Read Lashi YOBA 17 Bible Online

YOBA 17 - Lashi bible

YOBA 17

¹Nga" apyaid gi thang lo" nyid bye:. Ngoo gi so' alug lug ayo" shi: loo. Nga" shid re" loeb duang: mo lid ci: ajo, loo.

²Ngoo ri yugkhang" moo" khayhi' nheig khoo" sho' juang" ein: ziri zung" yu" nyid.

³Mangsoo we"- ngoo gi deingmain" su: nghoid. Ngoo tid da" dang: ri khab yu byid: la. Ngoo tid ziri khab yu wa hang" anyid.

⁴Nang gi nyangnu" da" se' myid yu" da" nheigloem: ri jhid pyam byid: bye:. Nyangnu" wigi akhid" nga" adang moo oung: pyam wa akhang" abyid.

⁵Goonham' mo dang: zhoem' axoug" daloem: moo byu dayug wigi nya: byencang" ri ngei mhoug zo: pyam byid: ga. Houg: yoomo nya: zoo: yi yau: khi" shoug" ga: zi jo,.

⁶Houg: lho: akhid" byu yigi ngoo ri yeing wigi he: dang: zhoem' ri tid boem. Nyangnu" re" wigi nga" myonhoo: moo shakain" byi" gyoin: ago".

⁷Nga" kougshu: khyoo: wigi ngoo ri myo, alug jed nhang: da:. Nga" lo, yo' nga" khyid: gi yoeb byoo joem yhang: ti" ngung: byug bye:.

⁸Deingmain" ga: tid fu" bang: gi dain mau" pyam da:. Nyangnu" dangain" bang: gi ngoo ri Mangsoo aboo su: nghoid ga: yooboo zhug ago".

⁹Phoug" myang: wa moin: yi" ga: tid fu" bang: gi Nyangnu" jo, ga: je je myid loem lo da:.

¹⁰Nghoid loug we' nyangnu" dangain" bang: nga" jhang re" wigi nga" shidkhoin" moo yab jo, boem nghoid ri Nyangnu" mo dayug we' phajhi" bo ziri ngoo ashau" myang wa.

¹¹Nga" bidnyid joem lid loo" bye:. Nga" myid soin' to" khyoo: soem" byug bye:. Nga" myid byu khyoo: gi bei: byug bye:.

¹²Nghoid loug we' nga" byencang" yigi myen" ayo, gi nyid" gung nghoid ga: tid. Bid bang: gi jhang re" nyid bye: ga: tid nghoid loug we' ngoo gi moug: coid moo za: danyid nyid shi".

¹³Nga" myid byu khyoo: gi moovo moug: za: danghoid. Houg: moo ngoo moug: coid khoug: moo yhoeb jhang" jo, wa.

¹⁴Ngoo gi loeb duang: ri nga" phoo ein: myheing wa. Houg: lho: ngoo ri zo pyam da" lugdung: joem ri nga" myhi' yo' nga" nhammoo" ein: myheing wa.

¹⁵Nga" shid re" myid byu jang: gi khamoo: jo, la". Hang" ce: daja: myang to" la".

¹⁶Moovo moug: khyoo: ngoo gyo" vang lo" ri myid byu jang: gi ngoo yo' dage" acang loo wa.