Read Lashi THU' LO" MOUGSOUG" 8 Bible Online

THU' LO" MOUGSOUG" 8 - Lashi bible

THU' LO" MOUGSOUG" 8

¹Hau: thang: ASEING gi Moshe ri «Khokham jhang yhe: wigi ASEING tid zigi ‹Nyangnu" ngoo ri yo" noku baja" nga" byumyu" yiri nhang: kaid we'.

²Nang ngeug pyam nghoid rigi ngoo re" mungdain: moo pooleig byeung" sho' nghoeb pyam nhang: khyoo" wigi yooboo dam byid: wa.

³Nila gyid lang moo pooleig gye" byeung" re" wigi hau: zi thu lo wigi re" khokham kho"- re" yhoeb yab- re" yoeb yoo- re" gyizoug: yi yhoem: joem re" byu yi re" zooyho' phoid da" myikhyoem yo' zooyho' kang: da" oug" phain' khyoo: lang" do, lo boem goo" wa.

⁴Nyangnu" gi re" gung moo we'. Re" byu yi gung moo we' re" gyizoug: yi gung moo we' byam do, loo wa› ga: yhe: tid we'» ga: tid da:.

⁵ASEING gi Moshe ri «Arun ri re" lhamdung: ri gyid lang- gyid khyoo"- gyid thoem" dangain" adang moo yeung too" we' houg: lang" pooleig joem thu lo wigi Egutu mung" ri nghoeb pyam baja" ein: tid we» ga: bye:.

⁶Houg: lang" Arun gi lhamdung: ri gyid moo tu: yeing: too" lang" pooleig joem thu lo wigi mungdain: ri nghoeb pyam ago".

⁷Fa" mo, we' nyangnu" phajhi" yo' nyangnu" we' mung" moo pooleig thu loo sho' koid bye:.

⁸Khokham gi Moshe yo' Arun ri khe: wigi «He: pooleig joem ri yu pyam wa shid re" ASEING ri akyu" mho' byid: ge'. houg: lang" re" byu yi yhe: wigi ASEING ri yo" noku wa shid re" ngoo nyangnu" ri nhang: kaid byid: wa» ga: tid da:.

⁹Moshe gi «Re" shid mo akyu" mho' byid: wa yoomo ngoo gau nyid. Re" shid mo re" gyizoug: yi shid mo re" byu yi shid mo ngoo akyu" mho' byid wa ayo, ri dang: phyed byid: we'. Hau: thang: Nila gyid lang mo lid pooleig joem ri yo" khaid pyam wa nghoid» ga: tid bye:.

¹⁰Khokham gi «Nga" shid re" nab kyoo' mho' byid: we'» ga: tid. Moshe gi «Ngoonu" ASEING Mangsoo yhang: te" mangsoo gootu: anyid zi nang si' baja" nang tid ziyo' dakhyoo" ti" ngoo mho' wa nghoid.

¹¹Nang we' re" gyizoug: yi we' re" byu yi we' hau: pooleig ri thu loo" nhang: loo goo" wa. Nila gyid lang mo lid wigi kha: khyi' moo we' anyid loo: wa» ga: tid.

¹²Hau: thang: khokham jang" mo Moshe yo' Arun thu lo" wigi Moshe gi khokham jhang nyang: nyhid: to" pooleig joem phang: loo" wa shid re" ASEING jang" moo akyu" mho' byid: bye:.

¹³ASEING gi Moshe mho' ziyo' dayhang: ti" koid byid: wigi yhoem: joem yhoem: vang" joem khyam: joem mo pooleig joem shid: byug bye:.

¹⁴Egutu byu yi hau: ziri ye: koid: boem to" wigi damung" goin" boeb, shoem: nam nyid da:.

¹⁵Pooleig joem shid: jo, zi khokham myang lang" nyang: nheigloem: doem thain: lo wigi ASEING tid ziyo' dakhyoo" ti" Moshe yo' Arun dang: ri khokham atam" gyoo: nghoid da:.

¹⁶ASEING gi Moshe ri «Arun ri nya: da" lhamdung: yo' myidgung moo baid we' houg: lang" Egutu mung" moo jo, da" pheilhoug: dangain" gi pyoeb bue" loo" wa zi nghoid» ga: tid.

¹⁷Houg: lang" Arun gi nya: lhamdung: yo' myidgung moo baid kaid ri Egutu mung" mo pheilhoug: dangain" pyoeb bue" lo" wigi byu yi dang moo we' gougnyhoug adang moo we' nghoeb pyam bye:.

¹⁸Fa" mo, we' nyangnu" phajhi" yo' pyoeb thu loo sho' koid yu" ri abui" nghoid ago". Pyoeb joyoo khang" moo" moo nyid da:.

