Read Lashi THU' LO" MOUGSOUG" 37 Bible Online

THU' LO" MOUGSOUG" 37 - Lashi bible

THU' LO" MOUGSOUG" 37

¹Bezalela gi sheing: khyoo: 3 pe: 9 lo, shi"- pyi: khyoo: 2 pe: 3 lo, shi"-myhang: khyoo: 2 pe: 3 lo, shi" bo da" shug Dang: Theing Kuid: daloem: koid bye:.

²Nyang: gi hau: da" atho' avoo: dangain" jang" mo sheing: gyeing" wigi nghoeb wigi azoin" cang we' sheing: yo' dung" pyam bye:.

³Nyang: gi hau: shid re" theung" yhang: te" sheing: lo, zei: myid: loem: yo' hau: jang" moo tab wa shid re" sheing: koid: khyid: myid: loem: ri koid wigi lo, zei: theung" dashoid khyoo: eig loem: loem: tab bye:.

⁴Nyang: gi dang wa shid re" shug keung: youg: koid wigi hau: ziri sheing: yo' thoeb pyam bye: zi nghoid.

⁵Hau: keung: youg: ri koid: da" dashoid khyoo: dayoug: youg: jhu: zei too" bye:.

⁶Nyang: gi sheing: khyoo: 3 pe: 9 lo, shi"- pyi: khyoo: 2 pe: 3 lo, shi" bo da" amyed" ri we' sheing: yo' koid bye: zi nghoid.

⁷Sheing: dung dab dei noem eig du: ri we' koid bye:.

⁸Amyhid" dathang: shid re" dadu: khyo" wigi eig thang: goin" moo dadu: du: koid bye:.

⁹Amyhid" adang moo dung dab dei noem eig du: ri nyang: cang" nyang: myonhoo shu: goo" nhang: wigi nya: tang: dung ri pyo: too" nhang: lho: amyhid" ri nghoeb too" bye: zi nghoid.

¹⁰Nyang: gi sheing: khyoo: 3 pe:- pyi: khyoo: 1 pe: 6 lo, shi"- myhang: khyoo: 2 pe: 3 lo, shi" bo da" shug zoobui" ri koid bye:.

¹¹Nyang: gi hau: ziri sheing: gyeing" wigi thoeb lho: azoin" moo we' sheing: wigi dung" bye:.

¹²Nyang: gi lo, soem: shi" myhang: da" akhoem' ri tab wigi hau: azoin" moo we' sheing: yo' dung" too" bye:.

¹³Nyang: gi dang wa shid re" zoobui" khyid: myid: loem: jang" moo sheing: theing" lo, zei: tab bye:.

¹⁴Keung: youg: yo' dang wa shid re" sheing: theing" lo, zei: ri zoobui" da" akhoem' anam moo tab too" bye:.

¹⁵Nyang: gi shug keung: youg: koid wigi hau: ziri sheing: yo' thoeb pyam bye: zi nghoid.

¹⁶Nyang: gi zoobui" shid re" oug" khu lang: bain joem nghoid da" bain- khu- yam: nu" yo' zabyid yhid: shugbyid: jang" moo ci: da" jarung: joem ri sheing: gyeing" yo' koid da:.

¹⁷Nyang: gi sheing: gyeing" myikug tang daloem: koid bye: zi nghoid. Nyang: gi hau: apoem: yo' alo, ri sheing: wigi baid yu da:. Hau: ziri bain: poo" bain: fu' joem bo wigi tuang tab to" da" bain joem gi ashoo" dazo" za: nghoid nyid da:.

¹⁸Hau: zi moo dashoid khyoo: soem" kung: kung: wigi khyug ko' ri doem tab too" bye:.

¹⁹Khyug kung: da" kung: khang" moo" moo Lashab bain: boo" yo' bain: fu' yhang: te" bain: boo" soem" boo" tuang tab too" bye:.

²⁰Myikug tang ayoug: moo we' bain: boo" yo' bain: fu' bo dab da" Lashab boo" yhang: te" ziyo' tuang to" da" bain: joem myid: boo" boo" koid too" bye:.

²¹Akung: soem" zoem" ri dazoem" yo' dazoem" agyoo: moo aboo" daboo" boo" kaid too" bye:.

²²Aboo" joem akung: joem yo' myikug tang ri sheing: daja: kyeing" yo' baid too" bye:.

²³Nyang: gi myikug tang shid re" myikug nyhed loem: ri koid wigi hau: da" shid re" nyab, zi" yo' phain' ri we' sheing: yo' koid too" bye:.

²⁴Nyang: gi myikug tang yo' hau: da" zi joem dangain" ri koid wa shid re" sheing: 20 joid: ci: da:.

²⁵Nyang: gi nam pyo: ja: nghi' wa shid re" phoin: daloem: ri we' shug yo' koid bye: zi nghoid. He: ziri sheing: khyoo: pyi: khyoo: lo, 18 shi" shi" wigi dago" yi" koid wigi myhang: khyoo: lo, 36 shi" koid bye: zi nghoid. Ajhoin: thang: myid: jhoin: mo seig khyoug: joem ri we' hau: ziyo' daloem: kyeing" bui" sho' koid bye:.

²⁶Nyang: gi hau: da" adang moo we' myid: shoid goin" moo we' seig khyoug: moo we' sheing: gyeing" wigi thoeb pyam bye:. Lheing khab' moo we' sheing: boug tab da:.

²⁷Nyang: gi hau: shid re" sheing: lo, zei: theing" eig loem: koid wigi theing" moo keing: youg: jhu: lho: yo" dang wa shid re" eig shoid goin" ajhoin: voo: moo tab too" bye: da:.

²⁸Nyang: gi keing: youg: ri shug yo' koid wigi hau: ziri sheing: yo' thoeb too" bye: da:.

²⁹Nyang: gi shoem: nam pyo: da" xu: ri yo' dayhang: ti"- gyeung" shang: da" mainkaid xu: yo' shoem: nam pyo: da" ja: gyeing" ri we' phung: yu da:.