Read Lashi YOBA 20 Bible Online

YOBA 20 - Lashi bible

YOBA 20

¹Yoba we"- nang gi ngoo ri myid myoo: nhang: da:. Akhid" ngoo phug tid wa ziri atho' zeing: ci: loo.

³Nang tid lid lo zigi rue" zi nyang: nghoid da:. Nghoid loug we' nang ri ngoo khasu" phug tid wa ziri se'.

⁴Gyeing" nyang: goonham' gooco' mougmyid tho' moo byu ri nyhid: shid" to" uri

⁵Akhyeing" da" byu yi myang" sho' ayo" pyo: ziri nang se' da:.

⁶Nyangnu" gi nyangnu" da" vhuloem jhoemmoug" moo zang" sho' mougkhung: tho' khyoo: gyi: sheung: loo" nghoid loug we'

⁷Nyangnu" ri pheilhoug: yhang: ti" moid tang" pyam zi shau" boem wa. Nyangnu" ri lhung si' bang: gi nyangnu" khayoo: lo" byug la' ga: mau" boem wa.

⁸Nyangnu" gi yhoebmo, yhang: ti" myen" mo yoeb myang yhang: ti" bei: lo" byug wigi khanham we' ashau" myang loo wa.

⁹Akhyeing" bang: gi nyangnu" lhung nyid da" jo yoo mo byug lo" boem wa.

¹⁰Houg: lho: nyangnu" wigi myung shoo" bang: jang" mo khau" yu to" da" ziri nyangnu" da" yuggi zoo: yi wigi ge khyoo: doem koid loo goo" wa.

¹¹Nyangnu" gung du: joem gi coem" coem" lhung nu" lho: yoem: moo" bo da:. Nghoid loug we' amyang" ri nyangnu" gi pheilhoug: bue" loo" wa.

¹²Nyangnu" shid re" akhyeing" ziri ngham" thui: gyo: da:. Houg: lho: nyangnu" gi zo: ei" wa shid re" nyangnu" da" nhoid khoug: moo kaid ci: da:.

¹⁴Nghoid loug we' hau: zoo: noem gi nyangnu" voem: doug: khoug: moo kho" byug da:. myoono, yhang: ti" kho" byug da:.

¹⁵Akhyeing" su: gi nyang: khau" yu to" da" jonu" joem ri dug pyam da:. Hau: ziri nyangnu" da" voem doug: khoug: mo lang" Mangsoo doem yu thu pyam da:.

¹⁶Akhyeing" su: myau: pyam zigi myoono, yhang: ti" nghoid da:. Hau: zigi dug thain: da" lhangmyu dadu: yhang: ti" nyang: ri thei" said pyam da:.

¹⁷Nyangnu" gi zhainloin: xu: gyid lang joem ri shau" myang sho' dei nyid wa zi anghoid. Nu: noug" yo' byoo yhid: yau da" gyid lang zoo: joem ri we' myang khoo' wa anghoid.

¹⁸Nyangnu" gi nyangnu" moo" zei: wigi yo" yu to" da" zi dangain" ri too" khoo' ca" wa. Nyangnu" gi nyangnu" da" jonu" myen myen zhung: zoo: wa akhang" yo" yu wa anghoid.

¹⁹Ciwim gari nyangnu" gi zeig zo: wigi myung shoo" bang: ri cishu: anhang: koid lho: Gootu: dayug zhug to" da" yhoem: joem ri lhoid seing: pyam byid: da:.

²⁰Nyangnu" mhain: zigi khanham we' nheig atho' deug nghoid da:.

²¹Nyangnu" zo: uri ci: we' azo: teing too" nghoid da:. Nghoid loug we' akhid" nya: jonu" thang byug abye:.

²²Nyangnu" oung: doid thang uri Koug shu: da" yoovoin lid: gi nyangnu" ri khyoeb koid pyam wa.

²³Nyangnu" vho: gu: dangain" zo boem goo" baja". Mangsoo gi nheig joem yo: nheigloem: yoin ziyo' nyangnu" ri yooboo dam byid: wa.

²⁴Nyangnu" joto' shamcoin" mo phang: loid wa soin' uri gyid: mid" lid: wigi nyangnu" ri beig lheing: kaid wa.

²⁵Myoo: joem gi nyangnu" da" gung joem moo zang" lang" hau: yi yi bang da" myoo: coin" gi nyangnu" da" suid" moo lhu" wigi nyangnu" nheigloem: moo gyoug dain loo goo" wa.

²⁶Nyangnu" yung: to" da" zi ja: khang" moo" gi phyo' shoin' pyam zi shoug" lho: Xangsu: byu lo, wigi tab kaid zi anghoid da" myi: gi nyangnu" yo' nyangnu" yhoem: byu yiri nge" pyam wa.

²⁷Mougkhung: gi nyangnu" da" yooboo ri phuid: kyo" wigi Mougmyid gi nyangnu" ri thougtheung da" sagse: byid: da:.

²⁸Nyangnu" da" jonu" dangain" gi Mangso da" nheig yo: dagyid thoem" moo phyo' shoin' pyam zi shoug" wa.

²⁹He: zigi akhyeing" bang: da" vhu" pi: lo, kyo' nghoid da:. Mangso wigi nyangnu" ri kho' byid: to" da" vhu" pi: lo, kyo' nghoid da:.