Read Lashi YOBA 39 Bible Online

YOBA 39 - Lashi bible

YOBA 39

¹Layoo: joem kha: uri khu: re" zi nang se' la". Shoocid: joem nya: zoo: xang" ziri nang lhung myang la".

²Nyangnu" khamyhang myang" sho' zoo: voin ziri nang se' la". Nyangnu" zoo: khu: da" ayo, ri nang se' la".

³Nyangnu" goeb ci: lho: nya: zoo: joem ri he: mougmyid khyoo: khanham khu: thu kaid ziri nang se' la".

⁴Nyangnu" da" zooshang: yigi siyoo khoug: moo nyid gyi: re" ago". Nyangnu" thu loo" khare" wigi adoem tau" loo loo: nghoid ago".

⁵Loo zei: lam" yiri nyangnu" da" loid byoin khyoo: ri hang" byid: la". nyangnu" ri hang" wigi phid: kaid wigi nyid lam" yen" nhang: la".

⁶Ngoo gi nyangnu" nyid wa yhoem: khyo" nyangnu" ri dain" pyoid yoo byid: too" bye:. houg: lho: nyangnu" ri xoo" thoem" jang: pa: moo nyid nhang: bye:.

⁷Nyangnu" gi lu: fu: go" thui: jo, da" voomoo" joem mo vi: vi: khyoo: nyid ago". Houg: lho: nyangnu" ri hang" we' mi" sho' koid lho: moo" ayo" zei: nhang: nghoid da:.

⁸Boem joem gi nyangnu" lham" zoo: wa coung" yoo nghoid da:. Hau: joyoo moo nyangnu" gi zoo: wa mhain" nyoug ri shoo: zo: ago".

⁹Nulam" gi re" shid re" moo" zei: byid: loo wa rhe". Nyang: gi re" nu khoem: moo damyen nau yhoeb wa rhe".

¹⁰Nulam" dadu: ri nang tei" wigi tei" lho: yoo yo" phug nhang: wa la". Anghoid lang" nyang: ri re" yoothung" joem moo kyi' yo" shi: nhang: wa la"

¹¹Nang gi nya: yoem: moo" ri loem wigi re" shid re" moo" zeing: koid byid: wa shid re" yo" myid loem rhe".

¹²Nang gi nyang: ri shivoo: yham" di" nhang: wigi re" gug nang: jang: mo gug zoo joem ri yo" shoem" zheing" nhang: rhe".

¹³Ngho' gola-ug da" dung gi khayhi' myab sho' phab la". Nghoid loug we' ngho' gola-ug kha du: we' gyid ngho' yhang: ti" ayo" dang: nghoid da:.

¹⁴Ngho' gola-ug gi nya: da" ngho' u ri myidgung moo khyo' too" kho' lho: Myid gung gi hau ngho' u joem ri loem nhang: da:.

¹⁵Nyang: gi hau: joem ri dayug yug wigi nang: khyoeb pyam wa ziyo' siyoo gougnyhoug dadu: du: wigi ze" shoin' pyam wa ziri aci' nghoid da:.

¹⁶Nyang: gi hau: ngho' u joem ri nya: da" ngho u anghoid yhang: ti" koid da:. Houg: lho: nyang: yoem: kaid pyam zi amyed aji bue" byug wa seing" akhoo" nghoid da:.

¹⁷Nyang: ri nheig agyeing: nhang: wigi nyang: ri phajhi" abyid: su: gi ngoo nghoid.

¹⁸Nghoid loug we' nyang: tang" phang: lo" da:. nyang: gi myang: kha: du: ri we' myang: ju: su: kha: yug ri we' yo" yi pyam da:.

¹⁹Yoba we"- myang: joem ri houg: yhi' yoem: boo nhang: lho: myang: leung zeung: moug" yug to" zigi nang nghoid la".

²⁰Nang gi nyangnu" ri jhenkhyeug joem yhang: ti" peig byam' nhang: wigi nyangnu" da" nhoo: myeing thui: wigi byu yiri kyug tain' nhang: rhe".

²¹Nyangnu" gi lang: khung" mo myidzhoo" ri lo, yo' zhoeb yu lho: gyi khaid jang: khyoo: nyangnu" da" yoem: dangain" yo' tang" yhe: lo" ago".

²²Nyangnu" gi gyoug ga: zi aboo. Houg: lho: shamcoin" aboo yoomo atau" phang: loo" nhang: nghoid da:.

²³Nyangnu" ri zhung: bang: ci: da" gyi jonu" joem ko' myheing wigi bid zhoo: moo yid yid bang: nyid da:.

²⁴Hau: myang: joem gi laboo" moid kaid lang" sam: zoo: ayo" yab jo, loo nheigloem: zhu: ziyo' nain" re" wigi shid khyoo: tang" thu yhe: lo" ago".

²⁵Laboo" moid myheing kaid khang" moo" nyangnu" nhoo: moid myheing ago". Nyangnu" gi ajhang re" shi" mo nyang: meing: zain: pa: shoem: yo" nam gyo: da:. Houg: lho: nyangnu" gi zoug: yi amyeing" nyho: byid: nyid ziri shau" gyo: da:.

²⁶Zoin kyang" gi mougpyi: shoid khyoo: nya: da" dung ri pyo: kaid uri dang: wa shid re" nang mo jhau" yu la".

²⁷Zoin bung: gi myhang: da" boem joem moo nya: da" soid ri koid wa shid re" re" amyeing" dang: ri lang" nyid la".

²⁸Nyang: gi myhang: thang da" lug pyo' moo nya: yhoem: ri koid to" lho: Coin: da" boem phyoo" joem ri nya: da" gyi khoug: vang khyo" ci: da:.

²⁹Nyang: gi hau: joyoo moo jhang mo vi: mo myheig zoo: wa daja: ja: ri zung" yu" nyid da:.

³⁰Zoin bung: joem gi shoo" mang joem moo zeing: foem: nyid wigi Zoin nu" joem gi suid" ri shug ago".