Read Lashi YOBA 38 Bible Online

YOBA 38 - Lashi bible

YOBA 38

¹Hau: thang: Uglid khoug: khyo" ASEING gi Yoba ri tu" byid: da:.

²Re" da" ci ase'- akang abo dang: yo' nga" phajhi" ri myid: yu" wa ga: da" nang gi hang" khate" yug nghoid la".

³Akhid" nang zhang" to' yab wigi nang ri ngoo myid: da" dang: khoin" joem ri phuid: kyoo" byid: we'.

⁴Mougmyid ri ngoo phain" so: to" uri nang nyid rhe". Nang gye" se' nghoid ri hau: khyoo: ngoo ri tid kyoo" la.

⁵Hau: zi khayhi' gyi: ein: ziri hang" myid phyed la". Hau: adang moo ke' da" tei" ri hang" wigi pyo: to" la". Dang: phuid: dangain" ri nang se' la"

⁶Mougmyid gyab ri thug to" da" zeing thug ri ce: wigi zei: ci: la" Mougmyid da" akhyoug: lugzeing ri hang" zhug to" la"

⁷Hau: nyid" moug: bo" re" ri kyi: joem dage" jikhoin" khoin" da:. Houg: lho: mougkhung: moo nyid da" dei noem joem gi gau wigi nyho: ago".

⁸Myid gung voem: doug: khoug: mo panglai: bug shoin: thu re" uri panglai: ri jhid toem da" khoem" moo" ri hang" myhid" to" la".

⁹Panglai: ri jhoemmoug" thei" wigi nghoeb to" wigi moug: coid wigi thoeb too" su: gi ngoo nghoid.

¹⁰Ngoo gi panglai: ri mougkyoo" too" byid: wigi hau: ziri khoem" kyang kyang lhung too" bye:.

¹¹Ngoo gi hau: ziri «Gye" ve: jang" khyoo: alid yhi:- hid: moo yoem: so' gyi: da" re" being: lhung" joem ri theing: ca"» ein: tid bye:.

¹²Yoba we"- re" dapyaid goin" moo nab soin: moug: bo" ri" wa shid re" amyeing" byid: yu" rhe".

¹³Moug: boo" re" da" ayo, wigi mougmyid ri myheig pyam wigi akhyeing" bang: ri nyangnu" phang: gau" nyid da" joyoo mo lang: lhei" kaid wa amyeing" khyo' yu" rhe".

¹⁴Nyid" gung bidbang gi bouggung joem yo' langkhung" joem ri byimi khug khyoo" yhang: ti" du nhang: wigi myidzhoo" moo dazid thung" tab to" yhang: ti" di: di: myang thu ri" nhang: da:.

¹⁵Nyid" gung bidbang gi akhyeing" bang: shid re" sung bang: wigi Athoug" akhyoug: mo" mo nyangnu" ri theing: nhang: da:.

¹⁶Nang gi panglai: khoug: mo gyid thu joem cang ju" yhe: yu" la". Nang gi nammugdara thoem" kang moo so" yu" rhe".

¹⁷Nang ri dayug yug wigi moug: coid jo, da" moovo moug: ri zung" da" khoem" ri toin" shed yu" rhe".

¹⁸Mougmyid khayhi' gyi: ziri nang tho' se' rhe". Nang se' nghoid ri phid: kyo" yu" we'.

¹⁹Bid bang kha mo re" ziri nang se' la" Moug: coid da" apoem: ayang: ci: nghoid ziri se' la".

²⁰Houg: joem gi khafi' vi: sho' loo" wa ziri anghoid lang" hau: joem ri doem yo" tau" phang: nhang: wa la" ein: da" khyoo: ri yo" ci: shug wa la.

²¹Nang gi gye" mang: bye: yoomo mougmyid ri phain" so: to" da" uri nyid byid: yoomo nang si wa ein: ngoo myid loem.

²²Gyu: yo' leigvoo ri ngoo to" to" da" zi too" yab khyoo: nang lhung yhe: yu" rhe".

²³Ngoo gi hau: joem ri yau: khi" byid: wa ayo, yo' gyi khaid- meing: zain: da" bidnyid joem shid re" soin' jen" too" bye:.

²⁴Bid thu re" da" joyoo khyoo:- anghoid lang" bid thu shoid mo lid hau' lo da" joyoo khyoo: nang ju" yhe: yu" bye: la"

²⁵Moug: gyid gyoo" loo wa gyid khyoo" ri hang" du: to" la" Houg: lho: Uglid zoo" shid re" khyoo: ri hang" sho' to" la"

²⁶Hang" anyid da" joyoo moo hang" wigi moug: vo gyoo" nhang: la".

²⁷Vufu" yug toid loo wa shid re" kyug hei' lho: moug: gyid shed' da" mougmyid ri hang" wigi gyid shoin" la".

²⁸Moug: gyid yo' nghain: gi nya: phoo yo" la".

²⁹Gyu: yo' nghain: da" nya: myhi' gi hang" nghoid la".

³⁰Hau: zigi gyid mo lugzeing bue" loo" nhang: lho: Panglai: adang pyam ri nghain" khe" loo" nhang: da:.

³¹Nang gi kyi: gyo: lakhyoin joem ri dage" za: yo" shoem" deing: wa la" Anghoid lang" Boo" kyi: ri tei" to" jang" mo yo" phuid: kaid wa la".

³²Nang gi kyi: joem ri nya: ayo, yo' ayo, moo khyoo: yo" shid byid: wa la" Coid Kyi: zeing yo' Coid kyi: zoo: joem ri khyoo: yo" toin" shed wa la"

³³Nang gi mougkhung: ri vhoeb da" tarha" ri se' la" houg: lho: hau: tarha" ri myidgung moo yo" ci: wa la".

³⁴Nang gi jhoemmoug" thei" ri nyho: wigi amyeing" byid: lho: nang ri moug: gyid boeb boeb jhu' sho' yo" voo nhang: wa la".

³⁵Houg: lho: nang gi moug: lhab' ri myeig nhang: wa shid re" amyeing" byid: kaid ri hau: zigi re" jhang re" wigi «Nang aseing ri dei byid: wa» ga: tid wa rhe".

³⁶Ibisa ngho' ri Nila gyung: je: wa ziri hang" wigi tid kyo" la". Moug: voo wa ga: ziri gyo, phoo ri hang" tid kyo" la".

³⁷Jhoemmoug" thei" joem ri yo" nghab sho' hang" phajhi" bo la". Houg: lho: pheilhoug: ri myidzhoo" khi' bue" loo" sho' thain: nhang: da:. Moug: gyid ri foid shoin" kaid wa shid re" jhoemmoug" thei" ri hang" yo" yho" kam" nhang: la".

³⁹Nang gi khangkhyi joem shid re" zoo: noem yo" shoo: byid: la". Khangkhyi nu" joem gi nyangnu" da" khyung: mo goug" nyid wigi anghoid lang" nyangnu" shoo" mang ri lang" jhang" jo, ri voem: gyi: wa la".

⁴¹Kuano, joem zooyoid wigi so" lam" yen" lho: nya: zoo: yigi ngoo ri zoo: noem mho' yoid nyid uri zoo: noem byid: su: hang" nghoid la".