Read Lashi YOBA 36 Bible Online

YOBA 36 - Lashi bible

YOBA 36

¹Mangso da" gungthid ngoo tid nyid da" dang: joem ri Nheigloem: sheing: sheing: to" lho: xo' tam" gyoo: byid: shi" la.

³Nga" lasi phajhi" gi gyi: sheung: da:. Nga" phain" so: su: Mangsoo gi deingmain" ziri ci: shug wa shid re" ngoo se' ziri ci: yhung: wa

⁴Nang ri ngoo tid zi ce: daja: we' shoid zi aboo. Nang gi re" shidkhoin" moo gyeing" nyang: phajhi" bo byu dayug ri shau" myang da:.

⁵Mangsoo gi khayhi' yoem: bo la". Nyang: gi hang" ri we' anoug akhyoid. Nyang: ase' gyo: zi daja: we' ajo,

⁶Nyang: gi yooboo yoo" bang: ri dei nyid wa akhang" abyid: nghoid da:. Houg: lho: nyang: gi myung bang: ri tarha" deingmain" da" khyo" khanham we' zoem" khoug: da:.

⁷Nyang: gi deingmain" bang: ri goem loem byid: da:. Nyang: gi nyangnu" ri khokham yi yhang: ti" vhoeb zoo: nhang: da:. Houg: lho: apyaid atoo: moo ngi: shab nhang: da:.

⁸Nghoid loug we' byu yigi nyangnu" koid lid lo da" moo" gang mo kyi" khyeug shau" wigi jangcoo" yo' myheig tei" to" zi shoug" nghoid rigi

⁹Mangsoo gi nyangnu" ri nyangnu" da" yooboo yo' nghoid boin: ziri ci: shug da:.

¹⁰Nyang: gi nyangnu" ri akhyeing" jang" moo lheing: loo wa shid re" nya: da" tid poin" dang: ri tam" gyoo: nhang: da:.

¹¹Nyangnu" Mangsoo ri phoug" myang: wigi nyang: ri dei byid: nghoid rigi nyangnu" gi yug yoo myenjham" ziyo' nyid gi yab ge da" apyaid yo" yu wa.

¹²Nghoid loug we' hougsu" anghoid rigi agyeing: asoo" nyangnu" shid: loo" wa wigi moovo moug: khyoo: gyid zoo: gyung: ri gu: dab lho: yhe: loo" wa.

¹³Mangsoo ayoo" bang: gi xo' wigi nheig yo: nyid ago". Houg: lho: yooboo dam byid: zi shoug" rilang" nyangnu" gi pang" yu wa shid re" akyu" amho' nghoid ago".

¹⁴Nyangnu" gi ngi shi" mo ngi: yoem" khyo" nyid pyang: lo" lho: shid: lo" boem.

¹⁵Nghoid loug we' Mangsoo gi byu yiri yau: khi" yo' jhau" shid lho: Nyangnu" da" myojid" joem ri phang wa shid re" nheigloem: thang ziri ci: yhung: da:.

¹⁶Mangsoo gi nang ri yau: khi" mo shu" thu yu lho: nang ri goem loem tung" nyhid: to" da:. Re" zoobui" moo zoo: noem byeung" sho' boem jo, da:.

¹⁷Nghoid loug we' akhid" koem' gi nang kham zoo: eung: ziyo' dayhang: ti" yooboo dam byid: zi shoug" nyid da:.

¹⁸Khougvhoid jhungshug wigi nang ri ayo" mhoug fain" nghue" yu wa shid re" zid" nyid we'. Jonu" wigi nang ri khyoo: ashu" vhang: wa shid re" zid" nyid we'.

¹⁹Nang ri pang" yu wa shid re" nyho: yoid loug we' ce: akyu" boo wa zi anghoid. Re" yoem: dangain" gi akhid" nang ri ayo" pang" yu nghoid da:.

²⁰Myen" ayo, ju" loo yhoo: ein: amyid. Byumyu" joem byo, yoin" wa ayo, ri amyid lang"

²¹Akhyeing" jang" khyoo: aphug loo" sho' zid" nyid we'. re" yau: khi" gi nang ri houg: khyoo: aloo" wa shid re" bue" zi nghoid.

²²Mangso da" yoem: so' khayhi' gyi: ziri myid boin we'. nyang: gi dangain" bang: tho' gyi: thang da" sara: nghoid.

²³Mangsoo ri cikoid la' ga: anghoid lang" nyang: ri akhyeing" moo" koid da: ga: hang" wigi yooboo ayo" zhug goo" wa.

²⁴Nyang: koid da" moo" zoo" gang mo nyang: ri coung" zi shau" da:. Nang we' nyang: ri coung" ca" da:.

²⁵Nyang: koid lid lo ziri yugkhang" moo" shoug myang abye: go". Nghoid loug we' ngoonu"' gi vi: mo dagau" zung" yu" nyid da:.

²⁶Ngoonu" gi nya: da" gyi: sheung: khyoo: ri joeb byeung" sho' ayo" si nghoid da:. Nya: da" zain nyid khamyhang nghoid ga: zi ayo" si nghoid da:.

²⁷Myid gung mo gyid ri thoid yu lho: hau: ziri moug: cab bui" nhang: su: gi Mangsoo nghoid da:.

²⁸Nyang: gi xangsu: byu dangain" shid re" moug: gyid ri jhoemmoug" thei" joem khyo" moug: vo khyo' nhang: bye:.

²⁹Mangsoo nyid da" mougkhung: khyo" jhoemmoug" thei" joem khasu" so" lo" ziyo' moug: goem: khasu" myeing lid lo" ziri hang" asi' nghoid da:.

³⁰Nyang: gi lhab' myeig ziri mougkhung: goem: sho' dangain" khyoo: nhang: kaid da:. Nghoid loug we' panglai: thoem" kang moo gi da no, coid jo, shi"

³¹He: zigi nyang: wigi byu yiri zoo: noem khasu" zho" ziyo' zoo: noem agoin agoo" byid: da" khyoo: nghoid da:.

³²Nyang: gi lhab' myeig ziri nya: lo, wigi myheig yu lho: hau: ziri thang" thid: moo beig zang" wa shid re" amyeing" byid: da:.

³³Moug: goem: goem: zigi uglid hau' lo nyid ziri tid fu" da:. Houg: lho: uglid hau' lo nyid ziri nu joem se' ago".