Read Lashi THU' LO" MOUGSOUG" 38 Bible Online

THU' LO" MOUGSOUG" 38 - Lashi bible

THU' LO" MOUGSOUG" 38

¹Nyang: gi myi: nghe' xoin" ngei" wa shid re" phoin: ri shug yo' koid too" bye:. Sheing: khyoo: 7 pe: 6 lo, shi"- pyi: khyoo: 7 pe: 6 lo, shi" koid wigi sheing: khyoo: pyi: khyoo: dayhang: ti" nghoid lho: myhang: khyoo: 4 pe: 6 lo, shi" koid too" bye:.

²Nyang: gi azoin" myid: shoid goin" moo phoin: khyoug: tab to" wigi hau: zigi phoin: yo' daloem: kyeing" bui" nhang: bye:. Nyang: gi hau: zi dangain" jang" moo gyid: mid" yo' thoeb pyam bye:.

³Nyang: gi phoin: mo jonu" dangain" zi nghoid da" myiyab geig pyam wa shid re" oug" phain' joem lageig joem jarung: joem langhui" joem myioug" phain' joem ri we' koid bye:. He: jonu" dangain" ziri gyid: mid" yo' koid da:.

⁴Nyang: gi gyid: mid" kyang dain: ri koid wigi hau: kyang dain: ri phoin: da" datoem' koo: moo nghoid wa shid re" phoin: da" akhoem avhoo: moo tab bye: da:.

⁵Nyang: gi lo, zei: theing" myid: loem: ri koid wigi myid: shoid goin" moo tab too" bye: da:.

⁶Nyang: gi keing: youg: ri shug yo' koid wigi hau: joem ri gyid: mid" yo' thoeb too" bye: da:.

⁷Hau: joem ri phoin: shoid khang" moo" mo lo, zei: theing" khuang khoug: moo jhu: kaid too" bye: da:. Phoin: ri seig thi" yo' wigi bung: yhang: ti" koid bye:.

⁸Nyang: gi gyid: mid" jarung: yo' hau: da" tang ri ASEING da" zoem" khoem" duang: moo moo" zei: da" myhi' zeing yi da" gyid: mid" bangteing ri yu wigi koid bye: da:.

⁹ASEING shidkhoin" zoem" shid re" nyang: gi zin: yung" pain" yab kyo' pain" ruang: khyam: kyam' too" bye: da:. Mougpyi: shoid khyoo: yabkyo' pain" ruang: ri 50 gaid sheing: nhang: wigi

¹⁰Gyid: mid" zeing eig xi: loem:- gyid: mid" zeing khyid: eig xi: loem: yo' ngei langhui" joem ngei keing: pyi: joem yo' kyam too" bye: da:.

¹¹Khyam: gi mougzhung: shoid khyoo: we' houg: yo' dakhyoo" ti" kyam' bye: da:.

¹²Bidvang shoid mo yabkyo' pain" ruang: gi 25 gaid sheing: wigi zeing daxi: loem:- zeing khyid: daxi: yo' langhui"- keing: pyi: joem ri ngei yo' koid bye: da:.

¹³Khoem" bo da" bidthu shoid khyoo: khyam: ri we' 25 gaid sheing: nhang: bye: zi nghoid.

¹⁴Khoem" da" eig shoid goin" moo dashoid khyoo: yabkyo' pain" ruang: 7½ gaid yo' zeing soem" loem:- zeing khyid: soem" loem: koid bye: da:.

¹⁶Khyam: dangain" mo yabkyo' pain" ruang: ri zin: yung" pain" gi yo' koid bye:.

¹⁷Zeing shid re" zeing khyid: ri gyid: mid" yo' koid wigi langhui" yo' keing: pyi: ri ngei yo' koid bye: ziyo' zeing phyoo" moo we' ngei yo' thoeb bye: da:.

¹⁸Vang" khoem" mo yabkyo' pain" ruang: ri mougnyoug void khyeing:- khalham" void khyeing:- soug" goug" khyeing: ni yo' yo, lho: za: yo' thoug" yhoung to" da" zin: yung" pain" yo' koid too" bye: da:. Hau: zigi 10 gaid sheing: wigi myhang: khyoo: 2½ gaid bo lho: vang" khyam: da" yabkyo' pain" ruang: yo' du da:.

¹⁹Hau: ziri zeing myid: loem:- gyid: mid" zeing khyid: myid: loem: yo' koid too" bye:. Hau: jang" mo langhui" joem zeing phyoo" moo nghoeb da" zi keingpyi: joem ri ngei yo' koid to" da:.

²⁰Zoem" yo' vang" khyam: moo ci: da" sang" jham" joem dangain" ri gyid: mid" yo' koid to" da:.

²¹He: zigi Dang: theing khoin" ri lhid" tab to" da" lugpyi" eig loem: ri kaid to" da" ASEING shidkhoin" zoem" moo ci: da" to' jonu" zhayhen" joem nghoid da:. He: zhayhen" ri Moshe da" amyeing" khyo" wigi khainjung Arun da" nya: zoo: Ithama khyoo: shid da" lo, khoug: moo moo" zei: da" Levi byu yi lhid" to" zi nghoid.

²²Yuda akung: mo Uri da" nya: zoo: Hura da" nya: myid: Bezalela gi ASEING amyeing" byid: to" gu: dangain" ri koid bye: zi nghoid.

²³Nyang: ri bo pang" su: Dan akung: mo Ahisamag da" nya: zoo: Oholiaba gi lugthuang" se' thuang"- azuang koid yug- moug nyoug void- khalham" void- soug" goug khyeing: ni yo' zin: yung" pain" gi ri se' yo, su: nghoid.

²⁴Gyeung" shang: da" Zoem" shid re" ASEING ri ab byid: da" sheing: dangain" gi tarha" vang: da" laki ri ci: lho: leug yu" ri 609 joid: 28 rung jain" bo da:.

²⁵Byu phung: zhayhen" mo shau" da" ngei gi tarha" vang da" laki ri ci: lho: leug yu" ri 2097 joid: 8 rung jain" bo da:.

²⁶Tarha" vang" da" laki' ri ci: lho: leug yu" ri byu phung: zhayhen" yo' ca" da" ngei sheing: zhayhen" gi du go" nyid zi nghoid. Eig xi: zain yo' eig xi: zain mo tho' khyo: bang: da" zhayhen" ri yu" kaid uri yuggi 603550 yug nghoid nyid da: zi nghoid.

²⁷Zeing khyid: daloem: ri ngei 20 join: 33 rung jain" khyo" wigi yabkyo' pain" ruang: shid re" zeing khyid: 100 loem: koid jang" moo ngei 2083 joid: 13 rung jain" ci: bye: zi nghoid.

²⁸Deung da" ngei 13 joid: 35 rung jain" rigi Bezalela wigi zeing shid re" keing: pyi:- langhui" yo' zeing phyoo" moo nghoeb wa ziri koid bye: zi nghoid.

²⁹ASEING ri shugbyid: da" gyid: mid" joem gi 1475 joid: nghoid.

³⁰Nyang: gi hau: ziyo' ASEING da" zoem" khoem" duang: shid re" akhyid:- gyid: mid" phoin: yo' hougmo gyid: mid" kyang dain: yo' phoin: shid re" jonu" dangain" ziri we'

³¹Vang" khyam: yo' vang" khyam: khoem" akhyid:- zoem" yo' vang" khyam: mo sang" jham" dangain" ziri koid bye: zi nghoid.