Read Lashi THU' LO" MOUGSOUG" 36 Bible Online

THU' LO" MOUGSOUG" 36 - Lashi bible

THU' LO" MOUGSOUG" 36

¹«Bezalela tang: Aholiaba yo' ASEING wigi lo, moo" zei: jang" moo se' jhang: khyoo: yo' lasi phajhi" byid: too" shoug" bang: gootu: dangain" gi gyeung" shang: zoem" ri koid wa ca" da" gu: ja: khang" moo" ri khasu" koid wa se' gyoo: bang: gi ASEING wigi amyeing" byid: to" ziyo' dakhyo" ja: khang" moo" ri koid wa zi nghoid da» ga: tid da:.

²Moshe gi Bezalela tang: Oholiaba yo' ASEING wigi yoem: vhoo" byid: to" shau" da" lo, moo" zei: se' jhang: bang:- gootu: dangain" bang:- pang" thoug nau myid boo bang: ri khe: yu lho: Moshe gi nyangnu" ri moo" zei: shid" wa shid re" tid bye:.

³Gyeung" shang: zoem" ri koid wa shid re" Israela byumyu" yi ci: re" da" jhungshug joem dangain" ziri Moshe lo, moo nyangnu" khab yu ago". Nghoid loug we' Israela byumyu" yigi Moshe jang" khyoo: nab khang" nab nyangnu" da" alu: jhungshug ri xo' byid: nyid boem.

⁴Hau: thang: se' jhang: da" moo" zei: bang: gi Moshe jhang yhe: wigi

⁵«Byumyu" yi ASEING koid ge' ga: amyeing" byid: to" da" moo" zei: wa shid re" ca" tho' mo jain" sho' byid: abye: go"» ga: tid kyo" ago".

⁶Houg: lang" Moshe gi dab bain sho' moo gyeung" shang: zoem" shid re" jhungshug hang" we' gootu: akaid loo: wa shid re" amyeing" byid: kaid bye:. Houg: lang" byumyu" yigi gootu: aci: re" loo: goo" nghoid da:.

⁷Ci: re" bye: gu: dangain" we' moo" dangain" bain koid wa shid re" ca" tho' mo je myoo: sho' nghoid da:.

⁸Houg: khoug: mo moo" se' jhang: da" bang: gi ASEING shidkhoin" zoem" ri koid boem ago". Nyangnu" gi moug nyoug void khyeing:- khalham" void khyeing:- soug" goug" ani yo' yo, da" zin: yung" pain" daxi: khyab yo' koid wigi hau: pain" joem moo: dungdab dei noem joem soolhoo: ri za: yo' thau" tab to" da:.

⁹Pain" cu' dangain" du goo" sho' sheing: khyoo: 14 gaid- pyi: khyoo: 2 gaid bo ago".

¹⁰Nyangnu" gi hau: gu: ri wim: khyab ri dazuang khyoeb zho' wigi gootu: wim: khyab ri we' dazuang khyoeb zho' boem bye:.

¹¹Nyangnu" gi nghe: shoid mo pain" zuang dangain" da" athang: moo mougnyoug void teikhuang joem ri tab bye:.

¹²Nyangnu" gi xang: shi" zuang mo xang: shi" khyab moo teikhuang wim: xi:- thang: zuang mo lo" thang khyab moo teikhuang wim: xi: tab boem bye:.

¹³Nyangnu" gi eig zuang goin" ziri dakhyab kyeing" bui" sho' xo' wa shid re" sheing: langhui" wim: xi: loem: koid bye: zi nghoid.

¹⁴Hau: thang: nyangnu" gi zoem" ri moug: wa shid re" coidbaid moug" yo' yo, da" pain" cu' daxi: da cu' koid boem bye:.

¹⁵Nyangnu" gi hau: gu: dangain" du goo" sho' sheing: khyoo: 15 gaid- pyi: khyoo: 2 gaid koid bye: zi nghoid.

¹⁶Nyangnu" gi hau: gu: ri wim: khyab dazuang khyoeb zho' wigi gootu: khyug khyab ri dazuang khyoeb zho' bye:.

¹⁷Nyangnu" gi dazuang da" lo" thang khyab athang: moo teikhuang wim: xi: tab wigi gootu: azuang mo athang: moo we' wim: xi: khuang tab bye:.

¹⁸Nyangnu" gi gyid: mid" langhui" wim: xi: loem: koid wigi eig zuang goin" ziri dazuang kyeing" bui" sho' teikhuang joem moo nghue" lhang" too" bye: zi nghoid.

