Read Lashi THU' LO" MOUGSOUG" 4 Bible Online

THU' LO" MOUGSOUG" 4 - Lashi bible

THU' LO" MOUGSOUG" 4

¹Houg: lang" Moshe gi «Ngoo bo pang" loug Israela byumyu" yi ngoo ri loem" zi anghoid- ngoo tid ziri we' tam" gyoo: wa zi anghoid. Ngoo ri nang thu shug ein: ziri nyangnu" aloem" nghoid ri ngoo khasu" koid wa la"» ga: ASEING ri tid kyo".

²Houg: yoomo ASEING gi «Nang ce: noem ci: to" la"» ga: nyang: ri myid:. Nyang: gi «Lhamdung: dakhaid ci:» ga: tid.

³ASEING gi «Myid jang khyoo: du" kaid yu" we'» ga: tid. Moshe du" khyo' kaid lang" lhangmyu bue" lo lho: nyang: we' houg mo phang: khare".

⁴Houg: lang" ASEING gi Moshe ri «Re" lo, ri yhoin" kaid wigi shamyi: thang: mo zei: lho: koid: we'» ga: tid. Houg: yoomo Moshe gi yhe: koid: yu lang" lhamdung: doem bue" byug bye:.

⁵ASEING gi «Hougsu" koid lang" nyangnu" phoug" phyid" da" Mangsoo- Abraham- Isag- Yaku da" Mangsoo Ngoo ASEING re" jang" moo thu shug da" sagse: nghoid» ga: tid..

⁶ASEING gi Moshe ri «Re" lo, ri re" byikhoug: moo kaid yu" we'» ga: lang" Moshe gi nya: lo, kaid kaid lho: doem she: thu yu ri gyu: yhang: ti" phyu: phyu: acab' cab' dab da" noo dam bue" jo,

⁷Houg: lang" ASEING gi «Re" lo, ri re" byikhoug: moo daleing: doem kaid yu" we'» ga: tid. Nyang: hougsu" koid wigi lo, ri doem she: thu lang" akhang: yhang: ti" ge byug bye:.

⁸ASEING gi «Nyangnu" nang koid da" xang: shi" mau" pho" alhoo: again khyo" ase' gyo:- aloem" nghoid rigi thang: lheing: ri se' gyo: boem wa.

⁹Mau" pho" alhoo: again eig loem: goin" khyo" we' nang ri aloem"- nang citid ziri atam" gyoo: nghoid rigi Nila gyid lang mo gyid dajhi' ri yhe: kham: yu lho: myidjang moo foid khyoo' we'. Gyid gi suid" bue" loo" wa» ga: tid.

¹⁰Nghoid loug we' Moshe gi «ASEING we" ngoo ri anhang:. Ngoo gi dang: nyeing" se' tid su: anghoid. Nang ngoo ri shid moo tid yhang: ti" nyeing" bui" zi anghoid. Ngoo gi nhoid lhid:- dang: ajoeb byeing"-yhoo: tei" su: nghoid».

¹¹ASEING gi nyang: ri «Byu da" nhoid ri hang" byid: to" lha". Nu: jed ziyo' koo" su:- myo, myang ziyo' myo, jed ri hang" phain" so: to" lha". Ngoo ASEING phain" so: to" zi nghoid.

¹²Akhid"- yhe: we' nang dang: tid uri ngoo bo pang" wa nang citid wa ziri ngoo tid khyoo" wa» ga: tid.

¹³Nghoid loug Moshe gi «Anghoid ASEING we" jeju" mo gootu: dayug yug ri danhang: we'» ga: tid.

¹⁴Houg: lang" ASEING gi Moshe ri Nheig yo: ziyo' «Levi byumyu" Arun nghoid da" re" mang: gi khasu" lha". Nyang: dang: nyeing" yo" tid zi ngoo se'. Akhid" nyang: nang yo' shoug" goo" wa shid mo re" nyid abye:. Nyang: nang ri shoug" go" ri gye" gau wa zi nghoid.

¹⁵Nang nyang: ri dang: yo" tid wa nghoid yoomo nang cenoem tid wa ein: zi nyang: ri tid kyoo" we'. Re" eig yug goin" citid wa ein: zi ngoo bo pang" wa. Re" eig yug goin" cikoid wa ein: zi ngoo tid kyoo" wa.

