Read Lashi THU' LO" MOUGSOUG" 39 Bible Online

THU' LO" MOUGSOUG" 39 - Lashi bible

THU' LO" MOUGSOUG" 39

¹Gyeung" shang: joyoo khyoo: vang lo" uri void wa shid re" khainjung byimi ri nyangnu" gi mougnyoug void- khalham" void- ani void bo da" pain" yo' khyoeb ago". ASEING wigi Moshe ri amyeing" byid: to" ziyo' dakhyoo" ti" Arun shid re" nyangnu" gi khainjung byimi joem ri khyoeb bye: ago".

²Nyangnu" xoin" ngei" byizuang ri zin: yung" pain"- mougnyoug void- khalham" void- ani void bo da" khyeing: gi yo' sheing: ri kaid wigi yo, bye: da:.

³Nyangnu" gi mougnyoug void- khalham" void- ani void bo da" zin: yung" pain" gi moo yo" kaid wa shid re" sheing: ri baid pye" wigi poo" poo" shid yu lho: adu du phyed da:.

⁴Nyangnu" gi xoin" ngei" byizuang ri yo" tei" tab wa shid re" katho' mo tei" eig khaid ri koid wigi eig shoid goin" tei" tab to" da:.

⁵ASEING wigi Moshe ri amyeing" byid: to" ziyo' dakhyoo" ti" phyid" cu" ri we' du go" da" jonu" yo' koid wigi xoin" ngei" byizuang shoin" lho: daloem: kyeing" bui" sho' tab to" ago".

⁶Nyangnu" gi Unug lug adang moo Yaku da" nya: zoo: daxe: eig yug da" myeing ri thuang" lhid" wigi sheing: khu zoo: joem moo kaid to" da:.

⁷Nyangnu" gi ASEING wigi Moshe ri amyeing" byid: too" bye: ziyo' dakhyoo" ti" Israela byumyu" daxe: eig kung: da" asoo" khyo" wigi hau: lugboem joem ri xoin" ngei" byizuang ri tei" da" lo, sain: tei" moo tab to" da:.

⁸Nyangnu" gi Yanggang nghoeb ri xoin" ngei" byizuang koid da" ziyo' dakhyoo" ti" khyeing: zi daja: yo' za: koid wigi za: yo' hau: ziri dakhyoo" ti" thoug" lho: koid ago".

⁹Hau: ziri sheing: khyoo: 9 lo, shi"- pyi: khyoo: 9 lo, shi" khyo" wigi dago" yi" koid lho: eig pug koid ago".

¹⁰Nyangnu" gi hau: adang moo phau" dab da" lug myid: khyoo" ri tab ago". Xang: shi" khyoo" moo patemya"- utaphaya- mya joem nghoid.

¹¹Eig khyoo" ein: da" khyoo" moo gi lug ni- nila- sin joem nghoid.

¹²Soem" khyoo" ein: da" jang" moo gi vakintu- mahuya- thitun nila joem yo'

¹³Myid: khyoo" ein: da" jang" moo gi myed yue"- unug yo' nagathue joem nghoid. Hau: joem ri sheing: khu zoo: joem moo tab to" zi nghoid.

¹⁴Israela akung: daxe: eig kung: da" gungthid nghoid wa shid re" lug dacab moo myeing da cab khyo" Yaku da" nya: zoo: yi da" myeing ri lug daxe: eig cab' moo lhid" to" ago".

¹⁵Yanggang nghoeb shid re" nheug to" da" sheing: jangcoo" ri koid ago".

¹⁶Nyangnu" gi yanggang nghoeb tho' khyoo: azoin" eig loem: moo tab wa shid re" sheing: khoem azuang eig loem: yo' sheing: theing" eig loem: koid ago".

¹⁷Nyangnu" gi sheing: theing" eig loem: moo sheing: jangcoo" eig khaid yo' tei" to" ago".

¹⁸Houg: lho: gootu: athang: eig thang: rigi sheing: khoem azuang eig loem: tei" tab ago". Hougsu" wigi hau: ziri katho' shidkhoin" mo xoin" ngei" byizuang yo' xo' go" to" bye: zi nghoid.

¹⁹Nyangnu" gi sheing: theing" eig loem: koid wigi yanggang nghoeb da" vhoo: mo azoin" thang: eig thang: ri akhoug khyo" lho: xoin" ngei" byizuang yo' xo' too" bye:.

²⁰Nyangnu" gi sheing: theing" eig loem: doem koid wigi hau: ziri xoin" ngei" byizuang shidkhoin" katho' tei" vho: du yo' ge da" phyid" cu" atho' khyoeb khyoo" nam moo xo' tab too" bye:.

