Read Lashi THU' LO" MOUGSOUG" 35 Bible Online

THU' LO" MOUGSOUG" 35 - Lashi bible

THU' LO" MOUGSOUG" 35

¹Moshe gi Israela byumyu" yi phung: goin" ziri khe: zheing" wigi nyangnu" ri «He: zigi nanu" koid wa shid re" ASEING amyeing" byid: to" da" zi nghoid.

²Nanu" da" moo" zei: wa shid re" bidnyid khyug nyid" nanu" yo" ago". Nghoid loug we' nyhed nyid" ein: nyid" gi gyeung" shang: bidnyid nghoid. Ngoo ASEING ri shugbyid: to" da" Dougno: Bidnyid nghoid. Hau: nyid" ri moo" zei: mo, hang" nghoid loug we' said pyam zi shoug" ca" da:.

³Dougno: Bidnyid moo nanu" yhoem: moo myi: lang" amhoid goo"» ga: tid.

⁴Moshe gi Israela byumyu" yi dangain" ri «He: zigi ASEING da" amyeing" dang: nghoid.

⁵ASEING shid re" alu: jhungshug koid ge'. Hougsu" koid nau da" bang: yug khang moo" gi sheing:- ngei- gyid: mid" -

⁶zin: yung" pain" gi mougnyoug void- khalham" void- soug" goug" ni- coidbaid moug" yo' koid to" da" byimi-

⁷Ani xoug" to" da" yang lo: shooyid- shooyid gi shug seigshoo"-

⁸Myikug shid re" xu:- mainkaid xu: yo' nam: pyo: ja: xu: shid re" shoem: nam pyo: ja:

⁹Unug lug yo' khainjung moo" yi da" xoin" ngei" byizuang yo' yanggang nghoeb moo tab wa gootu: phoug" dab da" lug aja: ja: da" jhungshug joem ri koid we'.

¹⁰«Nanu" akhoug: mo se' jhang: da" moo" zei: bang: dangain" re" wigi ASEING amyeing" byid: to" da" jonu" ja: khang" moo" ri koid ge'.

¹¹Zoem"- houg: mo da" mhang" moug: yo' tunggung shoid mhang" moug:- houg: mo da" langhui" joem houg: mo da" seig khyam" zuang joem houg mo da" keung: pyi: joem houg: mo da" zeing joem houg: mo da" zeing khyid: joem

¹²Dang: Theing Kuid:- houg: mo da" keing: youg: joem houg: mo da" amyhed"- go too" wa yabkyo' pain" ruang:

¹³Zoobui"- houg: mo da" keung: youg: joem yo' houg: mo jonu" dangain"- Mangsoo ri xoin" to' byid: wa zooyho'

¹⁴Myi: tab wa shid re" myikug tang yo' houg: mo jonu" joem myikug joem yo' myixu:-

¹⁵Nam pyo: ja: nghe' ngei" wa shid re" phoin: yo' houg: mo da" keing: youg: joem mainkaid xu:- nam pyo: ja: xu:- zoem" da" khoem" duang: shid re" yabkyo' pain" ruang:.

¹⁶Myi: nghe' xoin" to' wa shid re" phoin: yo' gyid: mid" kyang dain:- houg: mo da" keing: youg: joem yo' houg: mo jonu" dangain"- cid" shang: wa da" gyid jarung: yo' houg: mo da" tang

¹⁷Vang" khyam: shid re" yabkyo' pain" ruang: joem houg: mo da" zeing yo' zeing khyid: joem Vang" khyam: khoem" shid re" yabkyo' pain" ruang:

¹⁸Zoem" yo' vang" khyam: shid re" dung" zeing zoo: yo' tei" joem

¹⁹Khainjung yi gyeung" shang: joyoo moo dei byid: uri void wa shid re" khainjung byimi joem khainjung Arun yo' nya: yuggi zoo: yi void wa shid re" gyeung" shang: da" byimi joem ri re" koid ge'» ga: tid.

²⁰Israela byumyu" yi dangain" thu lo" wigi

²¹Hougsu" alu: jhungshug kaid byid: wa noug bang: yugkhang" moo" gi ASEING shidkhoin" zoem" koid wa shid re" ASEING jang" khyoo: alu: jhungshug ci: re" boem ago". Nyangnu" gi noku koid jang" moo ci: wa shid re" ca" gu: dangain" yo' khainjung byimi koid wa shid re" ca" gu: dangain" ci: re" boem ago".

²²Byid: nau da" nheigloem: yo' myiyi: yuggi dangain" gi shoung: yhoung zi nghoid da" ngabkyen"- nuxei"- theung"- yi:- phoug" dab da" sheing: zi aja: ja: ci: re" boem wigi ASEING ri re" shugbyid: ago".

²³Zin: yung" pain" gi mougnyoug void- khalham" void- soug" goug" ni- coidbaid moug" byimi joem ani xoug" to" da" yang lo: shooyid joem shooyid gi yo" da" bang: yugkhang" moo" ci: re" boem ago".

²⁴Dangain" bang: gi ngei anghoid lang" gyid: mid" ri ASEING shid re" alu: jhungshug khyo" ci: re" ziyo' shug thi" ri we' moo" zei: jang" moo ci: wa shid re" ci: re" boem ago".

²⁵Se' jhang: da" myiyi: yigi nyangnu" nyang: koid to" da" zin: yung" khyeing: joem moug nyoug void khyeing:- khalham" void khyeing:- soug" goug" khyeing: ni joem ri ci: re" boem ago".

²⁶Nyangnu" gi coidbaid moug" yo' we' khyeing: koid ago".

²⁷Vhujhung: yigi xoin" ngei" byizuang yo' yanggang nghoeb moo tab wa shid re" Unug lug yo' gootu: lug gi joem ri ci: re" ago".

²⁸Shoem: nam pyo: ja:- myikug shid re" xu:- mainkaid xu: we' nam pyo: ja xu: ri ci: re" boem ago".

²⁹Moshe ri amyeing" byid: to" da" moo" shid re" alu: jhungshug byid: nau boem da" Israela byu yi gi nyangnu" jhungshug joem ASEING jhang ci: re" byid: ago".

³⁰Moshe gi Israela byumyu" yiri «Yuda akung: mo Uri da" nya: zoo: Hura da" nya: myid: Bezalela ri ASEING khyen: yu da:.

³¹Nyang: ri Mangsoo da" yoem: so' yo' pyeing byid: wa. Nyang: ri lo, moo" phajhi" dangain" ziri se' koid da" lasi jhang: khyo:- oung: doid yoem: so'- lasi phajhi" joem ri byid: wigi

³²Sheing:- ngei- gyid: mid" ri baid khyoo:

³³Ngei sheing: moo thuang" phajhi"- seig ri kyung" phajhi"- gootu: lo, moo" lasi phajhi" ri koid nhang: wa.

³⁴ASEING gi nyang: ri yo' Dan akung: mo Ahisamag da" nya: zoo: Oholiaba ri nya: tang: da" lo, moo" ri gootu: byu yiri doem jhau" byid: wa da" oung: doid yoem: so' byid: to" da:.

³⁵Kyung" lho: koid da" moo"- azuang sue" da" moo"- zin: yung" pain"- mougnyoug pain"- khalham" pain"- soug" goug" ni ri yo, da" moo" yo' gootu: byimi yo' moo" moo se' jhang: khyoo: ri nyang: gi houg: tang: ri byid: too" bye:. Nya: tang: gi moo" dangain" ri yo" koid wigi azuang sue" da" moo" moo se' jhang: su: eig tang: nghoid.