Read Lashi YOBA 10 Bible Online

YOBA 10 - Lashi bible

YOBA 10

¹Ngoo gi nyid ngheing" bye: Nga" nheig khoo" yo: mho' yoid thui: ri tam" gyoo: byid: la.

²Mangsoo we"- ngoo ri dang: aphyed byid:. Ngoo ri tid kyoo" la. Ngoo ri yooboo zhug zi ce: sei: yoomo nghoid lha".

³Nang hid yhi' amyen akhyoid yen' zigi jo, rhe". Nanyang: phain" so: to" zi ge ngheing" rhe". Houg: lho: akhyeing" bang: soin' moo" ri yi noug soem" si' yo" yi ri ge la".

⁴Ngoonu" myang ziri nang myang rhe".

⁵Re" apyaid gi ngoonu" apyaid yhi leung" rhe".

⁶Houg ri ciwim nang gi nga" yooboo joem ri cang yu" wigi ngoo shoid da" yooboo ja: khang" moo" ri cang sho: yen" la".

⁷Ngoo yooboo ayo" ziyo' ngoo ri hang" wigi we' re" lo, mo ayo" khyoid yu ziri nang se' da:.

⁸Re" lo, wigi ngoo ri azuang koid lho: gung koid to" da:. Houg: lho: hau: lo, wigi nyang: ngoo ri phyo' shoin' pyam da:.

⁹Nang ngoo ri myidzhoo" mo koid to" ziri myid boin: we'. Nang gi ngoo ri pheilhoug: boem" khyoo: doem baid khyoeb mhoin' pyam wa la".

¹⁰Ngoo ri khu: myu: wa shid re" nga" phoo ri nang yoem: byid: da:. Ngoo ri nang nga" myhi' voem: doug: khoug: moo gyi: loo nhang: da:.

¹¹Nang gi shoo" yau: joem yau: khyang: joem yo' nga" gung ri koid da:. Houg: lho: shoo" yau: joem ri shoo" gyi: yo' shooyid wigi thoeb to" da:.

¹²Nang gi ngoo ri kangso' yo' geing: teing da" jheddab myid kaid byid: da:. Houg: lho: re" goin coung: akhoug: moo ngoo ri dei nyid nhang: da:.

¹³Nghoid loug we' hau: ayo, dangain" gu: moo Nang gi ngoo ri dam tab wa shid re" sam: zoo: khau" soin' to" ziri ngoo si' bye:.

¹⁴Nang gi ngoo ri yooboo koid nghoid rigi ngoo ri yooboo akhyoid byid: wa ga: zung" yu" lid loo bye:.

¹⁵Ngoo yooboo shoid yo' dage" ngoo yo' re" agyoo: moo yau: bye:. Nghoid loug we' ngoo jo zi koid ri ciwim ge zi ashau" yu la". Ngoo gi myid myo: wigi sho' phu" bye:.

¹⁶Ngoo oung: doid zi dayo" yu nghoid rigi Nang gi ngoo ri khangkhyi yo' dayhang: ti" kuang pyam da:. Ngoo ri dam yo" tab wa shid re" nang gi mau" pho" moo" koid da:.

¹⁷Nang gi ngoo ri thougtheung wa shid re" sagse: daja: ja: khanham we' ci: da:. Nang ngoo ri nheig yo: zigi je je gyi: lo da:. Nang gi khaid zain: wa aseig daja: ja: ri khanham we' soin' ci: da:.

¹⁸Mangsoo we"- nang ngoo ri ciwim khu: ri" nhang: la". Ngoo ri hang" wigi ashau" myang shi" ri shid: eung: bye: zi nghoid.

¹⁹Oungkhoug: mo zi loeb khyoo: dain: za: loo" wa ein: zigi Khanham we' ajha" nyid ri gi wa zi nghoid.

²⁰Nga" apyaid gi alug thang lo" nyid bye: anghoid rhe". Ngoo ri kyeing" nyhid: too" we'. Ngoo thu lo" da" ayo, akhyeing: moo ngei pyoo: tung" kham zoo: nhang: la.

²¹Ngoo gi amyang" ri lo" byug wigi khanham we' adoem tau" loo loo: wa. Teing: no, wigi moug: doeb da" moug: khyoo: loo" loo: wa.

²²Bid bang nyang: we' moug: coid bue" da" joyoo moug: coid meing:- bid yoeb yoeb da" meing:- anhung akhoid da" meing: khyoo: loo" loo: wa.