²¹ASEING wigi Moshe ri amyeing" byid: to" ziyo' dayhang: ti" nyangnu" gi phyid" cu" atho' mo yanggang nghoeb gi ashu: loo" wa shid re" yanggang nghoeb moo dab da" theing" yo' xoin" ngei" byizuang moo dab da" theing" ri mougnyoug khyeing: wigi tei" to" ago".

²²Xoin" ngei" byizuang akhoug: mo byisheing: ri mougnyoug void khyeing: yo' koid ago".

²³Vhuloem jhu: kaid wa shid re" aduang: phang wigi ajeig loo" wa shid re" gyibyi: yhang: ti" hau: aduang: azoin" cang wigi pain" yo' dung" to" ago".

²⁴ASEING wigi Moshe ri amyeing" byid: to" ziyo' dayhang: ti" hau: athang: lheungkhab moo lamei shi" shicab yhang: te" mougnyoug void- khalham" void- ani void bo da" khyeing: yo' zin: yung" pain" gi yo' sheing: jhu: ri dacab kyoo: gi gi tab to" ago".

²⁷Nyangnu" gi Arun yo' nya: zoo: yi da" byi: joem ri we'

²⁸Vhuthoeb- mug- zin: yung" pain" loo" khya joem we'

²⁹houg: lho: zin: yung" pain" gi mougnyoug void khyeing:- khalham" void khyeing: wigi za: yo' tuang to" da" phyid" cu" ri we' ASEING wigi Moshe ri amyeing" byid: to" ziyo' dayhang: ti" koid ago".

³⁰Nyangnu" gi shugbyid: to" ziri gyeung" shang: da" asoo" khyo" sheing: gyeing" wigi sheing: zi daloem: koid lho: hau: atho' moo «ASEING ri shugbyid: to" da» ga: lhid" tab to".

³¹ASEING wigi Moshe ri amyeing" byid: to" ziyo' dayhang: ti" nyangnu" gi hau: ziri mougnyoug tei" yo' vhuthoeb shidkhoin" moo tei" to" ago".

³²ASEING shidkhoin" zoem" koid da" moo" zoo" dangain" ri bain koid bye: ago". ASEING wigi Moshe ri amyeing" byid: to" ziyo' dayhang: ti" Israela byumyu" yi moo" zoo" dangain" ziri koid boem bye:.

³³Nyangnu" gi zoem" yo' houg mo da" langhui" joem khyam: joem keungpyi: joem zeing joem akhyid: lugpyi" joem

³⁴Ani xoug" to" da" yang yid mhang" moug:- ge da" shooyid mhang" moug:- yabkyo' pain" ruang:

³⁵Lugpyi" joem kaid to" da" Dang: Theing Kuid:- houg: mo da" keung: youg: joem amyhed"-

³⁶Zoobui" yo' houg: mo da" jonu" dangain" yo' Mangsoo ri xoin" ngei" wa shid re" zooyho'

³⁷Sheing: myizeing- myikug joem houg: mo da" jonu" dangain" yo' myikug shid re" xu:-

³⁸Sheing: phoin:- mainkaid xu:- nam pyo: ja: xoin"- zoem" da" khoem" duang: shid re" yabkyo' pain" ruang:.

³⁹Gyid: mid" phoin: yo' houg: moo da" gyid: mid" kyang dain: joem keung: youg: joem houg mo da" jonu" dangain"- cid" shang: wa da" gyid jarung: yo' houg: mo da" azuang.

⁴⁰Vang" khyam: shid re" yabkyo' pain" ruang: joem houg: mo da" zeing yo' akhyid: joem vang" khyam: khoem" shid re" yabkyo' pain" ruang: yo' houg: mo da" tei" joem zoem" sang" jham" yo' zoem" moo ci: ca" da" jonu" dangain".

⁴¹Khainjung yi gyeung" shang: joyoo moo moo" zei: wa uri void wa shid re" byimi joem khainjung Arun yo' nya: yuggi zoo: yi void wa shid re" gyeung" shang: byimi joem ri ci: yhi: bye:.

⁴²Israela byumyu" yigi ASEING wigi Moshe ri amyeing" byid: to" da" ziyo' dakhyoo" ti" moo" zoo" dangain" ri bain koid bye:.

⁴³Moshe gi ASEING amyeing" byid: to" ziyo' dakhyoo" ti" nyangnu" koid to" da" jonu" dangain" ziri cang yu" da:. Houg: yoomo nyangnu" ri Moshe mainkaid byid: bye:.