Read Lashi YOBA 4 Bible Online

YOBA 4 - Lashi bible

YOBA 4

¹Yoba we"- ngoo dang: tid ri nang nheig gyo: yoo: wa la". Ngoo sam zoo: ayo" nyid loo.

³Nang gi byu myoo" sho' bang: ri jhau" shid wigi yoem: nheing: da" lo, joem ri yoem: byid: lo abye:.

⁴Byu dayug yug gi khyid: vhu" thung" leung- yoem: neing: lho: myung: dau uri Re" dang: khoin" joem wigi nyang: ri to' loo" wa shid re" yoem: byid: da:.

⁵Akhid" gi yau: khe" shoug" wa nang moo ju" jo, abye:. Hau: lho: nang gi hau: ziri avoem" shoug" sho' gyoug dain nyid da:.

⁶Nang gi Mangsoo ri noku wigi re" apyaid gi yooboo voin wa aboo nghoid da:. hau: lho: nang gi myid loem ziyo' yo" myid lang" nyid.

⁷Akhid" doem tau" myid yu" we' deingmain" da" byu dayug byo, yoin" zi shau" da" khyoo: daloem: khyalang" tid yu" we'.

⁸Akhyeing" da" yoothung" phug lho: Akhyeing" ashoeb da" myoug: shi" sain" da" bang: Akhyeing" ziyo akhyeing" ashoeb ziri yham" yu boem ziri ngoo myang yu" bye:.

⁹Mangsoo gi uglid yhang: ti" nya: nheig yo: zi wigi nyangnu" ri phyo' shoin' pyam da:.

¹⁰Akhyeing" ashoeb zigi khangkhyi yhang: ti" myeing nyid da:. Nghoid loug we' Mangsoo gi nyangnu" ri tam" too" nhang: wigi nyangnu" zei joem ri khyau" pyam byid: da:.

¹¹Ngaid said zoo: wa ci: ayo" da" khang: khyi: joem yhang: ti" nyangnu" shid: lo" wigi Nyangnu" nya: zoo: yi dangain" ri khaid sain" pyam zi shoug" ago".

¹²Dalheing: ri ngoo lang" alug ashau" gyoo: sho' da" thui: yo' mungdang: daloem sam: zoo: ju" lo da:.

¹³Hau: zigi yhoeb zeig zeig yhang: ti" ngoo ri ayo" yhoeb bui" nhang: da:.

¹⁴Ngoo gi ko' ko' gyoug nain" nyid. Nga" gung goin" gyoug wigi nain" nyid da:.

¹⁵Nga" myonhoo: moo lid yoem" lo hau' zang" wigi Ngoo gi gyoug wigi gyo, shi" to' re" da:.

¹⁶Houg: moo daja: yab jo, ziri ngoo shau" myang. Ngoo zhug yu" nghoid loug we' ci: nghoid ziri ase' tid. Hau: thang: sam: zoo: tam" jo, jang" mo thui: dathui: ri ngoo shau" gyo: kaid.

¹⁷«Mangso shidkhoin" moo hang" dayug yo" deungmain" wa la". Anghoid lang" nya: phain" so: yhoem: seing: shidkhoin" moo yo" deungmain" wa la".

¹⁸Mangsoo gi mougkhung: mo nya: dei zoo: yiri aloem. Nyang: gi nya: da" moug: lagyoo: yiri lang" yooboo yo" myang byid: da:.

¹⁹Boug goo: ri yhang: ti" yo" doin: phyi: said pyam da" pheilhoug: nghoid da" Myid nhoug: dei noem ri nyang: myid loem wa ein: nang myid jho: rhe".

²⁰Nyang" gi nab soin: ri yo" dei nyid wa. Nghoid loug we' myen" thang: aju" shi" ri hang" asi' aboin: loo za: ge shid: lo" da:.

²¹Nyhang" yo" zi dangain" ri yu pyam byid: lho: nyhang" gi phajhi" asi shi" ri shid: lo" da» ga: tid.