Read Lashi YOBA 37 Bible Online

YOBA 37 - Lashi bible

YOBA 37

¹Uglid gi nga" nheigloem: ri phibu phaxeig seing" gug thung" nhang: da:.

²Nanu" dangain" bang: Mangso da" thui: ri tam" gyo: yu" shi" we'. Nya: nhoid mo thu da" moug: goem: ri tam" gyo: yu" shi" we'.

³Nyang: gi mougkhung: dashoid athang: mo zi dashoid athang: ju" sho' mougkhung: khyo" moug: lhab' myeig nhang: da:.

⁴Hau: thang: myeing da" thui: ri shau" gyo: da:. Moug: goem: goem: thui: zeing ri shau" gyo: da:. Houg: lho: hau: uri moug: lhab' myeig da:.

⁵Mangsoo amyeing" byid: kaid lang" mau" pho" moo" joem bue" lo da:. Ngoonu" atho' se' gyo: da" mau" pho" moo" joem bue" thu lo da:.

⁶Nyang: gi gyu: ri mougmyid khyoo: gyoo" loo nhang: lho: Tung: byung: byung: sho' moug: wigi boeb boeb jhu' sho' voo nhang: da:.

⁷Nyang: gi byu yi da" moo" zoo" ri toem' pyam byid: da:. Nyang: gi nyang: yo" koid khyoo: ri nyhang" ri ci: shug byid: da:.

⁸Gougnyhoug lam" joem gi nyangnu" da" khyung khyoo: phang: vang lo" ago".

⁹Uglid gi mougpyi: shoid khyo" hau' lo wigi Gye" ngam" da lid gi mougzhung: shoid khyo" moid lo da:.

¹⁰Mangso da" so' gi gyid ri khe" loo" nhang: da:. Houg: lho: hau: gyid ri gyu: bue" nhang: da:.

¹¹Jhoemmoug" thei" mo lhab' myeig thu re" da:.

¹²Nyangnu" gi Mangsoo myid vho: da" khyo" yu: yen" da:. Nyangnu" gi Mangsoo amyeing" byid: gu dangain" ri koid da:. Moug: gyab khyi' khang" moo" khyoo: lheing: yen" da:.

¹³Mangsoo gi mougmyid ri gyid deig nhang: wa shid re" moug: voo nhang: da:. Nyang: gi byu yiri yooboo dam byid: wa nghoid nghoid- nyangnu" ri pang" yu wa nghoid nghoid hau: ziri nhang: kaid da:.

¹⁴Yoba we"- daso' zoo: theing: wigi tam" gyoo: shi" la. Mangsoo koid da" mau" pho" moo" ri myid yu" we'.

¹⁵Mangsoo khasu" amyeing" byid: kaid ziyo' jhoemmoug" thei" mo lhab' myeig thu re" ziri nang se' la"

¹⁶Jhoemmoug" thei" joem mougkhung: moo khasu" dang: yen" ziri yo' Mangso da" mau" pho" lasi phajhi" moo" ri nang se' la".

¹⁷Anghoid- mougpyi: shoid khyo" lo da" lid gi mougmyid ri moid zeig nyid uri nang gi lung thui: za: dashau" gyo: kaid da:.

¹⁸Nang gi Mangsoo ri mougkhung: yo" bo pang" myhu" wa la" Houg: lho: hau: ziri boid yung" to" da" to' phyu: yhang: ti" thain: sho' yo" bo pang" koid wa la".

¹⁹Mangsoo ri khasu" citid wa zi ngoonu" ri jhau" byid: la. ngoonu" myid moo akoem: nghoid da:. Ngoonu" tid wa ci ayoo" nghoid da:.

²⁰Ngoo gi Mangso yo' doem goo" wa shid re" amho' wa. Nyang: wigi ngoo ri phyo' shoin' pyam wa akhang" nyang: ri ngoo ciwim se' byid: wa.

²¹Houg: lho: akhid" gi mougkhung: mo bidbang myo, yi yi da:. Hau: zi ngoonu" ayo" yu" sho' bang: da:. Houg: lho: lid wigi mougkhung: ri hau' khyoid sain" pyam da:.

²²Mougzhung: shoid khyoo: yu" kaid ri sheing: yhang: ti" bang jo, da:. Houg: lho: Mangso da" bidbang gi ngoonu" ri gyoug mau" byug nhang: da:.

²³Mangso da" yoem: so' gi sung thain: yoomo nya: nam khyoo: ngoonu" ayo" yhi:. Nyang: gi deingmain" wigi byu yiri tarha" nyeung veung" khyo" zoem" khau: da:.

²⁴Houg: lho: yugkhang" moo" nya: shidkhoin" moo gyoug mau" yab jo, ziri moug" cang aboo. Houg: lho: nyang: gi phajhi" se' ga: bang: ri ci shu: anhang: loo: yu" to" ziri moug" cang aboo.