Read Lashi THU' LO" MOUGSOUG" 7 Bible Online

THU' LO" MOUGSOUG" 7 - Lashi bible

THU' LO" MOUGSOUG" 7

¹ASEING gi «Khokham shidkhoin" moo nang ri ngoo Mangsoo yhang: ti" koid nhang: wigi re" mang: Arun ri re" lapi: khyo" khokham phoo ri dang: tid loo wa.

²Ngoo nang ri byid: to" amyeing" dangain" ziri Arun ri tid kyoo" we'. Nyang: gi Israela byumyu" yiri nya: mung" mo thu lo" wa shid re" khokham jhang yhe: tid wa.

³Nghoid loug we' ngoo gi khokham ri nheigloem: thain: nhang: wigi gyoug pho" moo" zoo" myoo: sho' ri Egutu mung" moo koid shug loug we' nyang: gi nanu" tid ziri tam" gyoo: wa zi anghoid. Hau: thang: Ngoo gi Egutu mung" ri gye" xo: da" yooboo dam byid: wigi nga" byumyu" yiri hau: mung" mo shu" thu loo wa.

⁵Ngoo gi nga" lo, ri tu: yeing wigi Egutu byumyu" yiri gyi koid lho: nyangnu" mung" mo Israela byumyu" yiri shu" thu lo uri ngoo ASEING nghoid ziri nyangnu" si' goo" wa.

⁶Moshe yo' Arun gi ASEING Amyeing" byid: to" ziri koid bye:.

⁷Nya: tang: khokham jhang dang: yhe: tid ayo, ri Moshe gi shid xi: zain nghoid wigi Arun gi shed xe: soem" zain nghoid bye: ago".

⁸ASEING gi Moshe yo' Arun ri

⁹«Khokham gi re" tang: ri re" tang: se' koid da" mau" pho" moo" zoo" koid shug ge' ga: tid nghoid ri Arun ri re" lhamdung: yu wigi khokham shidkhoin" moo du" kaid we' houg zigi lhangmyu bue" wa ein: tid we'» ga: tid.

¹⁰Houg: lang" Moshe yo' Arun khokham jhang yhe: wigi ASEING amyeing" byid: to" ziyo' dakhyo" koid ago". Arun gi nya: lhamdung: ri khokham yo' nya: gyizoug: yi shid moo du" kaid lang" houg zigi lhangmyu bue" lo" byug bye:.

¹¹Houg: lang" khokham gi nya: phajhi" boo mo, yo' fa" mo, ri khe: wigi nyangnu" we' nyangnu" da" fa" phajhi" yo' du go" ziri koid bye:.

¹²Nyangnu" lhamdung: ri du" kaid lang" hau: lhamdung: joem gi lhangmyu joem bue" lo" byug bye:. Nghoid loug we' Arun da" lhamdung: gi nyangnu" da" lhamdung: joem ri myhau: pyam bye:.

¹³Nghoid loug we' khokham gi nheigloem: thain: wigi ASEING tid ziyo' dakhyoo" ti" za: Moshe yo' Arun da" dang: ri atam" gyoo: nghoid da:.

¹⁴Hau: thang:- ASEING wigi Moshe ri «khokham gye" nheigloem: thain: ziyo' byumyu" yiri nhang: kaid wa he: pyam da:.

¹⁵Houg: yoomo nab soin: khokham phoo Nila gyid lang khyoo: gyoo" yhe: uri yhe: shoug" we'. Lhangmyu bue" lo da" lhamdung: ri nang ci: wigi gyid lang yam moo nyang: ri yhe: lang" nyid we'.

¹⁶Hau: thang:- khokham ri ‹Hebre byumyu" yi da" ASEING Mangsoo gi nya: byumyu" yi dain" pyoid yoo mo nyang: ri yhe: yo" noku wa nhang: kaid byid: wa shid re" nang ri tid wa ngoo ri nhang: kaid da:. Nghoid loug we' akhid" ju" sho' nang atam" gyoo: byid: nghoid da:.

¹⁷Akhid" Aseing: khokham we" ASEING gi nyang: hang" nghoid ga: ziri nang myang si' wa shid re" nyang: koid wa ziri yu" we'. Ngoo he: lhamdung: yo' gyid dang moo baid ri gyid gi suid" bue" lo" wa.

¹⁸Wimdo, joem shid: wa. Gyid lang gi Egutu byumyu" yi ayo" shug loo sho' gyoem: shoem: nam wa› ga: tid we'» ga: tid da:.

¹⁹ASEING gi Moshe ri «Arun ri re" lhamdung: ri ci: wigi Egutu mung" mo gyid lang- gyid khyoo"- gyid thoem" dangain" adang moo zei: yeing too" we'. Gyid gi suid" bue" loo" wa nghoid. Gyid thug lug yam: akhau: moo we' mung" dain goin" moo we' suid" kyeing" kyeing" bue" jo, wa zi nghoid» ga: tid.

²⁰Hau: thang: Moshe yo' Arun gi ASEING amyeing" yo' dakhyoo" ti" koid bye:. Khokham yo' nya: gyizoug: yi shidkhoin" moo Arun gi nya: lhamdung: ri tu: wigi gyid dang moo baid lang" gyid dangain" gi suid" bue" lo byug ago".

²¹Gyid lang mo wimdo, joem shid: wigi Egutu byumyu" yi ayo" shug sho' houg gyoem: shoem: gi gye" boeb nam nyid. Egutu mung" dangain" jang" moo suid" kyeing" kyeing" nghoid nyid.

²²Hau: thang:- khokham da" fa" mo, we' nyangnu" fa" phajhi" yo' hougsu" nyang: koid ago". Khokham we' shid phyang" yo' dakhyo" nheigloem: thain: nyid. ASEING tid ziyo' dakhyoo" ti" khokham phoo gi Moshe yo' Arun da" dang: ri ngeug pyam da:.

²³Hau: gungthid nyang: gi nya: khokham kho" khyoo: tau" loo" wigi houg ziri cishu: anhang: loo: nyid nyid da:.

²⁴Egutu byumyu" yi dangain" gi gyid lang mo gyid age shug yoomo gyid shoug" shug wa shid re" gyid yam cang wigi gyid thung" du: boem bye: ago".

²⁵ASEING wigi gyid moo baid zigi nyhed nyid" byeung" lid bye:.