Read Lashi YOBA 30 Bible Online

YOBA 30 - Lashi bible

YOBA 30

¹Nghoid loug we' akhid" koem gi nga" tho' je nge da" yuggi yi wigi ngoo ri yi noug ci: tu' ago" Nyangnu" da" nya: phoo yigi ce: akyu" aboo- ce: phoug" adab yoomo nga" yang" joem ri lhoug zung" da" lakhuid" joem ri pang" wa shid re" lang" nyangnu" ri alhoung nhang: zi nghoid.

²Nyangnu" gi yoem: bain byug bye: yuggi joem nghoid wigi Nga" shid re" ce: moo" we' ayo" zei: byid: loo: nghoid ago".

³Nyangnu" gi sung myung wigi zooyoid yoomo myen" ayo, moo: siyoo no, seing" kyid: cang seig gyi: joem ngaid gyed zo: ago".

⁴Nyangnu" gi dain" pyoid yoo mo seig gyi: joem ri lang: noid yu lho: zo: ago". ce: main abo da" myo, kyang" gyi: joem lang: noid zo: boem.

⁵Yugkhang" moo" gi khau" foeb joem ri nyho: yoid tang" kaid yhang: ti" nyangnu" ri shoug" khaid tang" pyam ago".

⁶Nyangnu" gi lug-ug cang- Lug pyo' moo du: to" da" duang: khuang" cang nyid yen" ca" da:.

⁷Nyangnu" gi siyoo gyoem" khoug: moo gougnyhougsu" shoug" myeing yen" wigi mhain" pung cang dage" zeing: foem: nyid boem ago".

⁸Ce: aphoug" adab- soin: did abo da" byu lam" yi kyeing" danghoid da:. Nyangnu" ri mungdain: mo coem' khaid thu pyam ago".

⁹Akhid" nyangnu" re" wigi ngoo ri coem' yi nyid boem ago". Ngoo gi nyangnu" shid re" yi nau tu' pho" zi za: danghoid lo:.

¹⁰Nyangnu" gi ngoo ri yu" co' ja: khyo" to" ago". Nyangnu" nya: gung ri nga" tho' je ge ga: myid wigi nga" myonhoo: moo shakain" lhung re" byi" gyoin: ago".

¹¹Mangso wigi ngoo ri yoem: neing: nhang: lho: ci: adoid loo: sho' koid pyam yoomo Nyangnu" gi lo" thang sho' nheig yo: wigi nga" jang" mo lheing: phug lo" ago".

¹²He: byu thei" joem gi ngoo yo' veing" veing" khaid zain: lo wigi nyangnu" gi ngoo ri tang" phang: nhang: ago". Nyangnu" gi lo" thang moo said goo" wa ga: soin' ci: ago".

¹³Nyangnu" gi ngoo phang: loid wa khyoo: ri jhid pyam wigi phyo' shoin' pyam wa ga: soin' boem. Nyangnu" ri toem' pyam wa byu dayug we' anyid nghoid ago".

¹⁴Nyangnu" gi nga" gyikhoug: joyoo khyoo: jhen" vang lo wigi nga" adang moo agoin: nyang: gyo" nang khyoeb pyam lo" ago".

¹⁵Ngoo gi gye" gyoug dain pyam bye:. Nga" myonhoo: ngilang: gi lid zoo" yhang: ti" bei: byug bye:. Houg: lho: nga" jonu" we' jhoem: thei" yhang: ti" byug byug bye:.

¹⁶Akhid" gi ngoo shid: loo" wa za: danghoid lo:. Nga" kyi" khyeug khyoo: gi dajhi' yoo wa khyoo: ajo,.

¹⁷Myen" ayo, moo nga" shoo" yau: joem dangain" khe" nyid da:. Ngoo ri khe" nho: da" noo gi khanham we' ayoo: byug nghoid da:.

¹⁸Mangsoo gi khyung" doug: moo nyang: myheig zeing wigi nga" byimi joem ri ne shoem' pyam byid: da:.

¹⁹Nyang: gi ngoo ri thoem" boeb boem" moo she: pyam khyo' kaid da:. Ngoo gi pheilhoug: tho' ci: aje gi loo nghoid da:.

²⁰O" Mangsoo we"- ngoo nang ri khe: nghoid loug we' khanham we' atu" byid: Houg: lho: ngoo akyu" mho' da" uri nang ci: atam" gyoo: byid: nghoid da:.

²¹Nang gi ngoo ri anoug akhyoid koid da:. Re' yoem: so' dangain" wigi ngoo ri said abye:.

²²Nang gi ngoo ri lid wigi hau' tang" pyam nhang: da:. Nang gi ngoo ri thain: da" lid yoem" moo aphug asi: baid khyoid abye:.

²³Nang gi ngoo ri yugkhang" moo" shid re" soin' to" da" Shid: moug: khyoo: shu" lo" nyid ziri ngoo se' da:.

²⁴Nang gi ciwim nheig khyeug yu wa shid re" mho' yoid wa dasi' lo da" byo, yoin" jo, bye: byu dayug ri gyi khaid zain: nyid lha".

²⁵Ngoo gi yau: khi" shoug" bang: yo' dage" koug ngau wigi myung: shoo" bang: shid re" nheig koug byid: bye: anghoid rhe".

²⁶Ngoo gi ngei pyo: khyoo: yo' bidbang ri myid lang" nyid. Nghoid loug we' hau: gungthid yau: khi" yo' moug: coid she daju" re" da:.

²⁷Ngoo gi myid myo: ziyo' dam no ze wigi nheigloem: byo, loo" bye:. Ngoo gi danyid" thang: danyid" yau: khi" shoug" kham zo: nyid da:.

²⁸Ngoo gi bid azho: da" ceig no, khoug: moo so" dam: yen" da:. Ngoo gi byu phung: gung moo to' yab wigi pang" thoug yu wa shid re" mho' yoid abye:.

²⁹Nga" thui: gi zeigni dadu: myeing thui: anghoid lang" gyo, Gola-ug myeing thui: yhang: ti" nheig koug thui: thu da:.

³⁰Nga" shooyid gi no, loo" bye:. Ngoo gi noo yoem" joem" joem" nyid bye:.

³¹Goonham' dalheing: pyo: da" nghei' thui: lhung shau" gyo: da" joyoo moo akhid" ngoo gi koug thui: yo' ngoug thui: za: date: shoug" gyoo: lo.