Read Lashi YOBA 1 Bible Online

YOBA 1 - Lashi bible

YOBA 1

¹Uza mung" moo Mangsoo ri noku wigi nyang: ri jhug zug da" Yoba ga: su: dayug nyid da:. Nyang: gi byu gi nghoid wigi akhyeing" ashoeb da" moo" ci: we' akoid loo sho' nyid da:.

²Nyang: gi yug gi zoo: nyhed yug yo' myiyi: zoo: soem" yug yo" da:.

³Houg: lho: yang nyhed khyeing"- Gola-ug soem" khyeing"- nu: dakhyeing" yo' loo zei: wim: shoo: du: yo" da:. Nyang: gi dei zoo: we' myoo" sho' yo" wigi bidthu shoid mung" mo dangain" tho' jonu" yo" thang su: nghoid da:.

⁴Yoba da" yuggi zoo: yigi dayug dalheing: pui" koid lho: mang: nhung" gootu: we' re" bo boem ziyo' nya: nhammoo" soem" yug ri we' lhung bo khe: ago".

⁵Pui" koid bain khang" moo" thang: nyid" nab soin: Yoba gi no' mo yhoeb so" to' lho: nya: zoo: yi yugkhang" moo" ri kyeing sain' byid: wa shid re" xoin" lhung ngei" byid: da:. Nyang: khanham we' hidsu" ciwim lhung koid ga: ri nya: zoo: yi mo dayug yug gi aboin: asoo" lho: Mangsoo ri rue" da" khyo" yooboo shoid goo" abe ga: myid wigi nghoid da:.

⁶Mougkhung: moo nyid bang: gi ASEING jhang re" thu shug wa ayo, ju" loo lang" nyangnu" phung: gung moo Satan we' yhe: bo nyid nyid da:.

⁷ASEING gi nyang: ri «Nang ci lhung koid nyid la"» ga: myid. Satan gi «Ngoo gi hid: khyoo: thei: khyoo: so" yen" lho: mougmyid ri koem" nyid» ga: tid da:.

⁸ASEING gi «Nga" dei zoo: Yoba ri shau" myang rhe" Mougmyid dang moo nyang: yhi' jhug zug wigi ge zi dayug we' anyid. Nyang: gi ngoo ri noku wigi akhyeing" ashoeb da" moo" daja: we' akoid loo sho' zid" nyid da» ga: tid.

⁹Satan gi «Yoba gi ce: akyu" ashau" yu loo: nang ri noku wa la".

¹⁰Nang gi nyang: yo' nya: yhoem: byu yiri yo' nyang: yo" seing: to" zi ja: khang" ri goem loem byid: da:. Nyang: koid da" moo" ja: khang" moo" moo nang mainkaid byid: lho: damung" goin" ri yo" doo" zho" da" nu: joem nyang: ri byid: to" da:.

¹¹Nyang: yo" zi dangain" ri nang to' shoem" yu pyam nghoid rigi nyang: gi nang ri re" myo, shid ti: moo nheing" loo wa» ga: tid da:.

¹²ASEING gi Satan ri «Nghoid bye:. Nyang: yo" da" zi ja: khang" moo" gi re" yoem: so' khoug: moo nghoid da:. Nghoid loug we' Yoba nyang: rigi nang dam ayo" tab nhang: wa» ga: tid da:. Houg: lho: Satan we' to' lo" byug da:.

¹³Danyid" nyid ri Yoba da" nya: zoo yigi nyangnu" da" mang: moo" yhoem: moo pui" koid nyid uri

¹⁴Lagyoo: dayug Yoba jhang tang" re" da:. Nyang: gi «Ngoonu" gi nuloo: joem yo' yoothung" phug nyid uri loo zei: joem gi aqei: ayam mo coung" yoo moo nyid boem ago".

¹⁵Sheba byu yi nyeigdain tung" re" khaid zain: wigi hau: joem dangain" ri lhoid yu pyam ago". Nyangnu" gi ngoo mo lid wigi re" dei zoo: dangain" ri said pyam ago". Ngoo dayug za: nang ri lu dang: tid khyoo" wa phang: loid lo» ga: tid da:.

¹⁶Nyang: dang: thang: abain said shi" ri gootu: dei zoo: dayug doem lo lho: tid zigi «Yang joem yo' yang zung" bang: ri moug: goin said pyam bye:. Ngoo dayug za: phang: loid lo wigi nang ri lu dang: lo yo" tid kyo" zi nghoid» ga: tid da:.

¹⁷Nyang: dang: thang: abain said shi" ri gootu: dei zoo: dayug doem lo lho: tid zigi «Khalde byu soem" phung: ngoonu" ri re" khaid zain: wigi Gola-ug joem ri re" lhoid yu pyam byid: ago". Ngoo mo lid wigi re" dei zoo: gootu: dangain" ri we' said pyam ago". Ngoo dayug za: phang: loid lo wigi nang ri lu dang: lo yo" tid kyo" zi nghoid» ga: tid da:.

¹⁸Nyang: dang: thang: abain said shi" ri gootu: dei zoo: dayug doem lo lho: tid zigi «Re" zoo: yigi nyangnu" da" mang: moo" yhoem: moo pui" koid nyid uri

¹⁹Dain" pyoid yoo khyo" thain: da" uglid hau' lo da:. Hau: lid yoem" gi yhoem: ri lo hau' khyoeb pyam lho: nyangnu" dangain" bang: ri said pyam abye:. Ngoo dayug za: phang: loid lo wigi nang ri lu dang: lo yo" tid kyo" zi nghoid da» ga: tid.

²⁰Houg: lang" Yoba gi to' yab re" lho: byimi ri lang: ceig pyam ziyo' koug ngau nyid da:. Nyang: gi vhu" dung: dung: pyam wigi nya: myonhoo: myidgung khyoo: goeb zhug to" da:.

²¹Nyang: gi «Ngoo ci we' aci: loo: khu: re" wigi ci: we' aci: loo shid: loo" wa. ASEING byid: wigi akhid" nyang: doem yu pyam byid: da:. Mangsoo myeing ri coung" nghei boem shang o"» ga: tid.

²²Yoba gi bue" loo bye: ja: khang" moo" shid re" Mangsoo ri yooboo foin: da" khyo" yooboo ashoid nghoid da:.