¹⁶Nyang: gi byumyu" yi shidkhoin" moo re" dang: tid su: nang ri bo tid byid: su: bue" wa nghoid. Nang we' Mangsoo yhang: ti" nghoid wigi citid wa zi nyang: ri tid kyo" nyid wa nghoid.

¹⁷Nang koid shug wa da" mau" pho" moo" zoo" shid re" he: lhamdung: rigi nang yo' dage" ci: too" we'» ga: tid.

¹⁸Houg: lang" Moshe gi nya: yug phoo Yethru jhang lo" lho: nyang: ri «Egutu mung" mo nga" bidnoem yi nyid shi" go" la'. Ngoo lo" yu" nau:- jeju" mo nhang: kaid la» ga: tid lang" Yethru we' myid veing" lho: goolho' so" yhe: lo" we' ga: pyeung: kaid da:.

¹⁹Moshe gi Midian mung" moo nyid shi" ayo, ri ASEING gi nyang: ri «Egutu mung" khyoo: doem tau" loo" we'. Ciwim gari nang ri said wa ga: soin' nyid mo, dangain" shid: bye:» ga: tid.

²⁰Houg: yoomo Moshe gi nya: myi:-nya: zoo: yiri loo zei: moo zhung: nhang:- Mangsoo nyang: ri ci: we' ga: tid to" da" lhamdung: we' ci: lho: Egutu khyoo: thu yhe: lo" boem bye:.

²¹ASEING Moshe ri «Nang Egutu mung" moo yhe: ju" uri nang ri ngoo ab byid: da" yoem: so' mau" pho" alhoo: again ri khokham shidkhoin" moo gyeing" nyang: koid ca" wa zi nghoid. Nghoid loug we' khokham phoo ri ngoo nheigloem: thain: nhang: wa nghoid wigi nyang: gi byumyu" yiri nhang: kaid wa zi anghoid.

²²Houg: lang" nang gi Ngoo ASEING tid ‹Israela gi nga" zooshid" yuggi zoo: nghoid

²³Nyang ngoo ri noku wa shid re" nhang: kaid we' ein: ri nang anhang: kaid. Akhid" ngoo re" zooshid" ri said pyam wa› ein: nyang: ri tid ca"» ein: Moshe ri tid kaid.

²⁴Egutu mung" khyoo: yhe: lo" da" nooyoo daloem moo ASEING gi Moshe ri re" shau" wigi nyang: ri said wa shid re" soin' nyid.

²⁵Houg: lang" nya: myi: Zhiphura gi tho' da" lug sham: thoo" ri yu lho: nya: zo: shooyid thang: yham" wigi Moshe da" khyid: moo yhe: thung" tain" bye:. Shoo" yid thang: yham" noku thung" mo nghoid yoomo nyang: gi Moshe ri «Nang gi nga" jang" moo suid" dab da" yhoem: seing phoo nghoid» ga: tid. Houg: lang" ASEING gi Moshe da" kangso' ri loid byoin nhang: bye:.

²⁷Houg uri ASEING gi Arun ri dain" pyoid yoo khyoo: yhe: lho: Moshe ri yhe: shoug" we' ga: tid. Houg: lang" nyang: gi gyeung" shang: boem moo yhe: shau" wigi nyang: ri myang yo' dage" babug bug da:.

²⁸Hau: thang: ri Moshe gi Arun ri Egutu mung" khyoo: nyang: yhe: loo" wa khyoo: yo' ASEING nyang: ri tid bye: khyoo: dangain" yo' nyang: koid wa, hau: ASEING tid too" bye: da" mau" pho" alhoo: again ri tid kyoo" bye:.

²⁹Houg: lang" Moshe yo' Arun Egutu khyoo: yhe lho: Israela byumyu" vhujhung: yi dangain" ri dage" khe: zheing" too" bye:.

³⁰Arun gi nyangnu" ri ASEING Moshe ri koid nhang: khyoo: dangain" ri tid kyoo" wigi Moshe we' byu yi shidkhoin" moo mau" pho" alhoo: again dangain" ri koid shug bye:.

³¹Nyangnu" loem khau: bye: ziyo' ASEING nyangnu" jhang re" lho: nyangnu" da" yau: khe" kyi" khyeug khyoo: ri re" yu" ga: zi shoug" gyoo: lang" nyangnu" goeb pid wigi noku boem bye:.