Read Lashi THU' LO" MOUGSOUG" 40 Bible Online

THU' LO" MOUGSOUG" 40 - Lashi bible

THU' LO" MOUGSOUG" 40

¹ASEING gi Moshe ri

²«ASEING shidkhoin" zoem" ri lhammoo" dakhyab da" xang: shi" nyid" ri koid wa zi nghoid.

³Hau: akhoug: moo Dang: theing khoin" bo da" Dang: Theing Kuid: ri kaid too" wa nghoid wigi hau: shidkhoin" moo yabkyo' pain" ruang: too" wa zi nghoid.

⁴Zoobui" ri we' yu vang lo" wigi jonu" joem ri houg: moo to" too" wa zi nghoid. Myizeing ri we' yu vang lo" wigi houg: moo: myikug ke" too" wa zi nghoid.

⁵Nam pyo: xoin" nghe' wa shid re" Dang: Theing Kuid: shidkhoin" moo sheing: phoin: ri to" wigi zoem" khoem" duang: moo yabkyo' pain" ruang: ri lhang" too" wa zi nghoid.

⁶Zoem" da" shidkhoin" moo myi: nghe' xoin" ngei" wa shid re" phoin: to" too" wa zi nghoid.

⁷Zoem" yo' phoin: agyoo: moo cid" yung" cid" lho' jarung: ri to" to" wigi houg moo gyid kaid too" wa zi nghoid.

⁸Lheing khab' vang" khoem" kyam' wigi hau: vang" khoem" moo yabkyo' pain" ruang: lhang" too" wa zi nghoid.

⁹«Zoem" yo' jonu" dangain" jang" moo mainkaid xu: joid wigi shugbyid: lho: hau: zigi gyeung" shang: loo wa.

¹⁰Hau: thang: phoin: yo' houg: moo jonu" dangain" ziri mainkaid xu: joid wigi shugbyid: ge'. hau: zigi bain sho' gyeung" shang: wa zi nghoid.

¹¹Cid" yung" cid" lho' jarung: yo' houg mo da" tang ri we' dakhyoo" ti" koid lho: shugbyid: we'

¹²«Arun yo' nya: zoo: yuggi zoo: yiri zoem" khoem" duang: khyoo: shu" lo wigi nyangnu" thung" ri: khyo" gung cid" byid: wa tid we'.

¹³Arun ri khainjung byimi foid- xu: joid byid: we' nyang: gi ngoo ri khainjung khyo" wigi yo" dei byid: wa shid re" nyang: ri hid: su" koid lho: shugbyid: we'.

¹⁴Nya: zoo: yiri shu" lo wigi nyangnu" ri byimi foid we'.

¹⁵Hau: thang: nyangnu" khainjung yi khyo" ngoo ri yo" dei byid: wa shid re" nang nya: ba" ri koid yhang: ti" nyangnu" ri mainkaid xu: joid byid: we'. He: mainkaid xu: joid byid: ziri ju" loo wa ayo, nyangnu" ri khainjung yi bui" nhang: loo wa» ga: tid.

¹⁶Moshe gi ASEING amyeing" byid: gu: dangain" ri koid bye: zi nghoid.

¹⁷Hougsu" yoomo ASEING da" zoem" ri nyangnu" Egutu mo thu lo thang: eig zain ein: zain lhammoo" dakhyab- xang: shi" nyid" ri koid too" bye: zi nghoid.

¹⁸Moshe gi akhyid: lugpyi" joem ri to"- seig khyam" zuang- keung: pyi: tab wigi zeing joem zhug bye:.

¹⁹Nyang: gi ASEING amyeing" dang: yo' dakhyoo" ti" zoem" mhang" moug: ri pei: wigi hau: atho' moo moug: too" bye: zi nghoid.

²⁰Hau: thang: nyang: gi lugpyi" eig pyi" ri yu wigi hau: joem ri Dang: Theing Kuid: moo kaid bye:. Nyang: gi keung youg: joem ri koid: mo lo, zei: theing" khuang moo jhu: zei wigi hau: atho' moo amyhed" myhid" too" bye:.

²¹Hau: thang: nyang: gi koid: ri zoem" akhoug: moo to" wigi yabkyo' pain" ruang: ri khyo' lhang" too" bye:. Hougsu" khyo" wigi nyang: gi Dang: Theing Kuid: ri ASEING amyeing" dang: yo' dakhyoo" ti" go too" bye:.

²²Nyang: gi zoobui" ri zoem" da" akhoug:- mougzhung: shoid- yabkyo' pain" ruang: da" nghi: moo to" wigi

²³ASEING amyeing" dang: yo' dakhyoo" ti" hau: atho' moo ASEING ri xoin" to' wa da" zooyho' ri ke" too" bye:.

²⁴Nyang: gi myizeing ri zoem" da" akhoug: zoobui" jo, ziyo' tu' tab nghoid da" mougpyi: shoid moo to" too" bye:.

²⁵ASEING da" amyeing" dang: yo' dakhyoo" ti" nyang: gi ASEING shidkhoin" moo myikug joem ri tug too" bye:.

²⁶Nyang: gi sheing: phoin: ri zoem" da" akhoug: yabkyo' pain" ruang: shidkhoin" moo to" wigi

²⁷ASEING da" amyeing" dang: yo' dakhyoo" ti" nam pyo: ja: xoin" ri nghe' bye: zi nghoid.

²⁸Nyang: gi zoem" khoem" duang: mo yabkyo' pain" ruang: ri lhang" wigi

²⁹Hau: yabkyo' pain" ruang: shidkhoin" moo myi: nghe' xoin" ngei" wa shid re" nyang: gi phoin: ri too" bye:. ASEING da" amyeing" dang: yo' dakhyoo" ti" hau: atho' moo nyang: gi myi: nghe' xoin" yo' shivoo: xoin" ri ngei" byid: bye: zi nghoid.

³⁰Nyang: gi cid" yung" cid" lho' jarung: ri zoem" yo' phoin: agyoo: moo to" wigi gyid kaid to" da:.

³¹ASEING da" amyeing" dang: yo' dakhyoo" ti" khanham nghoid nghoid- Moshe- Arun yo' nya: zoo: yi zoem" khoug: khyoo: nghoid nghoid- phoin: khyoo: nghoid nghoid vang lo" uri nyangnu" gi hougmoo: nyangnu" khyid: lo, cid" ago".

³³Moshe gi zoem" yo' phoin: ri lheing khab' mo khyam: kyam' wigi vang" khyam: khoem" moo yabkyo' pain" ruang: lhang" da:. Hougsu" wigi nyang: gi moo" zoo" dangain" bain koid abye:.

³⁴Hau: thang: jhoemmoug" thei" gi zoem" ri nghoeb pyam lho: ASEING phung" yoeb gi hau: jang" moo byeung" sho' bang jo, da:.

³⁵Houg: yoomo zoem" khoug: khyoo: Moshe gi ayo" vang loo" nghoid da:.

³⁶Israela byumyu" yigi jhoemmoug" zoem" mo dang: do, loo" lang" nyangnu" dab mo gootu: joyoo khyoo: yhe: lo" boem ago".

³⁷Jhoemmoug" hougmoo: dajo, jo, gi nyangnu" gi nyangnu" dab mo athu goo" nghoid da:.

³⁸Nyangnu" da" gyung: khyoo: dangain" moo ASEING phung" yoeb jhoemmoug" pung ri nyid" gung lang" zoem" yhoemkhung: tho' moo jo, wigi myen" lang" hau: da" jang" moo myi: bang nyid zi yo" myang boem ago".