Read Lashi YOBA 33 Bible Online

YOBA 33 - Lashi bible

YOBA 33

¹Houg: lho: Yoba we"- akhid" ngoo tid ca" da" dang: dangain" ziri jhug za: tam" gyo: yu we'

²Ngoo gi nga" nheigloem: khoug: moo bo ziri tid kaid wa bye:.

³Nga" dang: khoin" joem dangain" gi khyang: khyang: za: nghoid da:. Houg: lho: ngoo gi deingmain" ziri tid nyid da:.

⁴Mangso da" Venyi: gi ngoo ri phain" so: to" wigi ngoo ri kangso' byid: da:.

⁵Nang yo" phug tid nghoid ri ngoo ri phug tid la. Nang ngeug tid wa khyoo: ri soin' ci: we'.

⁶Nang yo' ngoo gi Mangso shidkhoin" moo dakhyo" danghoid. Nga" eig yug goin" ziri myidzhoo" yo' byu azuang koid to" zi nghoid.

⁷Houg: yoomo nang wigi ngoo ri gyoug wa khyoo: ci: ajo, Ngoo gi nang ri a oung: pyam wa.

⁸Akhid" ngoo gi nang hid: su" ga: tid thui: shau" gyo:

⁹«Ngoo ce: yooboo ayoo"- ngoo ci: we' akoid shoid. Ngoo moo yooboo aboo yoomo yooboo yo' ci: asen:

¹⁰Nghoid loug we' Mangsoo gi ngoo ri khaid zain: wa shid re" cang sho: da:. Houg: lho: ngoo ri gyivoo yhang: ti" to" to" da:.

¹¹Nyang: gi nga" khyid: joem moo jangcoo" foid byid: da:. Nyang: gi ngoo koid yen" khyoo: ja: khang" moo" ri zung" yu" nyid da» ga: tid.

¹²Nghoid loug we' Yoba we"- nang ri ngoo tid ba- nang shoid da:. Mangsoo gi byu xangsu: yugkhang" moo" tho' je gyi: sheung: da:.

¹³Mangsoo gi nyha" da" myeing" myo: thui: ri khanham we' aphug tid da" gang mo nang ciwim yoomo Mangsoo ri yooboo zhug la.

¹⁴Mangsoo gi pug gi pug gi dang: ji nyid nghoid loug we' nyang: tid ziri hang" agyoo: byid: goo" nghoid da:.

¹⁵Myen" ri byu yi yhoeb jo, uri Mangsoo gi yhoebmo, joem yo' yoeb myang joem khyo" dang: tid nyid.

¹⁶Nyang: gi nyang: tid ziri tam" gyoo: sho' koid da:. Houg: lho: nyangnu" gi nyang: wigi tid poin" ziri gyoug dain ago"

¹⁷Mangsoo gi nyangnu" ri yooboo koid zi theing: pyam goo" wa shid re" tid da:. Houg: lho: nghoid boin: lo jang" mo khyoid yu wa shid re" tid da:.

¹⁸Nyang: gi nyangnu" ri phyo' shoin' pyam zi shoug" nhang: wa anghoid. Nyang: gi nyangnu" ri shid: jang" mo we' khyoid yu da:.

¹⁹Mangsoo gi nyhang" ri noo phyoo" bui" nhang: khyo" we' gung moo no ziri kaid byid: khyo" we' jhau" shed' yu da:.

²⁰byu noo nghoid su: gi nhoid angham" nghoid da:. Houg: lho: reung: thang da" zoo: shug lang" nheig yu" noo tung" nghoid da:.

²¹Nyangnu" da" gung doem gi gyi" lo: da:. Nyangnu" da" shoo" yau: dangain" ri yo" myang da:.

²²Nyangnu" gi moovo moug: khyoo: loo" wa za: danghoid lo:.

²³Moug: lagyoo: dayug yug gi nyangnu" ri re" pang" yu abe. Ngoonu" da" moo" zoo" ri tid shed da" Mangso moug: lagyoo: khyeing" su: jang" mo dayug yug re" pang" yu abe.

²⁴Moug: lagyoo: gi nheig yu" khyeug wigi nyangnu" ri «Nhang: kaid we'. Nyangnu" gi moovo moug: khyoo: gyoo" loo" ca" wa zi anghoid. Nyangnu" ri nhang: kaid wa shid re" aphoug" hid: moo: nghoid» ga: tid abe.

²⁵Nyangnu" da" gung du: gi gyi: sheung: lo wigi yoem: dalheing: doem bo loo wa.

²⁶Nyangnu" akyu" mho' ri Mangsoo nyangnu" ri tu" byid: wa. Nyangnu" gi Mangsoo ri ngei bu: tung" noku byid: loo wa. Mangsoo gi nyangnu" shid re" aja: ja: ri jo da" khyo" doem koid loo wa.

²⁷Yugkhang" moo" gi byu phung: gung moo tid zigi «Ngoo yooboo shoid lid loo bye:. Ngoo gi jo ziri akoid loug we' Mangsoo gi ngoo ri khyam" sa: byid: bye:.

²⁸Nyang: gi ngoo ri moovo moug: khyoo: aloo" sho' khoem ci: da:. Houg: lho: ngoo akhid" dei nyid shi"» ga: tid.

²⁹Mangsoo gi he: zi dangain" ri pug gi gi doem koid da:.

³⁰Nyang: gi byu dayug da" kangso' ri khyoid yu wigi Nyang: ri dei nyid da" ngei bu: khyoo: ri byid: da:.

³¹Akhid"- Yoba we"- ngoo tid nyid ziri tam" gyoo: we' Sam zoo: tam" we' ngoo dang: tid ba.

³²Nghoid loug we' nang daja: ja: tid wa yo, ri, ngoo ri gyoo: nhang: la. Nang jo ga: tid ziri ngoo ngei bu: tung" kham: yu wa.

³³Hougsu" anghoid lang" sam: zoo: tam" to" wigi nga" dang: ri tam" gyoo: we'. Ngoo gi nang ri khasu" phajhi" boo wa shid re" jhau" shid byid: wa.