Read Lashi YOBA 34 Bible Online

YOBA 34 - Lashi bible

YOBA 34

¹Byu nanu" gi gye" phajhi" bo ago"- gye" yeug ago". Akhid" ngoo tid ziri tam" gyoo: ge'

³Zooshug gi gi zo: yu" ri ngham" angham" se' gyoo: nghoid loug we' Phajhi" dang: ri tam" gyo: rigi hougsu" anghoid.

⁴Bue" lo da" moo" ri myid phyed zigi ngoonu" da" bue" doid khyoo: nghoid.

⁵Yoba gi nyang: yooboo ayoo" ga: tid da:. Mangso wigi nyang: ri tarha" deing byeung" khyoo: akoid byid: ga: tid da:.

⁶Nyang: gi «Ngoo mhoug dang: yo' ajo ziri khasu" se' tid wa la". Ngoo gi shid: wa dam dab loug- ngoo moo yooboo aboo» ga: tid da:.

⁷He: Yoba yhang: te" da" byu dayug ri nanu" lhung myang yu" go" rhe" Nyang: gi Mangsoo ri gyoug phoug" da" khyoo: khanham we' aci: shug nghoid da:.

⁸Nyang: gi akhyeing" bang: yo' zoem" khoug: nau lho: nyang: gi yooboo yoo" bang: yo' so" lam" yen" da:.

⁹Nyang: gi Mangsoo vho: ngei da" khyo" cang wigi khanham ce: akyu" aboo ga: tid da:.

¹⁰Se' gyoo: bang: nanu" we"- nga" dang: ri tam" gyo: yu" ge'. Myhang: thang Mangsoo gi shoid ziri koid wa la".

¹¹Nyang: gi byu yiri nyangnu" koid da" moo" shid re" aphoug" jhungshug byid: da:. Houg: lho: nyang: gi kham: zoo: wa moin: yi" wa khyo" koid byid: da:.

¹²Myhang: thang Mangsoo gi akhyeing" zi akoid. Nyang: gi hang" ri we' tarha" adeingmain" khyo" khanham we' akoid.

¹³Mangsoo gi nya: da" yoem: so' ri gooji dayug yug mo yo" yu rhe". Byu dayug yug wigi nyang: ri hau: mougmyid ri yu" goin coung: nhang: to" rhe".

¹⁴Mangso wigi kangso' doem yu pyam byid: nghoid rigi

¹⁵Kangso' dei nyid da" yugkhang" moo" shid: lo" byug wigi Pheilhoug: khyoo: doem tau" lo" boem wa.

¹⁶Nang phajhi" bo nghoid rigi nga" dang: ri tam" gyoo: we'.

¹⁷Nang gi deingmain" da" Mangsoo ri yooboo foin: dang: phyed wa rhe". Nyang: gi tarha" nyheing veing" khyoo: ngheing" ein: nang myid jho: la".

¹⁸Khokham yi yo' vhoebkhang" zoug: yi aphoug" adab wigi akhyeing" boem lang" Mangsoo gi nyangnu" ri yooboo foin: dang: phyed da:.

¹⁹Nyang: gi mung" vhoeb zoug: yi thang: khyoo: adab. Myung bang: ri to" wigi yoo" bang: shoid myonhoo: byid: zi anghoid. Ciwim ga ri nyang: gi yugkhang" moo" ri phain" so: to" da:.

²⁰Byu gi myen" ri nyeigdain tung" se' shid: lo" da:. Mangsoo ngoonu" ri baid lheing: kaid lang" ngoonu" byo, yoin" lo" da:. Nyang: gi yoem: gyi: bang: ri ce: yoem: aphain" loo said pyam da:.

²¹Nyang: gi ngoonu" da" khyid: byi khang" moo" zung" yu" nyid da:.

²²Yooboo yoo" bang: ri Mangso shidkhoin" moo yo" nghoeb pyam wa yhi' no, seing" kyid: no, da" moug: coid ajo, nghoid da:.

²³Mangsoo gi xangsu: byu yi nya: jhang yhe: lho: dang: phyed wa zi kham: yu wa shid re" ayo, akhyeing: tu' too" aca" nghoid da:.

²⁴Nyang: gi vhujhung: yiri yu pyam lho: gooyug yug ri thid kaid wa shid re" myid: joeb yu" khyoo: akoid ca".

²⁵Nyangnu" cikoid nyid ziri nyang: si' yoo: mo nyang: gi nyangnu" ri tu: khyo' pyam lho: myen" ayo, moo nyangnu" ri khyoeb mhoin pyam da:.

²⁶Nyang: gi yooboo yoo" bang: ri dangain" bang: wigi shau" myang da joyoo moo yooboo dam byid: da:.

²⁷Ciwim ga: ri nyangnu" gi nya: thang: moo acang houg: lho: nya: amyeing" dang: ri ci asoin: byid: loo: yu" lhid: kaid ago".

²⁸Nyangnu" gi myung bang: ri Mangso jhang mho' yoid wa shid re" agyoo: atho' jhoin" ago". Houg: lho: nyang: gi nyang: yoid mho' thui: ri shau" gyo: da:.

²⁹Mangsoo gi ci: nyang: akoid wa ga: myid phyed nghoid rigi Nyang: ri hang" wigi we' yooboo ayo" zhug wa. Nya: myonhoo: ri shoung: pyam nghoid rigi byu yigi ci: khasu" we' ayo" koid loo wa.

³⁰Byumyu" mungdain: yigi nyangnu" adang moo Mangsoo abo da" doin: zeig zoo: bang: avhoeb zoo: wa shid re" yo" koid wa khyoo: daja: we ajo,.

³¹Yoba we"- nang gi re" da" yooboo joem ri Mangso jhang yhen: yu wigi Yooboo adoem shoid wa ein: dangsoo" byid: bye: rhe".

³²Nang gi re" yooboo joem ri ci: shug wa shid re" Mangsoo ri mho' bye: rhe". Houg: lho: akhyeing" ziri koid wa jang" mo theing: pyam wa shid re" myid veing" bye: rhe".

³³Mangsoo koid ziri akhid" ju" sho' nang ngeug thug gang mo nang vho: ziri yo" koid wa ein: yo" myid byu wa la". Myid phyed wa gi nang nghoid da- ngoo anghoid. Nang khasu" myid ein: ziri akhid" ngoonu" ri tid kyoo" la.

³⁴Se' myid yu" da" byu hang" nghoid loug we' gyeing" nyang: myid veing" boem wa. Ngoo tid ziri shau" gyo: da" phajhi" boo su: hang" nghoid loug we'.

³⁵Yoba gi nyang: ci: asi' yoomo tid houg: lho: nyang: tid zi ce: dang: kang: aboo.

³⁶Yoba tid zi ja: khang" moo" ri myid yu" we'. Nyang: gi akhyeing" da" byu dayug yhang: ti" dang: tid nyid da:.

³⁷Nyang: gi nya: yooboo dang moo goemlu to' khyoo: doem lung: kaid da:. Nyang: gi ngoonu" dangain" bang: shidkhoin" moo Mangsoo ri aphoug" akhyoid juang" da:.