¹⁹Nyangnu" gi hau: adang moo pug nghoeb wa shid re" ani xoug" to" da" yang yid dakhyab yo' gootu: ge da" sho" yid dakhyab we' he: eig khyab ri doem pug koid bye: zi nghoid.

²⁰Nyangnu" gi zoem" shid re" shug seig khyam" zuang ri we' koid bye: zi nghoid.

²¹Seig khyam" zuang khang" moo" 15 pi: sheing: wigi 2 pe: 3 lo, shi" koo: thu: lho:

²²Seig khyam" zuang khang" moo" ri daveing" za: yo" xo' sho' zeing thug eig loem: loem: tab to" da:. Hougsu" seig khyam" zuang dangain" moo hau: zeing thug joem ri tab to" da:.

²³Nyangnu" gi mougpyi: shoid mo shid re" seig khyam" zuang eig xi: loem: koid bye: wigi

²⁴Seig khyam" zuang daloem: gi eig koo' nghoid yoomo akhyid: moo nhang" wa shid re" ngei seig khyam" zuang khyid: myid: xi: loem: ri we' koid too" bye:.

²⁵Nyangnu" gi zoem" da" mougzhung: shoid mo shid re" seig khyam" zuang eig xi: loem: koid bye: wigi

²⁶Seig khyam" zuang daloem: moo ngei seig khyam" zuang khyid: eig khyid: khyo" wigi ngei seig khyam" zuang khyid: myid: xi: ri we' koid too" bye:.

²⁷Bidvang shoid nghoid da" zoem" nungthang shoid mo shid re" seig khyam" zuang khyug loem: yo'

²⁸Ajhoin: moo zhug wa shid re" eig loem: koid boem bye:.

²⁹He: ajhoin: mo seig khyam" zuang joem ri akhyid: moo xo' go" wigi aphyoo" moo we' xo' goo" bye: zi nghoid. Ajhoin: eig loem: goin" mo seig khyam" zuang eig loem: goin" gi hougsu" koid bye: zi nghoid.

³⁰Hougsu" yoomo seig khyam" zuang shid zuang yo' dazuang moo sheing zeing khyid: eig khyid: khyo" wigi daxi: khyug khyid: nghoid boem bye: zi nghoid.

³¹Nyangnu" gi zoem" da" dashoid khyoo: wim: loem:- thang: dashoid khyoo: wim: loem: bidvang shoid nungthang khyoo: wim: loem: khyo" wigi shug keing: pyi: daxi: wim: loem: koid boem bye:.

³³Agung mo keing: pyi: gi seig khyam" zuang dago" yi" moo to" wigi zoem" dathang: mo gootu: dathang: khab sho' koid too" bye:.

³⁴Nyangnu" gi seig khyam" zuang joem moo sheing: yo' thoeb wigi sheing: thoeb to" da" keing: pyi: kaid wa shid re" theung" we' tab too" bye: zi nghoid.

³⁵Nyangnu" gi moug nyoug void khyeing:- khalham" void khyeing"- soug" goug" khyeing" ni yo' yo, to" da" zin: yung" pain" yabkyo' pain" ruang: koid bye:. Houg moo dung dab dei noem soolhoo: ri za: yo' thau" tab too" bye:.

³⁶Nyangnu" gi hau: yabkyo' pain" ruang: lhang" too" wa shid re" shug seig wigi zeing myid: loem: koid ago". Hau: joem ri sheing: wigi thoeb pyam lho: sheing: langhui" joem ri tab ago". Hau: thang: nyangnu" gi hau: zeing joem ri zhug wa shid re" ngei zeing khyid: myid: khyid: koid boem ago".

³⁷Nyangnu" gi zoem" da" vang lo" khoem" duang: shid re" moug nyoug void khyeing:- khalham" void khyeing: yo' soug" goug" khyeing: ni yo' yo, to" da" zin: yung" pain" gi moo za: yo' thau" yhung tab to" da" yabkyo' pain" ruang: dakhyab ri we' koid boem bye:.

³⁸Houg: lho: nyangnu" gi he: yabkyo' pain" ruang: shid re" zeing wim: zeing moo langhui" joem tab lho: zeing vhu" joem ri yo' yam khyang ri sheing: thoeb pyam ago". Zeing joem shid re" gyid: mid" zeing khyid: wim: khyid: koid ago".