Read Lashi YOBA 40 Bible Online

YOBA 40 - Lashi bible

YOBA 40

¹Yoba we"- nang gi Myhang: thang Mangsoo ri mi shi' wa soin' da:. Nang akhid" asoem" byid: wa la". Anghoid lang" dang: phuid: byid: wa la".

³ASEING we"- ngoo gi nheig agyeing: khyo" dang: ji bye: nhung:. Ngoo ci yo" tid phuid: kyoo" wa la". Ngoo gootu: ci: atid loo wa.

⁵Ngoo gi tid eung: tho' je wigi tid pyam bye:.

⁶Hau: thang: ASEING gi Yoba ri Uglid khoug: khyo" dang: doem ji thu re" da:.

⁷Zhang" to' yab wigi nga" dang: myid: ri phuid: kyoo" byid: la.

⁸Nang gi ngoo ri shoid ga: wigi nang nyang: gi jo ga: khyo" too" wa shid re" ngoo ri atarha" ein: sagse: ci: shug byid: wa soin' nyid rhe".

⁹Nang gi ngoo yhang: ti" yoem: bo la" Re" da" thui: gi nga" da" thui: yhi' moug: goem yhang: ti" yo" myeing la"

¹⁰Yo" koid nghoid rigi nang ngi: shab nghoid boin: da" khyo" to' yab kaid we' Nanya: gung ri khokham' yoem: so' yo' phung" yoeb ri void ci: we'.

¹¹Nghoid boin: bang: ri yu" kaid yu" we' re" nheig yo: khyoo: ri foid khyo' kaid lho: nyangnu" ri nyhoem: gyoo" loo" nhang: we'.

¹²Nghoid- nyangnu" ri lang" yu" nyid wigi du" khyo' pyam we'. Akhyeing" bang: we' nyangnu" yab jo, da" joyoo moo khyoeb pyam bye:.

¹³Nyangnu" dangain" bang: ri myidgung khoug: khyoo: myhoeb pyam bye:. Nyangnu" ri moovo moug: moo tei" lang" too" bye:.

¹⁴Houg: lang" nang ri ngoo shi" coung" byid: wigi nang gi nang nyang: yo" ung: doid yu da: ein: kham: yu wa.

¹⁵Behemod ga: da" mainjung: ri yu" kaid yu" we'. Ngoo gi nyang: ri phain" so: to" wigi nang ri we' phain" so: to". Nyang: gi nu zeing yhang: ti" vufu" zo: da:.

¹⁶Nghoid loug we' nya: da" gung khoug: moo kha te" yoem: moo" bo la" Nya: da" shoogyi: khoug: moo khate" yoem: so' moo" bo la"

¹⁷Nya: da" shoomyi: gi shamu gam yhang: ti" tu: zhung: re" wigi nya: da" khyid: joem mo shoogyi: joem gi yoem: bo da:.

¹⁸Nya: da" shooyoug: joem gi gyid: mid" yhang: ti" thain: wigi nya: da" khyid: joem gi joto' thung" joem yhang: ti" nghoid ago".

¹⁹Ngoo phain" so: to" jang" mo moug" thang ja: nghoid da:. Nyang: ri phain' su: za: nyang: ri yo" oung: pyam da:.

²⁰Siyoo gougnyhoug joem lhu: ei" da" joyoo bouggung joem tho' moo nyang: ri zhoo" wa vufu" yug da:.

²¹Nyang: gi zu: kyin: pung joem agyid" moo jhang" jo, wigi thoem" nhoin: boem" khoug: mo gyidpheing" yoo agung moo: gau" lung" jo, da:.

²²Gyid zoo: gyung: yam' mo zu: khyen: pung joem yo' gyidpheing" gam joem gi nyang: ri bid shoem: byid: da:.

²³Nyang: gi gyid boug thain: da" gyid gyung: ri agyug nghoid da:. Nya: da" myonhoo: moo Yodan gyung: mo gyid zoo" lo baid nyid ziri sam: zoo: tam" jo, da:.

²⁴Nya: da" myojid" joem ri hang" yo" thau" phug pyam wigi nyang: ri hang" yo" myheig yu wa la" Anghoid lang" nya: da" nhoo: moo nhoo: shu hang" yo" kaid wa la".