Read Lashi YOBA 22 Bible Online

YOBA 22 - Lashi bible

YOBA 22

¹Mangso shid re" akyu" bo da" byu Phajhi" bo thang su: lang" dayug yug nyid la".

³Nang koid da" ge moo" zoo" gi Mangsoo ri akyu" byid: la" Nang gi koid ze wigi nyang: ri pang" thoug byid: la".

⁴Mangso shidkhoin" moo gyoug phoug" wigi yab jo, yoomo nyang: gi nang ri nheig yo: lho: yung" khyoo: shu" yhe: wa zi anghoid.

⁵Hau: zigi nang yooboo sung koid yoomo nghoid da:. Nang koid da" akhyeing" moo" dangain" gang mo bue" zi nghoid da:.

⁶Re" da" mang: nhung" pho wigi nang ri xab ca" da" ngei jhen: ri doem yo" cab' sho' ga: Nang gi nya: byimi joem ri nyang: moo void wa ajo, loo sho' yu pyam byid: da:.

⁷Nang gi myung: dau bang: ri gyid abyid: jhug. Zoo yoid bang: ri voem: abyid: zhoo" nghoid da:.

⁸Nang gi damougmyid goin" ri yo" shoem" yu sho' ga: re" yoem: so' yo' re" aya: ri ci: da:.

⁹Nang gi cougmoo" yiri apang" thoug tho' agoo" Coug" zoo: nu" yiri lhoid zo: wigi anoug akhyoid koid da:.

¹⁰Houg: lho: akhid" gi re" aqei: ayam goem: sho' moo duang: khuang" joem byeung" jo, da:. Hau: thang: nang gi nyeigdain tung" gyoug dain pho" zi shau" da:.

¹¹Nang ayo" myang loo sho' teing: no, wigi gyid khyoid zoo" gi nang ri lheing: nhe' pyam bye:.

¹²Mangsoo gi myhang: thang mougkhung: moo nyid wigi Kyi joem we' myhang: da" joyoo moo jo, boem loug we' nyang: wigi adang" khyo" yu" khyo' kaid anghoid rhe"

¹³Nghoid loug we' nang gi «Mangsoo ci se' lha". Nyang: ri jhoemmoug" thei" joem wigi da nghoeb to" da:. Nyang: gi ngoonu" ri dang: khasu" se' phyed byid: wa la» ga: datid nyid ashi".

¹⁴Mougkhung: moo nyang: so" lid: lo" da" uri Thu: da" jhoemmoug" thei" gi nyang: ayo" myang sho' nghoeb to" da: ga: nang myid jho: da:.

¹⁵Akhyeing" bang: khanham we' lhung cang yhe: da" khyoo: moo nang we' soo" wa ein: myid phyed too" bye: rhe".

¹⁶Nyangnu" da" ayo, lang" aju" shi" ri gyid khyoid khyoid lo zigi nyangnu" ri pyoung" khyoid she: lo" boem wa.

¹⁷He: byu yigi Mangsoo ri ngeug he: pyam wigi nyangnu" ri Mangsoo ci: ayo" koid ga: myid bang: nghoid ago".

¹⁸Houg loug we' nyangnu" ri yoo" zoo: yoo" shug nhang: zigi Mangsoo nyang: nghoid. Akhyeing" bang: myid soin: khyoo: ri ngoo atho' se' gyoo: loo.

¹⁹Akhyeing" bang: yooboo dam shoug" ziri nyangnu" myang lang" byu gi yi gau lho: yooboo ayoo" bang: yi ago".

²⁰Akhyeing" bang: seing: zi dangain" gi phyo' shoin' pyam shau" da:. Houg: lho: deing da" ja: khang" moo" ri myi: wigi nghe' pyam da:.

²¹Yoba we"- Akhid"- nang Mangsoo yo' yug yoo za: nyid we' Houg: lho: nyang: ri gyivoo yhang: ti" zoem" khau: da" khyoo: ri to" pyam we' Nang hougsu" koid ri nyang: gi nang ri mainkaid byid: wa.

²²Nyang: byid: da" jhau" shid dang: ri khab yu we'. Nya: dang: khoin" joem ri re" nheigloem: moo zoem: ci: we'.

²³Nghoid bye:- nang gi nyhoem: khyo, ziyo' Mangso jhang doem tau" loo ca" da:. Houg: lho: re" yhoem: khoug: moo koid da" akhyeing" moo" dangain" ri to" pyam ca" da:.

²⁴Re" sheing: ri she: pyam pyam we' Ge thang da" sheing: ri kyug hei' da" gyid lang moo de" boem pyam we'.

²⁵Myhang: thang da" Mangsoo gi re" da" sheing: nghoid baja". Houg: lho: nyang: gi re" shid re" boem to" da" ngei nghoid baja".

²⁶Houg: lang" nang gi khanham we' Mangsoo ri loem khau: nghe: nyid wigi Nyang: gi re" da" ngei pyo: khyoo: apoem: ayang: nghoid zigi nang shau" myang loo wa.

²⁷Nang akyu" mho' ri nyang: gi nang ri tu" byid: wa. Houg: lho: nang gi nang koid to" da" dang: theing ri cang loo wa.

²⁸Nang koid zi dangain" oung: doid loo wa. Houg: lho: re" khyoo: moo bidbang bang byid: loo wa.

²⁹Mangsoo gi nghoid boin: bang: ri doin: khyo' pyam lho: Nheigloem: nyhoem: khyo' bang: ri khyoid yu wa.

³⁰Nang gi yooboo ayoo"- nang koid zi jo nghoid ri Nyang: wigi nang ri khyoid yu wa.