Read Lashi YOBA 21 Bible Online

YOBA 21 - Lashi bible

YOBA 21

¹Ngoo tid ziri tam" gyoo: ge' He: zigi nanu" mo ngoo mho' nau ja: dangain" nghoid.

³Ngoo ri dang: tid wa akhang" shi" byid: we'. Houg: lho: ngoo bain tid lang" nanu" nau khyo" juang" we'.

⁴Ngoo myeing" myo: zigi se' shid: da" byu yi yo' anghoid. Ngoo nheigloem: atho' sheing: wa khyoo: nyang: jo, da:.

⁵Ngoo ri yu" yu" ge' Nanu" yu" gyoug wigi zhug yu" tam" byug sho' bui" zigi agi" shi" rhe".

⁶Ngoo moo bue" jo, ziri myid kaid lang" ngoo dain mo, byug wigi ko' ko' nain" nyid.

⁷Mangsoo gi ciwim yoomo akhyeing" bang: ri dei nyid nhang: lho: mang: sho' nyid wigi yoo" zoo: yoo" shug nhang: loug lha".

⁸Nyangnu" moo nya: zoo: yi yo' nya: myid: yi yo" ago". Houg: lho: nyangnu" dangain" nyid gyi: sho' myang kho' ago".

⁹Mangsoo gi nyangnu" da" yhoem: moo kyi" khyeug ashau" nhang: nghoid da:. Nyangnu" gi gyoug dain tung" khanham we' anyid noo" nghoid da:.

¹⁰Nghoid- nyangnu" da" nu: joem dangain" nu: nu" xang" wigi ayau: akhi" aboo loo za: khu: thu ago".

¹¹Nyangnu" da" zooshang: yigi yang nu" joem yhang: ti" tang" yen" wigi lhu: yen" ago".

¹²Houg: lho: teing yo' khoolhang thui: khyo" cang wigi go" boem.

¹³Nyangnu" gi yug yoo myen jham' tung" kangso' dei nyid wigi ce: yau: khi" ashau" loo: myen myen za: shid: loo" ago".

¹⁴Akhyeing" bang: gi Mangsoo ri nyang: kyeing" nyid wa shid re" tid boem. Nyangnu" gi nyangnu" da" apyaid shid re" nyang: khasu" bui" nhang: nau ga: ziri asi' nau nghoid da:.

¹⁵Nyangnu" gi Mangsoo ri dei byid: aca" ga: myid ago". Nyang: ri akyu" mho' wigi ce: akyu" ayoo" ga: we' myid ago".

¹⁶Nyangnu" gi nyangnu" da" yoem: so' wigi oung: doid zi nghoid ga: fu" boem. Nghoid loug we' nyangnu" myid da" khyoo: ri ngoo ayo" khab yu.

¹⁷Akhyeing" su: da" myi: bung: lhung shid: lo" lha". Nyangnu" mo dayug yug gi yau: khi" lhung shoug" yu" la" Mangsoo gi akhyeing" bang: ri yooboo dam lhung byid: yu" lha".

¹⁸Houg: lho: nyangnu" ri lid wigi khoofoo: ri moid tang" pyam yhang: ti" moid tang" pyam lha". Anghoid lang" uglid moo pheilhoug: bo lo" yhang: ti" bue" yu" lha".

¹⁹Mangsoo gi nya: pho da" yooboo shid re" nya: zoo: ri yooboo dam byid: ga: nanu" tid boem. Hougsu" anghoid- Yooboo thung: yi nyangnu" nyang: ri Mangsoo yooboo dam byid: baja". Nyangnu" da" yooboo gang mo nyang: hougsu" koid ziri ci shug byid: baja".

²⁰Yooboo thung: yi gi nyangnu" nya: yooboo dam ri voin boem baja". Myhang: thang Mangsoo nheig yo: ziri nyangnu" loem zoo: goo" baja".

²¹Ngoonu" kangso' thang byug lang" Nya: zoo: yi gau yi nyid boem go" la' ein: ziri nyang: myidgung yau wa la.

²²Myhang: da" joyoo moo nyid da" bang: rilang" dang: phyed su: Mangsoo ri byu wigi yo" jhau" shid wa la".

²³Byu dayham" gi nyangnu" shid: da" bidnyid ju" sho' yang" zain: tung" yo" nyid da:. Nyangnu" gi pyoo: pyoo: yo' myen myen shoug" shid: ago". Nyangnu" da" manggung joem ri goo" lhoo' za: nyheing coung: pyam zi shau" da:.

²⁵Dayham" gi ngei pyo: zi dajhi' we' ashau" yu nghoid ago". Nyangnu" gi nheigloem: kyid: kyid: kho" ziyo' kangso' dei wigi hougsu" shid: lo" ago".

²⁶Nghoid loug we' dangain" gi shid: lo" wigi myhoeb pyam zi shau" da:. Nyangnu" dangain" bang: ri lugdung: joem wigi boem" pyam da:.

²⁷Nanu" moo khate" athoug" akhyoug: nheigloem: bo ziri ngoo se'

²⁸Nanu" gi «Akhyeing" moo" ri lhung koid su: gyi: sheung: su: da" yhoem: akhid" khayoo: la"» ga: myid: ago".

²⁹Nanu" gi gyung: soo" bang: yo' ayhe: doem go" yu" goo" rhe" Nyangnu" yu lo da" lu dang: joem ri nanu" asi' goo" rhe".

³⁰Mangsoo nheig yo: wigi yooboo dam byid: da" bidnyid moo Khanham we' nheig se' khyeug su: gi akhyeing" ashoeb su: bue" lo da:.

³¹Akhyeing" ashoeb su: ri yooboo zhug wa hang" anyid. Nyang: koid lid lo da" moo" yoomo nyang: ri latoo: phug wa byu hang" anyid.

³²Loeb boug moo goo" lhoo' za: lhoug zung" to" da" nya: loeb khyoo: nyang: ri dang yhe: lo" uri

³³Mang dang yhe: jang" moo byu khyeing" su: bo yhe: da:. Myid zhoo" lang" gi nya: manggung tho' moo yoo yoo za: jo, jo, da:.

³⁴Houg: lho: nanu" we"- nanu" gi ngoo ri ce: dang: kang: abo da" dang: khyo" wigi nheig teing byid: wa soin' ago". Nanu" byid: da" dang: phuid: khang" moo" gi mhoug da" dang: za: nghoid da:.