Read Lashi YOBA 31 Bible Online

YOBA 31 - Lashi bible

YOBA 31

¹Ngoo gi khanham we' myiyi: nu" dayug ri yu" mhain: da" khyo" ayu" wa ein: geing: teing dang: soo" to" too" bye:.

²Myhang: thang ASEING gi ngoonu" ri cikoid bye: la" Xangsu: byu da" lo, moo" moo ce: noem doem tau" xab byid: la.

³Nyang: gi shoid khyoo: koid bang: ri kyi" khyeug ziyo' byo, yoin" khyoo: nhang: kaid byid: da:.

⁴Mangsoo gi ngoo koid khyoo: ja: khang" moo" ri se' da:. Nyang: gi nga" khyid: byi khang" moo" ri si' byid: da:.

⁵Ngoo gi khanham we' akhyeing" ashoeb da" khyoo: akoid wigi Subi" ri mhau' fain" zoo: wa khanham we' asoin' yu" ein: jham' tang:.

⁶Mangso ngoo ri main" da" juid: jang wigi leig yu" baja" Houg: lang" ngoo khasu" yooboo ayo" ziri nyang: shau" myang loo wa.

⁷Ngoo gi jo, da" khyoo: mo lheing: tau" thu lo" la. Anghoid lang" akhyeing" da" khyo" ngoo nya: gung ri myhi' nyid la. Houg: lho: nga" lo, moo yooboo dab nghoid ri

⁸Nga" shivoo: shiloem phyo' shoin' pyam zi shoug" baja". Anghoid lang" ngoo sho" da" zoo: noem joem ri subi" wigi zo: pyam boem baja".

⁹Nga" yhoem: kyoo" cang" da" yhoem: seing: myhi' ri yu" vho: lho: nya: da" khoem" tunggung shoid mo zung" yu" wigi gau" nyid nghoid ri

¹⁰Nga" yhoem: seing: myhi' gi subi" gootu: da" zoo: noem jhau' wigi yuggi gooyug da" yhoeb yoo moo yhoeb baja".

¹¹Houg: yhang: te" akhyeing" moo" ri shid: moin: yooboo dam byid: ca" da:.

¹²Hau: zigi ngoo yo" zi dangain" ri nge" pyam da:. moomyi: yhang: ti" phyo' shoin' se' da" myi: nghoid loo wa.

¹³Nga" da" dei zoo: yi mo dayug yug ngoo ri re" thougtheung myeing" myo: nyid lang" Ngoo gi nyang: ri tam" gyoo: byid: wigi tarha" nyeung veung" khyo" koid byid: wa.

¹⁴Ngoo hougsu" akoid nghoid ri Mangsoo ri ngoo khasu" yo" shoug" wa la" Ngoo ri dang: phyed wa shid re" Mangsoo re" da" uri ngoo khasu" se' tid wa la".

¹⁵Ngoo ri phain" so: too" da" Mangsoo gi nga" dei zoo: yiri we phain" so: too" su: nghoid.

¹⁶Ngoo gi myung bang: ri pang" wa khanham we' angeug he: pyam. Cougmoo" yiri we' nheig kyoo" nheig gyam anyid nhang:.

¹⁷Ngoo voem: zo: uri coug" zoo: nu" yiri zooyoid wigi anyid nhang:›

¹⁸Nga" apyaid dapyaid goin" moo nyangnu" ri ngoo yu" goin coung: loo bye:.

¹⁹Sung myung yoomo ca" da" byimi ayo" qei void da" byu dayug yug ri shau" myang lang".

²⁰Nyang: ri ngoonya: yang kyung mo shoug" yu da" yang moug" wigi yo, da" soug" goug" byimi lhung byid:. Houg: lang" nyang: gi nheigloem: bain sho' yo' ngoo ri coung: da:.

²¹Ngoo gi coug" zoo: nu" da" yug ri tarha" rung" moo gyeing" nyang: oung: wa ein: se' to" wigi mhoug fain" zo: nghoid rigi

²²Nga" lo, pu' joem gyau: lo" boem baja". Hau: lo, pu' joem gi nga" koo" tho' mo gyu" gyoo" loo" boem baja".

²³Ngoo gi Mangso wigi yooboo dam byid: wa ziri gyoug yoomo houg yhang: te" moo" zoo" ri khanham we' ngoo alhung koid.

²⁴Ngoo gi ziyoo jonu" joem moo khanham we' alhung khau: nghi:.

²⁵Jonu" atho' moo nghoid boin: da" myid aboo.

²⁶Ngoo gi bid ri nya: bidbang bang yoomo khanham we' ano' yu"- lhammoo" khayhi' yung" nghoid loug we' ano' yu".

²⁷Ngoo gi hau: joem ri phau" myang: da" khyo" nga" lo, ri babug bug wigi ngi: shab byid: da" khyo" khyoodam: adam: yu".

²⁸Houg: yhang: ti" da" yooboo rigi shid: ziyo' yooboo dam byid: ca" da:. Hau: zigi myhang: thang ASEING ri aphoug" akhyoid koid zi nghoid da:.

²⁹Nga" gyivoo gi kyi" khyeug shoug" nyid uri ngoo khanham we' agau yu". Nyangnu" phyo' shoin' zi shoug" uri ngoo amyed gau yu".

³⁰Ngoo gi nyangnu" shid: baja" ein: akyu" mho' khyo" Khanham we' yooboo ashoid lid loo.

³¹Beingvoo yiri khanham we' ngoo lhung lhoem: tau' yu khyoo: ri nga" shid re" moo" zei: bang: dangain" se' ago".

³²Ngoo gi gyung: soo" bang: ri nga" yhoem: khyoo: khe: fang yu wigi nyangnu" ri khanham we' fu" moo" khyoomoo" moo ayhoeb nhang:.

³³Subi" gootu: gi nyangnu" nya: da" yooboo joem ri shoung: ci: wa soin' ago". Nghoid loug we' ngoo gi nga" yooboo ri khanham we' ashung: to" yu.

³⁴Sube" wigi khasu" tid goo" wa ein: ziri ngoo khanham we' agyug yu" Nyangnu" wigi coem juang" goo" wa ziri gyoug wigi ngoo khanham we' sam za: atam" too" yhoem: khoug: moo za: we' alung" jo,

³⁵Ngoo tid nyid ziri hang" atam" gyoo: goo" rhe". Dang: khoin" khang" moo" deingmain" ein: ngoo jham' tang:. Myhang: thang Mangsoo gi ngoo ri tu" byid: baja". Ngoo ri thougtheung su: wigi ngoo ri yooboo zhug da" dang: joem ri Ngoo yo" shau" myang sho' lhid" to" boem nghoid ri

³⁶Hau: joem ri nga" koo" tho' moo ngi: boo tung" vu: ci: wigi Bidmug yhang: ti" nga" vhuloem moo zhung" ci: wa.

³⁷Ngoo gi ngoo koid lid lo da" moo" ja: khang" moo" Mangsoo ri tid kyo" wigi nya: shidkhoin" moo nga" vhuloem ri myhang: sho' yo" tu: wa.

³⁸Ngoo phug da" yoothung" ri khau" yu wigi yoothung" seing: yi mo yu pyam byid: nghoid ri

³⁹Hau: moo yug da" zoo: noem ri ngoo zo: wigi Hau: yoothung" moo" zei: bang: zooyoid gyid shid nyid nghoid ri

⁴⁰Sungsoo: yo' yoono, da" gungthid mhain" joem yo' zu: kyin: joem yug loo baja". Yoba da" dang: khoin" joem bain byug bye:.