¹⁹Fa" mo, gi khokham ri «He: zi Mangsoo koid zi danghoid» ga: tid ago". Nghoid loug we' khokham nheigloem: thain: wigi ASEING tid ziyo' dakhyoo" ti" Moshe yo' Arun dang: ri khokham atam" gyoo: nghoid da:.

²⁰ASEING gi Moshe ri «Nab kyoo' nab soin: no' mo yhe: wigi gyid lang khyoo: yhe: lo" da" khokham yo' yhe: shoug" go" lho ASEING tid zigi ‹Nga" byu yi ngoo ri yo" noku wa shid re" nyangnu" yhe: loo" wa nhang: byid: we'.

²¹Nang ngeug pyam nghoid rigi ngoo re" jang" moo we' re" gyizoug: yi jang" moo we' re" byu yi jang" mo we' mhoo' joem nhang: kaid khyo" wigi nang ri yooboo dam byid: wa. Egutu byumyu" yi yhoem: dangain" jang" moo mhoo' joem byeung" loo wa zi nghoid. Myidgung moo we' hau: joem yo' nghoeb pyam wa zi nghoid.

²²Nghoid loug we' nga" byu yi nyid da" Goshen mung" moo mhoo' joem anyid nhang: loo: sho' ngoo loid byoin nhang: wa. Ngoo hougsu" koid zigi ngoo ASEING he: mung" moo moo" zei: nyid ein: ziri nang si' wa shid re" nghoid.

²³Nga" byu yi yo' re" byu yi agyoo: moo ngoo bang bang kho' too" wa zi nghoid. He: mau" pho" alhoo: again gi nab kyoo' bue" loo wa nghoid› ein: tid we'» ga: tid.

²⁴ASEING gi gye" myo: da" mhoo' joem ri khokham pho da" khokham kho" yo' nya: gyizoug: yi yhoem: khyoo: nhang: kaid bye:. Egutu mung" dangain" gi hau: mhoo' joem wigi bain phyo' shoin' lo" nyid bye:.

²⁵Hau: thang: khokham gi Moshe yo' Arun ri khe: yu wigi «He: mung" moo yhe: lho nanu" Mangsoo ri xoin" yhe: ngei" byid: ge'» ga: tid.

²⁶Moshe gi «Hougsu" koid zi ajoo wa Ciwim gari ngoonu" da" ASEING Mangsoo ri xoin" to' wa zi nghoid da" ngoonu" da" gougnyhoug joem ri xoin" ngei" byid: yoomo Egutu byumyu" yi ngoonu" ri gyi koid loo goo" wa. Ngoonu" gi hau: gougnyhoug joem ri ci: wigi hau: joem ri nyangnu" myang da" joyoo mo xoin" ngei" byid: nghoid rigi ngoonu" ri lugzeing wigi du" said pyam loo goo" wa.

²⁷Ngoonu" ri nyang: amyeing" byid: to" ziyo' dakhyo"- ngoonu" da" ASEING Mangsoo ri xoin" ngei" byid: wa shid re" ngoonu" gi dain" pyoid yoo khyoo: soem" nyid" so" yhe: ca" da:» ga: tid.

²⁸Khokham phoo gi «Nanu" vi: khyoo: ayhe: nghoid rigi ngoo nanu" ri nanu" da" ASEING Mangsoo ri yhe: noku xoin" to' wa shid re" dain" pyoid yoo khyoo: yhi: wa akhang" byid: wa. Nga" shid re" we' akyu" bo mho' byid we'» ga: tid.

²⁹Moshe gi «Ngoo thu lo" wigi nab kyoo' nyang: re" jang" mo we' re" gyizoug: yi jang" mo we' re" byu yi jang" mo we' hau: mhoo' joem bei: loo" sho' ASEING jang" moo ngoo akyu" mho' byid: wa. Nghoid loug we' byumyu" yi ASEING ri yhe: noku xoin" to' wa jang" mo toem' khyo" wigi ngoonu" ri nang daleing adoem ge: mhau'» ga: tid.

³⁰Moshe gi khokham pho jang" mo thu lo" lho: ASEING ri akyu" mho' da:.

³¹ASEING gi Moshe mho' ziyo' dakhyoo" ti" koid byid: bye:. Khokham jang" mo we' nya: gyizoug: jang" mo we' nya: byumyu" yi jang" mo we' mhoo' joem dadu: we' anyid losho' bei: lo" byug da:.

³²Nghoid loug we' khokham koem' gi hau: ayo, ri we' nheigloem: thain: wigi byumyu" yiri yhe: wa akhang" abyid: nghoid da:.