Read Lashi YOBA 28 Bible Online

YOBA 28 - Lashi bible

YOBA 28

¹Ngei ri du: yu da" ngei duang: jo, da:. Sheing: ri phoid kyeing sain' da" joyoo joem jo, da:.

²Ngoonu" gi myidjang khoug: mo joto' ri du: yu da:. Houg: lho: gyid: ni ri we' lug boem joem mo phoid shau' yu da:.

³Lug duang: du: bang: gi no, thang da" moug: coid ri shau: ago". Nyangnu" gi mougmyid no, khyoo: ri shau: yu" ago". Houg: lho: moug: coid khoug: moo lugzeing joem ri du: sho: ago".

⁴Byu dayug yug nyid da" joyoo mo vi: vi: moo Anghoid lang" xangsu: byu khanham we' aju" jang" moo Nyangnu" gi duang: khuang" gam byam: nyham" ago". Houg: moo nyangnu" nyang: kyeing" duang: khuang" mo tei" ri zei: ci: wigi moo" zei: lung" jo, da:.

⁵Myid gung mo zoo: noem yug thu re" da:. Nghoid loug we' hau: myidgung khoug: moo nyang: gi Dangain" bug shoin: gyoeb byo, jo, da:.

⁶Myid gung mo lugzeing joem moo phoug" dab lug ni bo da:. Houg: lho: hau: myidzhoo" moo sheing: bo da:.

⁷Hau: duang: khuang" khyoo: vang yhe: da" khyoo: ri zoin wigi azang" myang. Hau: atho' khyo" join yu we' adang: nghoid da:.

⁸Khangkhyi yo' gootu: gougnyhoug lam" yigi hau: jham" coug: youg khyoo: joem khyo" aso" lid nghoid da:.

⁹Lug duang: du: bang: gi thain: thang da" lug boem joem ri du: pyam da:. Boem joem ri nya: apoem: ayang: mo du: tang" pyam

¹⁰Nyangnu" gi lug boem khoug: khyo" lug khyung: du: vang lo" da:. Nyangnu" gi phoug" dab da" lug ri shoug" du: yu ago".

¹¹Nyangnu" gi gyid moin ri we' du: thu lho: Nyhoem" shoung: to" da" ja: ri bidbang khyoo: ci: loo byid: da:.

¹²Nghoid loug we' phajhi" ri khamo shoug" sho: yu wa la". Lasi laleug ri ngoonu" khamo jhau" yu wa la".

¹³Phajhi" ri byu phung: gung mo shoug" sho: yu ja: anghoid. Nya: da" aphoug" gu jhoo: ri hang" asi' nghoid da:.

¹⁴No, da" panglai yo' nammugdara gi Hau: joyoo moo phajhi" ri amyang ga: tid.

¹⁵Hau: ziri ngei yo' sheing: wigi we' ayo" qei yu.

¹⁶Ge thang da" sheing: yo' lug joem gi hau: aphoug" yo' ayo" tu' nghoid da:.

¹⁷Hau: zigi sheing: tho' je phoug" dab lho: sheing: yam pu yo' ge thang bang teing tho' je phoug" da:.

¹⁸Phajhi" da" aphoug" gi Lafuid: lug tho' we' lug phyu: tho' we' lug ni tho' we' je phoug" da:.

¹⁹Ge thang da" utaphaya lug yo' gyeing" sain' thang da" sheing: gi Phajhi" da" aphoug" yo' ayo" tho' ge tu' goo" nghoid da:.

²⁰Houg: ri phajhi" da" apoem: ayang: gi khamoo jo, la" Lasi phajhi" ri ngoonu" khamoo yo" sho: yu wa la".

²¹Kangso' dei da" ce: dei noem we' hau: ziri ashau" myang. Dang: yen" da" ngho' lang" ashau" myang.

²²Shid: ziyo' phyo' shoin' zi lang" subi" tid thui: za: dagyo: yu" ga: tid ago".

²³Mangsoo nyang: kyeing" hau: khyoo: ri se' da:. Phajhi" ri sho: myang yu wa khyoo: ri se' da:.

²⁴Nyang: gi mougmyid thang sho' ri myang su: nghoid yoomo Mougkhung: vhoo: moo jo, da" ja: khang" moo" ri shau" myang da:.

²⁵Mangsoo gi lid ri yoem: so' byid: da" uri yo' panglai: khayhi' gyi: sho' ga: myid phyed da" uri

²⁶Mangsoo gi khamoo: moug: voo wa ga: myid phyed uri yo' Lhab' myeig jhoemmoug" thei" so" loo" wa khyoo: ri soin' to" uri

²⁷Nyang: gi phajhi" ri shau" myang wigi hau: aphoug" ri joeb ca: yu" da:. Nyang: gi hau: ziri jo, deing nhang: da:.

²⁸Mangsoo gi ngoonu" xangsu: byu yiri «Nanu" phajhi" boo wa shid re" ASEING ri gyoug phoug" ca" da:. Lasi phajhi" yoo" sho' akhyeing" ashoeb jang" mo nanu" lheing: loo ca" da» ga: tid.