nyangnu" gi Arun ri sheing: nu: soolhoo: koid nhang: yoomo ASEING gi byumyu" yi adang moo noophyoo" shoug" nhang: bye: da:.